ទីក្រុងបាងកក៖ នៅទីបំផុត កូនស្រីពៅរបស់លោកថាក់ស៊ីន គឺលោកស្រីផែថងថាន ត្រូវព្រះមហាក្សត្រត្រាស់បង្គាប់តែងតាំងជានាយករដ្ឋមន្ត្រីពេញសិទ្ធិដើម្បីដឹកនាំប្រទេសជាតិបន្តពីលោកសេដ្ឋា។ ដូច្នេះ លោកភុំថាម វិឆាយ៉ាឆៃដែលកាន់តំណែងជានាយករដ្ឋមន្ត្រីចាំផ្ទះបាន២ថ្ងៃក៏ត្រូវបញ្ចប់តួនាទីតែត្រឹមនេះ។ សេចក្ដីត្រាស់បង្គាប់របស់ព្រះមហាក្សត្រត្រូវបានអ្នកតំណាងរដ្ឋសភា លោកអាផាត សុខាណាន់ (Apat Sukhanand) អាននៅក្នុងពិធីជួបជុំមួយនៅទីក្រុងបាងកក។
លោកស្រីផែថងថានបានគ្រងសំលៀកបំពាក់ជាឧត្ដមមន្ត្រីនៃរាជរដ្ឋាភិបាល ហើយលោកស្រីលុតជង្គង់នៅចំពោះមុខព្រះឆាយាល័ក្ខណ៍ព្រះមហាក្សត្រដើម្បីសម្ដែងគារវភក្ដីដ៏ខ្ពង់ខ្ពស់បំផុតចំពោះព្រះអង្គ។ បន្ទាប់មក លោកស្រីបានចេញសេចក្ដីថ្លែងការណ៍ដោយសង្ខេបមួយសម្ដែងការអរព្រះគុណព្រះអង្គដែលត្រាស់បង្គាប់ទទួលស្គាល់លោកស្រីជានាយករដ្ឋមន្ត្រីថៃជាផ្លូវការ។
ក្នុងនាមជាប្រមុខរាជរដ្ឋាភិបាលថៃ លោកស្រីសូមប្ដេជ្ញាចិត្តថានឹងខិតខំបំពេញភារកិច្ច និងតួនាទីដែលជាតិបានប្រគល់ឱ្យក្រោមកិច្ចសហការជាមួយស្ថាប័ននីតិប្បញ្ញត្តិ។ លោកស្រីនឹងទទួលយកមតិយោបល់ពីគ្រប់មជ្ឈដ្ឋានដើម្បីដឹកនាំប្រទេសជាតិឆ្ពោះទៅរកស្ថិរភាពនយោបាយ។ លោកស្រីផែថងថានសព្វថ្ងៃនេះមានអាយុ៣៧ឆ្នាំ ជានាយករដ្ឋមន្ត្រីស្ត្រីវ័យក្មេងបំផុតនៅក្នុងប្រវត្តិសាស្ត្ររបស់ប្រទេសថៃ។
ក្នុងនាមជាកូនស្រីពៅរបស់លោកថាក់ស៊ីនដែលជាអ្នកនយោបាយគីឡូធ្ងន់ម្នាក់ លោកស្រីបានទទួលសំឡេងគាំទ្រគ្រប់គ្រាន់ពីរដ្ឋសភាកាលពីថ្ងៃសុក្រ។ ក្នុងនោះ ៣១៩សំឡេងគាំទ្រ, ១៤៥សំឡេងជំទាស់ និង២៧សំឡេងអនុបវាទ។ គិតទៅ គ្រួសារត្រកូលស៊ីណាវ៉ាត់ត្រាកាន់តំណែងជានាយករដ្ឋមន្ត្រីចំនួនបីរូបហើយ។ ទី១-លោកថាក់ស៊ីន, ទី២-លោកស្រីយីងឡាក់ និងទី៣-លោកស្រីផែថងថាន។
អ្នកវិភាគយល់ថាលោកស្រីផែថងថានជាអ្នកថ្មីថ្មោងខាងវិស័យនយោបាយដោយសារលោកស្រីពុំធ្លាប់មានមុខតំណែងនៅក្នុងជួររដ្ឋាភិបាលកាលពីមុនមកទេ។ ដូច្នេះ លោកស្រីទំនងជាប្រឈមនឹងបញ្ហាច្រើនណាស់ពីគ្រប់មុខព្រួញទាំងអស់។ ប៉ុន្តែលោកស្រីមានឪពុកដែលជាអ្នកជើងចាស់ខាងនយោបាយចាំជួយជ្រោមជ្រែងពីក្រោយខ្នង។ ប្រទេសថៃឥឡូវនេះកំពុងជួបប្រទះនឹងបញ្ហាជាច្រើនមានជាអាទិ៍៖ បញ្ហាសេដ្ឋកិច្ចជាតិធ្លាក់ចុះ និងបញ្ហាចំណាយថវិកាទៅលើគម្រោងនានា។
គម្រោងចែកលុយឌីជីថលម្នាក់មួយម៉ឺនបាតគឺជាកិច្ចការដ៏ធំដែលត្រូវចំណាយថវិកាជាតិជាង១៤ពាន់លានដុល្លារ។ ប្រភពខ្លះឱ្យដឹងថាលោកថាក់ស៊ីនកាលពីប៉ុន្មានថ្ងៃមុននេះបានប្រាប់ទៅមន្ត្រីជាន់ខ្ពស់របស់គណបក្សភឿថៃថាគួរតែពិចារណាបោះបង់ចោលគម្រោងនេះវិញល្អជាង។ លោកថ្លែងដូច្នេះនៅក្នុងកិច្ចប្រជុំសម្ងាត់កាលពីយប់ថ្ងៃពុធនៅផ្ទះរបស់លោកបន្ទាប់ពីតុលាការធម្មនុញ្ញដកតំណែងលោកសេដ្ឋា។ នេះបើយោងតាមការចុះផ្សាយរបស់កាសែតដឹណេសិនរបស់ប្រទេសថៃ (The Nation)៕
ចែករំលែកព័តមាននេះ