រាជធានីភ្នំពេញ ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានផ្ញើសារជូនបងប្អូនប្រជាពលរដ្ឋនៅក្នុងរាជធានីភ្នំពេញទាំងអស់ សូមជឿជាក់លើរាជរដ្ឋាភិបាល ដោយអាជ្ញាធរ…
រាជធានីភ្នំពេញ ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានផ្ញើសារជូនបងប្អូនប្រជាពលរដ្ឋនៅក្នុងរាជធានីភ្នំពេញទាំងអស់ សូមជឿជាក់លើរាជរដ្ឋាភិបាល ដោយអាជ្ញាធរ និងកងកម្លាំង បានយកអស់កម្លាំងកាយចិត្ត ដើម្បីបម្រើផលប្រយោជន៍ប្រជាពលរដ្ឋ។ ជាក់ស្តែងនៅពេលនេះ កម្លាំងមួយចំនួនធំ កំពុងការពារសន្តិសុខ សុវត្ថិភាព ជូនប្រជាពលរដ្ឋ ក្នុងការទប់ស្កាត់ក្រុមអគតិ និងពួកជ្រុលនិយម ដែលគ្រោងនឹងរៀបចំធ្វើបាតុកម្ម ដើម្បីផ្តួលរំលំរាជរដ្ឋាភិបាលស្របច្បាប់ នាថ្ងៃទី១៨ ខែសីហាខាងមុខនេះ ហើយកម្លាំងមួយចំនួនទៀត បានយកមកប្រើប្រាស់ ក្នុងការបង្ការ និងទប់ស្កាត់ជំងឺគ្រុនឈាមទៅតាមការណែនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្តី នៃព្រះរាជាណាចក្រកម្ពុជា ។
ការផ្ញើសារបែបនេះ បានធ្វើឡើងនារសៀលថ្ងៃទី១៧ ខែសីហានេះ ខណៈលោកអញ្ជើញជាអធិបតីក្នុងពិធីបើកយុទ្ធនាការបាញ់ថ្នាំ សម្លាប់ មូសតាម ខណ្ឌ សង្កាត់ ភូមិ និងសហគមន៍ ក្នុងរាជធានីភ្នំពេញ នៅសាលារាជធានីភ្នំពេញ ។
លោក ឃួង ស្រេង ក៏បានណែនាំកងពលតូចលេខ៧០ និងមន្ទីរសុខាភិបាលរាជធានីភ្នំពេញ ដែលមានតួនាទីក្នុងការបាញ់ថ្នាំសម្លាប់មូស សូមបាញ់នៅតំបន់ ដែលមានហានិភ័យខ្ពស់ ដើម្បីបង្ការទប់ស្កាត់ជំងឺគ្រុនឈាម ជូនប្រជាពលរដ្ឋ នៅមូលដ្ឋានរាជធានីភ្នំពេញ ។
លោកអភិបាល បន្តថា កងពលតូចលេខ៧០ និងមន្ទីរសុខាភិបាលរាជធានីភ្នំពេញ សូមបាញ់ថ្នាំសម្លាប់មូសនេះ អោយបានគ្រប់ទីកន្លែងនៅក្នុងមូលដ្ឋានរាជធានីភ្នំពេញ ពិសេសនៅតំបន់ ដែលមានហានិភ័យខ្ពស់ ដើម្បីបង្ការទប់ស្កាត់ជំងឺគ្រុនឈាម ជូនប្រជាពលរដ្ឋ ។
លោកលើកឡើងទៀតថា ការងារបាញ់ថ្នាំសម្លាប់មូសនេះ មើលទៅតូចទេ តែវាបានផ្តល់ផលប្រយោជន៍ច្រើនសំរាប់ប្រជាពលរដ្ឋ ពោលគឺបាញ់ថ្នាំសម្លាប់មូស អាចបង្ការទប់ស្កាត់ជំងឺគ្រុនឈាម បើយើងមិនបានបង្ការទប់ស្កាត់ទេ វានឹងធ្វើអោយក្មេងមានជំងឺគ្រុនឈាម កាលណាកើតមានជំងឺគ្រុនឈាមលើកូនរបស់ខ្លួនហើយ យើងត្រូវខាតបង់ពេលវេលាក្នុងការមើលថែកូនផង និងត្រូវខាតបង់លុយកាក់ថែមទៀត ។
ក្នុងនោះដែរលោកវេជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញ បានបញ្ជាក់ថា សម្រាប់ថ្ងៃដំបូង នៃយុទ្ធនាការបាញ់ថ្នាំសម្លាប់មូសនេះ ក្រុមការងារបានបែងចែកជាក្រុមចុះបាញ់នៅ ក្នុងមូលដ្ឋានខណ្ឌចំនួន ៧ រួមមាន៖ ខណ្ឌមានជ័យ, ខណ្ឌសែនសុខ, ខណ្ឌពោធិសែនជ័យ, ខណ្ឌឬស្សីកែវ, ខណ្ឌទួលគោក, ខណ្ឌបឹងកេងកង និងខណ្ឌដូនពេញ ៕
ចែករំលែកព័តមាននេះ