អាជ្ញាធរភ្នំពេញ ត្រៀមកម្លាំងរួចជាស្រេច មិនឲ្យចលនាជ្រុលនិយមកើតមានជាដាច់ខាត
រាជធានីភ្នំពេញ ៖ ក្នុងកិច្ចប្រជុំសាមញ្ញ លើកទី៣ របស់ក្រុមប្រឹក្សារាជធានីភ្នំពេញ ឆ្នាំទី១ អាណត្តិទី៤ នាព្រឹកថ្ងៃទី១៥ ខែសីហា ឆ្នាំ២០២៤…
រាជធានីភ្នំពេញ ៖ ក្នុងកិច្ចប្រជុំសាមញ្ញ លើកទី៣ របស់ក្រុមប្រឹក្សារាជធានីភ្នំពេញ ឆ្នាំទី១ អាណត្តិទី៤ នាព្រឹកថ្ងៃទី១៥ ខែសីហា ឆ្នាំ២០២៤ ក្រោមអធិបតីភាពលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក កើត ឆែ អភិបាលរងរាជធានី តំណាងអោយលោក ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ លោក កើត ឆែ អភិបាល រងរាជធានីភ្នំពេញ បានលើកឡើងថា ៖ ចំពោះការងារទប់ស្កាត់បទល្មើសនានា ជាមួយការងារថែរក្សាសន្តិសុខ សុវត្ថិភាពជូនប្រជាពលរដ្ឋ ក្នុងនាមគណៈបញ្ជាការឯកភាពរាជធានី បានធ្វើឡើងជាប្រចាំ និងទទួលបានភាពកក់ក្តៅពីប្រជាពលរដ្ឋ។ ចំពោះក្រុមអគតិ និងពួកជ្រុលនិយម ដែលគ្រោងនឹងរៀបចំធ្វើបាតុកម្មប្រឆាំងរាជរដ្ឋាភិបាលស្របច្បាប់ នាថ្ងៃទី១៨ ខែសីហា ខាងមុខនេះ គណៈបញ្ជាការឯកភាពរាជធានីភ្នំពេញ បានត្រៀមកម្លាំងរួចជាស្រេចហើយ គឺមិនអោយកើតមានចលនាជ្រុលនិយមខាងលើនេះ កើតមានជាដាច់ខាត ដោយធានាថា កិច្ចការពារសន្តិសុខ សុវត្ថិភាព និងការរក្សាស្ថេរភាពនយោបាយ ធានាបាន១០០ភាគរយ ។
ចំពោះការងារបង្ការ ទប់ស្កាត់គ្រោះធម្មជាតិ លោក កើត ឆែ បានលើកឡើងថា នឹងបន្តបំរើប្រជាពលរដ្ឋអោយអស់លទ្ធភាព ក្នុងការបង្ការ ទប់ស្កាត់គ្រោះធម្មជាតិ ដូចជាការបាក់ដើមឈើ រលំប៉ាណូ និងគ្រោះលិចលង់ ដោយជំនន់ទឹកភ្លៀង ជាដើម ។
ក្នុងកិច្ចប្រជុំនោះលោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានមានប្រសាសន៍លើកឡើងថា ក្នុងនាមសមាជិកក្រុមប្រឹក្សារាជធានីភ្នំពេញ ត្រូវយល់អោយបានច្បាស់ ពីតួនាទី និងភារកិច្ចរបស់ខ្លួន។ ក្រុមប្រឹក្សារាជធានីភ្នំពេញ និងរដ្ឋបាលរាជធានីភ្នំពេញ មានតួនាទី និងភារកិច្ចរបស់ខ្លួនខុសគ្នាដាច់ ។
លោកបញ្ជាក់ថា ក្រុមប្រឹក្សារាជធានីភ្នំពេញ គ្មានការងារគ្រប់គ្រង សន្តិសុខ សណ្តាប់ធ្នាប់ ឬបញ្ជាកងកម្លាំងអ្វីឡើយ។ ក្រុមប្រឹក្សា មានសិទ្ធិអំណាចត្រឹមតែលើកឡើងជាសំណើរទៅរដ្ឋបាលរាជធានីភ្នំពេញ ពីចំណុចខ្វះខាត ដើម្បីអោយរដ្ឋបាលរាជធានី ឬរដ្ឋបាលខណ្ឌ កែលម្អរ និងអនុវត្តតាមតែប៉ុណ្ណោះ។ តែសម្រាប់រដ្ឋបាលរាជធានីភ្នំពេញវិញ មានតួនាទី ភារកិច្ចច្រើន ជាអ្នករក្សាសន្តិសុខ សណ្តាប់ធ្នាប់ ជូនប្រជាពលរដ្ឋ អាចបញ្ជាកងកម្លាំងគ្រប់ប្រភេទបាន ក្នុងនាមជាប្រធានគណៈបញ្ជាការឯកភាព និងបំពេញការងាររដ្ឋបាល ជាច្រើនទៀត ។
ជាមូយគ្នានេះដែរ សមាជិកក្រុមប្រឹក្សារាជធានីភ្នំពេញ ក៏បានលើកឡើងថា រដ្ឋបាលរាជធានីភ្នំពេញ បានអនុវត្តការងារយ៉ាងល្អ ក្នុងការរក្សាសន្តិសុខ សុវត្ថិភាព ជូនប្រជាពលរដ្ឋនាពេលកន្លងមកនេះ។ សូមអោយបន្តការងារនេះ អោយកាន់តែល្អ ពិសេសទប់ស្កាត់អោយបានចំពោះ ចលនា ពួកជ្រុលនិយម ដែលគ្រោងនឹងរៀបចំធ្វើបាតុកម្ម ប្រឆាំងរាជរដ្ឋាភិបាលស្របច្បាប់ នាថ្ងៃទី១៨ ខែសីហា ខាងមុខនេះ។ បន្ថែមពីនេះ សមាជិកក្រុមប្រឹក្សារាជធានី ក៏បានស្នើអោយរដ្ឋបាលរាជធានី បង្ការ ទប់ស្កាត់គ្រោះអគ្គិភ័យ និងគ្រោះធម្មជាតិផ្សេងៗ ៕
ចែករំលែកព័តមាននេះ