រាជធានីភ្នំពេញ ៖ សម្ដេចធិបតី ហ៊ុន ម៉ាណែត នាយករដ្ឋមន្ដ្រីកម្ពុជាបានអះអាងថា រាជរដ្ឋាភិបាលកម្ពុជា បានជឿជាក់ថា ប្រជាពលរដ្ឋខ្មែរដ៏ច្រើនលើសលប់មិនចង់ឃើញស្ថានភាពបែកបាក់ ដុតប្រទេសដូចនៅបង់ក្លាដេស…
រាជធានីភ្នំពេញ ៖ សម្ដេចធិបតី ហ៊ុន ម៉ាណែត នាយករដ្ឋមន្ដ្រីកម្ពុជាបានអះអាងថា រាជរដ្ឋាភិបាលកម្ពុជា បានជឿជាក់ថា ប្រជាពលរដ្ឋខ្មែរដ៏ច្រើនលើសលប់មិនចង់ឃើញស្ថានភាពបែកបាក់ ដុតប្រទេសដូចនៅបង់ក្លាដេស នៅពេលនេះ រហូតដល់ពេលអនាគត នៅប្រទេសកម្ពុជា ។
ការលើកឡើងរបស់ សម្ដេចនាយករដ្ឋមន្ដ្រី បន្ទាប់ពីពេលថ្មីៗនេះ មានក្រុមប្រឆាំងជ្រុលនិយមមួយក្ដាប់តូចនៅក្រៅប្រទេសបានអំពាវនាវ និងបំផុសញុះញង់ឲ្យប្រជាពលរដ្ឋ និងកងកម្លាំងប្រដាប់អាវុធធ្វើការបះបោរប្រឆាំងនឹងរាជរដ្ឋាភិបាលស្របច្បាប់កើតចេញពីការបោះឆ្នោត ក្នុងចេតនាបំបែកបំបាក់ និងបំផ្លិចបំផ្លាញប្រទេសជាតិ ។
ថ្លែងក្នុងពិធីជួបសំណេះសំណាលជាមួយអាចារ្យ អាចារិនី ទូទាំងប្រទេស លើកទី៩ ចំនួន១០០០នាក់ នាព្រឹកថ្ងៃទី១៥ សីហា ឆ្នាំ២០២៤ នៅវិទ្យាស្ថានជាតិអប់រំ សម្ដេចធិបតីរំលឹកអ្នកដែលចង់ឲ្យកម្ពុជា ដូចនឹងប្រទេសបង់ក្លាដេសកុំធ្វើឲ្យសោះ មិនមានផលចំណេញ ឡើយ ចំពោះប្រទេសជាតិ និងប្រជាជន ។ សម្ដេចនាយករដ្ឋមន្ត្រីបានលើកឡើងថា ផ្ទុយទៅវិញមានតែភាពវិនាសកម្ម ការវា.យប្រហារគ្នាបង្កជាភាពវឹកវរដល់ប្រទេសជាតិតែប៉ុណ្ណោះ ។
ជាមួយគ្នានោះដែរ សម្ដេចធិបតី បានគូសបញ្ជាក់ថា៖«ខ្ញុំសូមបញ្ជាក់ថា រាជរដ្ឋាភិបាល ជឿថា ប្រជាពលរដ្ឋខ្មែរច្រើនលើសលប់ មិនចង់ឃើញស្ថានភាពបែកបាក់ដុតប្រទេសបែបនេះ (ដូចនៅបង់ក្លាដេស) នៅពេលនេះរហូតដល់ពេលអនាគតនៅក្នុងប្រទេសកម្ពុជា» ។
សម្ដេចធិបតី ហ៊ុន ម៉ាណែត បន្ដថា ចំពោះអ្នកជជែកគ្នាតាមបណ្ដាញសង្គមជជែង ក៏ជជែកចុះ ប៉ុន្ដែបញ្ចេញមតិដោយសីលធម៌ កុំធ្វើអ្វីដែលហួសព្រំដែន ដែលនាំឲ្យឈានទៅដល់ដូចនៅបង់ក្លាដេស ឬអង់គ្លេស ដែលដុតប្រទេសទាំងមូល ហើយនាំទៅដល់ការប៉ះពាល់ដល់សេដ្ឋកិច្ច ប្រជាពលរដ្ឋ និងសង្គមជាតិទាំងមូលផងដែរ ។
ពាក់ព័ន្ធនឹងករណីរឿងតំបន់អភិវឌ្ឍន៍ត្រីកោណCLVសម្តេចធិបតី ហ៊ុន ម៉ាណែតនាយករដ្ឋមន្ត្រីបានលើកឡើងថា មានប្រជាពលរដ្ឋបីក្រុមលើកទស្សនៈផ្សេងគ្នា ក្នុងនោះមាន៖ ក្រុមទី១. អ្នកមានកង្វល់ និងអ្នកសុំឲ្យដក កិច្ចព្រមព្រៀងអភិវឌ្ឍន៍តំបន់ត្រីកោណ ។ ក្រុមទី២.អ្នកយល់តម្លៃឲ្យមានការអភិវឌ្ឍ ។ ក្រុមទី៣. អ្នកដែលស្ងាត់ស្ងៀម ប៉ុន្តែជាក្រុមធំបំផុតនៅកណ្តាល ដែលនិយាយត្រូវមានការធានាថា ខេត្តទាំងបួនជាប់តំបន់អភិវឌ្ឍន៍ត្រីកោណ (ក្រចេះ ស្ទឹងត្រែង រតគិរី និងមណ្ឌលគិរី) មិនបាត់ទឹកដី មិនបាត់បង់អធិបតេយ្យភាព និងធានាឲ្យមានការអភិវឌ្ឍខេត្តទាំងបួន និងមិនចង់ឃើញខ្មែរបែកបាក់គ្នា ។
សម្តេចធិបតីបានបន្តថា ៖ បើតាមការស្ទង់មតិមានក្រុមទី៣ គឺជាអ្នកដែលធំជាងគេ ព្រោះថា ទោះដក ឬមិនដកវាមិនបាត់នោះទេ តែបើមានចេតនាធ្វើឲ្យបាត់ តែវាគង់តែបាត់ ។ វាមិនអាស្រ័យលើកិច្ចសហប្រតិបត្តិការហ្នឹងទេ ។ សម្តេចនាយករដ្ឋមន្ត្រីបានលើកឡើងថា រាជរដ្ឋាភិបាល គោរពតាមការគំនិតក្រុមទី៣ថា មិនចង់បាត់បង់ទឹកដី និងបែកបាក់គ្នារវាងខ្មែរនឹងខ្មែរនោះទេ ៕
ចែករំលែកព័តមាននេះ