តុលាការធម្មនុញ្ញ បានរកឃើញថា លោកនាយករដ្ឋមន្ត្រីថៃ សេដ្ឋា ថាវេស៊ីន មានពិរុទ្ធពីបទ «រំលោ.ភក្រមសីលធម៌យ៉ាងធ្ងន់ធ្ងរក្នុងការតែងតាំងអតីតទណ្ឌិតឲ្យក្លាយជារដ្ឋមន្ត្រីទទួលបន្ទុកទីស្តីការគណរដ្ឋមន្ត្រី» ហើយសម្រេចបណ្តេញលោកចេញពីតំណែងដែលកាន់កាប់មិនដល់មួយឆ្នាំ។ សារព័ត៌មានថៃធំៗ បានរាយការណ៍ថា…
តុលាការធម្មនុញ្ញ បានរកឃើញថា លោកនាយករដ្ឋមន្ត្រីថៃ សេដ្ឋា ថាវេស៊ីន មានពិរុទ្ធពីបទ «រំលោ.ភក្រមសីលធម៌យ៉ាងធ្ងន់ធ្ងរក្នុងការតែងតាំងអតីតទណ្ឌិតឲ្យក្លាយជារដ្ឋមន្ត្រីទទួលបន្ទុកទីស្តីការគណរដ្ឋមន្ត្រី» ហើយសម្រេចបណ្តេញលោកចេញពីតំណែងដែលកាន់កាប់មិនដល់មួយឆ្នាំ។ សារព័ត៌មានថៃធំៗ បានរាយការណ៍ថា សេចក្តីសម្រេចកាលពីថ្ងៃពុធ ក៏បញ្ចប់មុខតំណែងទាំងអស់នៅក្នុងគណៈរដ្ឋមន្ត្រី ប៉ុន្តែរដ្ឋមន្ត្រីនឹងបន្តនៅក្នុងសមត្ថកិច្ចជារដ្ឋាភិបាលចាំផ្ទះ។
តាមសេចក្តីសម្រេចនេះ លោកឧបនាយករដ្ឋមន្ត្រី ភូមិថាម វីចាយ៉ាឆៃ (Phumtham Wechayachai) នឹងកាន់តំណែងជានាយករដ្ឋមន្ត្រីស្តីទី រហូតដល់នាយករដ្ឋមន្ត្រី អាចត្រូវបានជ្រើសរើសដោយសភាតំណាងរាស្ត្រ។
លោក សេដ្ឋា បានប្រាប់អ្នកសារព័ត៌មាននៅវិមានរដ្ឋាភិបាលថា លោកគោរពការសម្រេចរបស់តុលាការ បើទោះបីជាវាមិនមែនជាអ្វីដែលលោកបានសង្ឃឹមក៏ដោយ។ លោកបានថ្លែងថា «ខ្ញុំមិនមានសិទ្ធិអំណាចណាមួយនៅសេសសល់ទេ»។ «អំណាចឥឡូវ នៅជាមួយនាយករដ្ឋមន្ត្រីចាំផ្ទះ»។
លោកបាននិយាយថា ប្រសិនបើលោក ភូមិថាម មិនអាចកាន់តួនាទីជានាយករដ្ឋមន្ត្រីចាំផ្ទះបានទេ ឧបនាយករដ្ឋមន្ត្រីមួយរូបទៀត គឺ លោក ស៊ូរីយ៉ា ជម្រុងរងគិត (Suriya Juangroongruangkit ) នឹងចូលកាន់តំណែងជំនួស។
ការសម្រេចបណ្តេញលោក សេដ្ឋា និងគណរដ្ឋមន្ត្រីរបស់លោក គឺធ្វើឡើងដោយសេចក្តីសម្រេចរបស់ចៅក្រម៩រូប នៅក្នុងសម្លេង៥ទល់នឹង៤ ក្រោយពេលដែលអតីតសមាជិកសភាចំនួន៤០រូប បានដាក់ពាក្យបណ្ដឹង ប្រឆាំងលោក ។
លោកសេដ្ឋា ត្រូវបានជ្រើសរើសជានាយករដ្ឋមន្ត្រីទី៣០ របស់ប្រទេសថៃ កាលពីថ្ងៃទី២២ ខែសីហា ឆ្នាំមុន ដោយមានសម្លេងគាំទ្រ ៤៨២សំឡេង ប្រឆាំង១៦៥ និងអនុប្បវាទ៨១សម្លេង ខណៈដែលរដ្ឋាភិបាលដែលលោកដឹកនាំ គឺរដ្ឋាភិបាលចម្រុះ ១១ គណបក្ស មានសម្លេងសរុប៣១៤អាសនៈ នៅក្នុងសភា។
ចែករំលែកព័តមាននេះ