រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី បានស្នើឲ្យ រដ្ឋមន្ត្រីក្រសួងធនធានទឹក ត្រូវយកចិត្តទុកដាក់ក្នុងការជ្រើសរើសប្រជាពលរដ្ឋនៅមូលដ្ឋាន ដើម្បីចូលធ្វើការ…
រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី បានស្នើឲ្យ រដ្ឋមន្ត្រីក្រសួងធនធានទឹក ត្រូវយកចិត្តទុកដាក់ក្នុងការជ្រើសរើសប្រជាពលរដ្ឋនៅមូលដ្ឋាន ដើម្បីចូលធ្វើការ នៅក្នុងការដ្ឋានសំណង់ទំនប់ស្ទាក់ទឹកទាំងពីរ (ទំនប់កំពង់គោ និងទំនប់ ស្ទឹងស្លាប់) ។
ការលើកឡើងរបស់សម្តេចធិបតី នាយករដ្ឋមន្ត្រី ខណៈសម្តេចបានចុះផ្ទាល់ជួបជាមួយប្រជាពលរដ្ឋ ដែលស្ថិតនៅក្នុងតំបន់សាងសង់ទំនប់ទឹកទាំងពីរ កាលពីថ្ងៃទី១០ ខែសីហា ឆ្នាំ២០២៤ ។
យោងតាមបណ្តាញសង្គមហ្វេសប៊ុករបស់សម្តេចធិបតីនាយករដ្ឋមន្ត្រី នៅថ្ងៃទី១២ ខែសីហា ឆ្នាំ២០២៤ យ៉ាងដូច្នេះថា ៖ ជួបលោកពូ និងក្មួយស្រីរបស់គាត់ដោយចៃដន្យ ពេលចុះពីលើទូក។ អរគុណ ពូនិងប្អូនស្រី ដែលបានអញ្ជើញខ្ញុំ និងក្រុមការងារចូលលេងក្នុងផ្ទះ ដែលផ្ដល់ឱកាសឲ្យខ្ញុំបានជជែក លេងជាមួយ និងបានសួរនាំអំពីស្ថានភាពទឹក ក៏ដូចជាការប្រកបរបរចិញ្ចឹមជីវិតរបស់ប្រជាពលរដ្ឋ នៅទីនេះ ក្នុងពេលបច្ចុប្បន្ន និងពីមុនមក ។
សម្តេចបានលើកឡើងថា ជាមួយគ្នានេះ ខ្ញុំក៏បានជម្រាបជូនគាត់អំពី ផែនការមួយចំនួនរបស់រាជរដ្ឋាភិបាល ដែលពាក់ព័ន្ធនឹងភូមិស្រុករបស់គាត់រួមទាំងការកសាងទំនប់ ស្ទាក់ទឹកកំពង់គោ ដែលនៅជិតនោះ ក៏ដូចគម្រោងធ្វើឲ្យប្រសើរឡើង នូវផ្លូវឆ្លងកាត់ភូមិរបស់គាត់នៅពេលខាងមុខ ។
សម្តេចធិបតី ហ៊ុន ម៉ាណែត បានគូសបញ្ជាក់ថា ៖ «បន្ថែមលើនេះ ខ្ញុំបានផ្តល់គោលការណ៍ណែនាំទៅឯកឧត្តម រដ្ឋមន្ត្រីក្រសួងធនធានទឹក សូមឲ្យផ្តល់ការយកចិត្តទុកដាក់ក្នុងការជ្រើសរើសប្រជាពលរដ្ឋនៅមូលដ្ឋាន ដើម្បីចូលធ្វើការនៅក្នុងការដ្ឋានសំណង់ ទំនប់ស្ទាក់ទឹក ទាំងពីរ (ទំនប់កំពង់គោ និងទំនប់ស្ទឹងស្លាប់)» ។
សូមជម្រាបថា ការដ្ឋានសាងសង់ទំនប់ស្ទាក់ទឹកស្ទឹងស្លាប់ នៅឃុំត្បូងក្រពើ ស្រុកសន្ទុក ខេត្តកំពង់ធំ។ ទំនប់ស្ទាក់ទឹកទាំងពីរនេះពេលសាងសង់រួចរាល់អាច នឹងធានាទឹកសម្រាប់ ការស្រោចស្រពផ្ទៃដីស្រែចំការរបស់ប្រជាពលរដ្ឋប្រមាណជាង១២ ម៉ឺនហិចតានៅរដូវប្រាំង ។ ទំនប់ស្ទាក់ទឹកស្ទឹងស្លាប់ ក៏នឹងដើរតួនាទីក្នុងការពង្វាងទឹកធ្លាក់ពីស្ទឹងជីនិត ប៉ែកខាងលើ នៃខេត្តព្រះវិហារចូលទៅស្ទឹងសែន ដែលនឹងជួយកាត់បន្ថយហារនិភ័យ នៃការលិចលង់ ក្រុងស្ទឹងសែន និងតំបន់ជុំវិញ ៕
ចែករំលែកព័តមាននេះ