ប្រជានេសាទនៅក្រុងព្រះសីហនុ និងឃុំថ្មសរ ស្រុកបទុំសារគរ ខេត្តកោះកុង ព្រួយបារម្ភពីផលនេសាទអាចធ្លាក់ចុះ ខណៈទូកនេសាទខ្នាតយក្សច្រើនគ្រឿងប្រើឧបករណ៍នេសាទខុសច្បាប់ពេញផ្ទៃសមុទ្រ សមត្ថកិច្ចជំនាញពាក់ពន្ធ័សំងំដេកលង់លក់ដូចត្រូវថ្នាំសណ្តំ ដែលករណីបែបនេះ កើតមានយូរមកហើយដែរ អត់មានអ្វីប្លែកឡើយ…
ប្រជានេសាទនៅក្រុងព្រះសីហនុ និងឃុំថ្មសរ ស្រុកបទុំសារគរ ខេត្តកោះកុង ព្រួយបារម្ភពីផលនេសាទអាចធ្លាក់ចុះ ខណៈទូកនេសាទខ្នាតយក្សច្រើនគ្រឿងប្រើឧបករណ៍នេសាទខុសច្បាប់ពេញផ្ទៃសមុទ្រ សមត្ថកិច្ចជំនាញពាក់ពន្ធ័សំងំដេកលង់លក់ដូចត្រូវថ្នាំសណ្តំ ដែលករណីបែបនេះ កើតមានយូរមកហើយដែរ អត់មានអ្វីប្លែកឡើយ ។
យោងតាមការបង្ហើបឲ្យដឹងពីប្រជានេសាទជាច្រើននាក់ នៅចំណតទូកចំណុចទំនប់រលក ស្ថិតក្នុងភូមិ៣ ក្រុង/ខេត្តព្រះសីហនុ ក៏ដូចជាសេចក្តីរាយការណ៍ដែលទទួលបានពីប្រជានេសាទនៅឃុំថ្មសរ ស្រុកបូទុមសាគរ ខេត្តកោះកុង បានឲ្យដឹងថា ថ្មីៗកន្លងមកនេះ សកម្មភាពបទល្មើសទូកនេសាទប្រភេទខ្នាតយក្សប្រើប្រាស់ឧបករណ៍ខុសច្បាប់ជាច្រើនគ្រឿង កំពុងកំរើកឡើងយ៉ាងសកម្មនៅតំបន់ទឹករ៉ាក់ក្នុងទឹកដីឃុំថ្មស ឆកឆ្នេរសមុទ្រកំពង់សោមក្នុងស្រុកស្ទឹងហាវ ។
ប្រភពខាងលើបានបន្តឲ្យដឹងទៀតថា នៅក្នុងសកម្មភាពនេសាទសមុទ្រដោយទូកប្រភេទខ្នាតយក្សប្រើប្រាស់ឧបករណ៍ខុសច្បាប់ដែលច្បាប់ជលផលបានហាមឃាត់ មកអូសយកផលនេសាទខ្យងសរដែលកើតឡើងនៅក្នុងដែនសមុទ្រទឹករ៉ាក់ ឆកសមុទ្រជាប់ព្រំប្រទល់ឃុំថ្មសរ ស្រុកបូទុមសាគរ ខេត្តកោះកុងនិងស្រុកស្ទឹងហាវ ខេត្តព្រះសីហនុ ហើយទូកប្រភេទខ្នាតយក្សទាំងអស់នេះ ចេញមកមកពីស្រុកស្ទឹងហាវ ខេត្តព្រះសីហនុ មកធ្វើការនេសាទទាំងយប់ទាំងថ្ងៃដោយសេរី ។ ហើយក្រៅពីនេសាទខ្យងសរក្នុងនោះ មានទាំងទូកប្រភេទខ្នាតយក្សអូសគូរ និងទូកប្រភេទខ្នាតយក្សអូសមងហោះ នៅពេលយប់ចាប់ពីរម៉ោងប្រមាណ៨យប់អូសរហូតដល់ម៉ោង៤ ឬម៉ោង៥ទៀបភ្លឺ ទើបលើកមងត្រឡប់ទៅវិញ ។
ប្រជានេសាទខាងលើ បានបន្តឲ្យដឹងទៀតថា នៅមានទូកនេសាទដែលប្រើប្រាស់ឧបករណ៍ខុសច្បាប់ដែលកំពុងតែធ្វើការនេសាទយ៉ាងគរឃ្លើនមិនមានការរំខានពីសមត្ថកិច្ចជំនាញពាក់ពន្ធ័មានដូចជាទូកនេសាទប្រើប្រាស់លបប្រើសមុខ១០០ ឬហៅលបកន្ទុយកណ្ដុរ, ទូកឌុនមកធ្វើការនេសាទនៅតំបន់ទឹករាក់ដែលច្បាប់បានហាមឃាត់។
ហើយសកម្មភាពទាំងអស់ខាងលើនេះ មានកើតឡើងជាយូរមកហើយដោយសារតែសមត្ថកិច្ចមានជាអាថ៌ជំនាញជលផល, អង្គភាពនគរបាលបង្ក្រាបទល្មើសនៅលើផ្ទៃសមុទ្រ,អគ្គលេខាធិការដ្ឋាននៃគណៈកម្មាធិការជាតិសន្តិសុខលម្ហរសមុទ្រហាក់បីដូចជាមិនមានការអើពើសោះក្នុងសកម្មភាពបង្ការទប់ស្កាត់ពីបទល្មើសនេសាទដូចបានរៀបរាប់ខាងលើ ពួកគាត់បានដាក់ការសង្ស័យថា មានការជាប់ជំពាក់ វាក់វឹនជាមួយគ្នាចាក់ស្រេះ ក្នុងការដាក់ខែតាមទូក តូចទូកធំក្នុងមួយទូកៗឲ្យទៅសមត្ថកិច្ចជំនាញពាក់ព័ន្ធក្នុងសមុទ្រ មួយខែៗរាប់រយរាប់ពាន់ដុល្លារ ។
ប្រភពខាងលើ បានបញ្ជាក់ឲ្យដឹងទៀតថា ទូកអូសខ្យងធំៗខ្នាតយក្សប្រព្រឹត្តនៅតំបន់ទឹករ៉ាក់ ហើយទូកធំៗទាំងអស់នេះមកពីស្ទឹងហាវ ខេត្តព្រះសីហនុ អូសទាំងយប់ ទាំងថ្ងៃ ធ្វើឲ្យអ្នកនេសាទតូចៗ ជាលក្ខណៈគ្រួសារពិបាកមករកស៊ីនៅទីនោះ ដោយសារទូកអូសខ្យងខ្នាតយក្សនេះ ។ ហើយទូកអូសគូរ និងទូកមងហោះ ជាបទល្មើសនេសាទខុសច្បាប់ទាំងស្រុង ដែលបំផ្លិចបំផ្លាញធនធានមនុសមុទ្រ ស្ទើរអស់ទៅហើយសព្វថ្ងៃនេះ ។
ដោយឡែក លោក ឯម ភា នាយខណ្ឌរដ្ឋបាលជលផលកំពង់សោមនិងលោកនេន ចំរើន ប្រធានមន្ទីរកសិកម្មខេត្តព្រះសីហនុ ក៏ដូចជាសមត្ថកិច្ចពាក់ពន្ធ័ខាងលើ អ្នកសារព័ត៌មានយើងមិនអាចធ្វើការទំនាក់ទំនងតាមប្រព័ន្ធតេក្រាមបានទេគិតត្រឹមព្រឹកទី១២ ខែសីហា ឆ្នាំ២០២៤ នេះ ។
ចែករំលែកព័តមាននេះ