ខេត្តបាត់ដំបង ៖ ឈ្មួញគ្រឿងញៀនម្នាក់ រួមជាមួយវត្ថុតាង(គ្រឿងញៀន) ដ៏ច្រើនសន្ធឹកសន្ធាប់ ត្រូវបានមន្ត្រីការិយាល័យជំំនាញនៃស្នងការខេត្តកសាងសំណុំរឿងបញ្ជូនទៅតុលាការ កាលពីរសៀលថ្ងៃទី១១ សីហា ក្រោយពីបញ្ចប់ការសួរនាំ ។…
ខេត្តបាត់ដំបង ៖ ឈ្មួញគ្រឿងញៀនម្នាក់ រួមជាមួយវត្ថុតាង(គ្រឿងញៀន) ដ៏ច្រើនសន្ធឹកសន្ធាប់ ត្រូវបានមន្ត្រីការិយាល័យជំំនាញនៃស្នងការខេត្តកសាងសំណុំរឿងបញ្ជូនទៅតុលាការ កាលពីរសៀលថ្ងៃទី១១ សីហា ក្រោយពីបញ្ចប់ការសួរនាំ ។ នេះបើតាមសេចក្ដីរាយការណ៍ពីមន្ត្រីជំនាញ ។
លោក សុខ និមល ស្នងការរងទទូលផែនគ្រឿងញៀនបានប្រាប់កោះសន្តិភាពថា ជនសង្ស័យឈ្មោះឈួម សុខវណ្នី ហៅឃ្លោក ភេទប្រុស អាយុ៣៧ឆ្នាំ ត្រូវបានចាប់ខ្លួនពីបទ«ជួញដូរគ្រឿងញៀន ដោយខុសច្បាប់» ហើយពេលនេះ ត្រូវបានមន្ត្រីការិយាល័យជំនាញ កសាងសំណុំរឿងបញ្ជូនទៅកាន់សាលាដំបូងខេត្តហើយ កាលពីរសៀលថ្ងៃទី១១ សីហា ជាមួយនឹងវត្ថុតាងថ្នាំញៀនប្រភេទមេតំហ្វេតាមីន (WY) ជាង១៥,៩០០គ្រាប់ រួមនឹងវត្ថុតាងពាក់ព័ន្ធមួយចំនួនទៀត ។
សូមបញ្ជាក់ថា ឈ្មួញគ្រឿងញៀនឈ្មោះ ឈួម សុខវណ្នី ហៅឃ្លោកនេះ ត្រូវបានកម្លាំងផ្នែកប្រឆាំងគ្រឿងញៀននៃអធិការក្រុងបាត់ដំបងឃាត់ខ្លួន កាលពីយប់ថ្ងៃទី០៧ សីហា នៅភូមិអូរតាគាំ១ សង្កាត់ទូលតាឯក ក្រុងបាត់ដំបង ។
ជាមួយនឹងការឃាត់ខ្លួនជនម្នាក់នេះ កម្លាំងជំនាញដកហូតបានវត្ថុតាងជាច្រើន ។ ដូចជា ១-ថ្នាំញៀនប្រភេទមេតំហ្វេតាមីន (យ៉ាម៉ា ) ចំនួន១៩៧៤គ្រាប់ និងបំណែក០១ថង់ ទម្ងន់១៩៥៨៦ក្រាម។ ២-កាំភ្លើងខ្លី០១ដើម ម៉ាករ៉ូឡូពណ៏ទឹកប្រាក់ មានគ្រាប់ចំនួន២៥គ្រាប់ និងសំបកគ្រាប់ចំនួន០៦ ។ ៣-រថយន្តម៉ាកកូរ៉ូឡា០១គ្រឿង រួមជាមួយនឹងវត្ថុតាងពាក់ពាន់មួយចំនួនទៀត ។
ក្រោយពីសួរនាំ ជននេះ បានសារភាពទទូលស្គាល់វត្ថុតាង ទើបនៅថ្ងៃទី០៨ សីហា លោកអធិការក្រុងបាត់ដំបង និងមន្ត្រីការិយាល័យប្រឆាំងបទល្មើសគ្រឿងញៀន ដឹកនាំដោយលោក សុខ និមល ស្នងការរង បានស្នើសុំគោលការបន្តនីតិវិធី ពីលោកស្នងការខេត្ត និងលោកព្រះរាជអាជ្ញាអមសាលាដំបូងខេត្ត ធ្វើការឆែកឆេរលំនៅឋានជនសង្ស័យឈ្មោះ ឈួម សុខវណ្នី ហៅ ឃ្លោក នៅភូមិកគោ ឃុំជ្រៃ ស្រុកថ្មគោល រហូតរកឃើញថ្នាំញៀនប្រភេទមេតំហ្វេតាមីន (យ៉ាម៉ា wy) ជាច្រើនសន្ធឹកសន្ធាប់ថែមទៀត។
បើយោងតាមរបាយការណ៍របស់លោក ប៉ាន ចាន់រិទ្ធ នាយការិយាល័យប្រឆាំងបទល្មើសគ្រឿងញៀននៃស្នងការខេត្តបានឲ្យដឹងថា វត្ថុតាងដែលដកហូតបានលើកទី២ ពេលចុះឆែកឆេរលំនៅឋាន មន្ត្រីជំនាញ រឹបអូសយកបានថ្នាំញៀនប្រភេទមេតំហ្វេតាមីន (យ៉ាម៉ា wy)ចំនួន១៣,៩៩១គ្រាប់ ។
បើគិតពីវត្ថុតាងគ្រឿងញៀន ដែលដកហូតបានទាំង០២លើកសរុបចំនួន១៥,៩៦៥គ្រាប់ ។ ទោះយ៉ាងណា លោកសុខ និមល បានបញ្ជាក់ថា ពេលនេះមន្ត្រីការិយាល័យជំនាញ បានបញ្ជូនជនសង្ស័យម្នាក់នេះ ជាមួយនឹងវត្ថុតាង ទៅកាន់សាលាដំបូងខេត្ត ដើម្បីចាត់ការតាមនីតិវិធីហើយ ៕
ចែករំលែកព័តមាននេះ