រាជធានីភ្នំពេញ ៖ ជំនួសមុខឱ្យគណៈអភិបាលខណ្ឌ មន្ត្រីរាជការកងកម្លាំងប្រដាប់អាវុធគ្រប់លំដាប់ថ្នាក់នៃខណ្ឌសែនសុខ ដោយមានការចូលរួមពី លោកម៉ក់ ហុង អធិការប៉ូលិសខណ្ឌ លោករ៉ែម រតនៈ មេបញ្ជាការរងកងរាជអាវុធហត្ថ លោកមេភូមិមហាលិបខ្នង និងប្រជាពលរដ្ឋចូលរួមជាច្រើននាក់ នៅរសៀលថ្ងៃទី១០ មិថុនា
រាជធានីភ្នំពេញ ៖ ជំនួសមុខឱ្យគណៈអភិបាលខណ្ឌ មន្ត្រីរាជការកងកម្លាំងប្រដាប់អាវុធគ្រប់លំដាប់ថ្នាក់នៃខណ្ឌសែនសុខ ដោយមានការចូលរួមពី លោកម៉ក់ ហុង អធិការប៉ូលិសខណ្ឌ លោករ៉ែម រតនៈ មេបញ្ជាការរងកងរាជអាវុធហត្ថ លោកមេភូមិមហាលិបខ្នង និងប្រជាពលរដ្ឋចូលរួមជាច្រើននាក់ នៅរសៀលថ្ងៃទី១០ មិថុនា ឆ្នាំ២០១១ លោកជា ខេមា និងលោកចេង មុន្នីរ៉ា អភិបាលរងខណ្ឌសែនសុខ បានធ្វើពិធីវេទិកាសាធារណៈ ពីការអនុវត្តគោលនយោបាយភូមិ-សង្កាត់មានសុវត្ថិភាព ដោយជ្រើសរើសសង្កាត់ទឹកថ្លាជាការសាកល្បងចំនួន៦ខែផងដែរ ។
លោកជា ខេមា បានថ្លែងថា ដើម្បីអនុវត្តបានជោគជ័យតាមអនុសាសន៍របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាឱកាសមិទ្ទិងរំឭកខួបលើកទី៦៥ នៃថ្ងៃបង្កើតកងកម្លាំងនគរបាលជាតិកម្ពុជា ដែលកំណត់យកប្រធានបទ «ភូមិ-សង្កាត់មានសុវត្ថិភាព» ក្រសួងមហាផ្ទៃបានកំណត់យក «ភូមិ-សង្កាត់មានសុវត្ថិភាព» ធ្វើជាគោលនយោបាយ អាទិភាពមួយសម្រាប់កម្លាំងអនុវត្តច្បាប់។ អាជ្ញាធរមានសមត្ថកិច្ចគ្រប់លំដាប់ថ្នាក់គណបក្សនយោបាយ អង្គការក្រៅរដ្ឋាភិបាលផ្នែកឯកជន និងប្រជាពលរដ្ឋទាំងមូលរួមគ្នាពង្រឹងសន្តិសុខ សណ្តាប់ធ្នាប់សាធារណៈឱ្យបានល្អប្រសើរនៅតាមភូមិ-ឃុំទូទាំងប្រទេស។ ដើម្បីអនុវត្តគោលនយោបាយនេះឱ្យទទួលបានជោគជ័យ សាលារាជធានីភ្នំពេញ បានដាក់ចេញនូវផែនការសកម្មភាពលេខ១២ ផក ចុះថ្ងៃទី១៨ កញ្ញា ឆ្នាំ២០១០ ស្តីពីការចាត់តាំងអនុវត្តគោលនយោបាយ «ភូមិ-សង្កាត់មានសុវត្ថិភាព» ហើយបានជ្រើសរើសយកសង្កាត់ទឹកថ្លា ដើម្បីអនុវត្តសាកល្បងរយៈពេល៦ខែ ។
លោកបានបន្តថា ដើម្បីក្លាយទៅជាភូមិ-សង្កាត់មានសុវត្ថិភាព យើងត្រូវរួមគ្នាបំបាត់នូវអំពើអសកម្មចំនួន៥យ៉ាងគឺ ១-គ្មានសកម្មភាពលួចឆក់ប្លន់គ្រប់ប្រភេទ ២-គ្មានការផលិត ការចែកចាយ និងប្រើប្រាស់គ្រឿងញៀនខុសច្បាប់ ៣-គ្មានអំពើអនាចារ ការជួញដូរស្ត្រី និងកុមារ និងអំពើហិង្សាក្នុងគ្រួសារ ៤-គ្មានក្មេងទំនើង ៥-គ្មានការលេងល្បែងស៊ីសងខុសច្បាប់ ការប្រើប្រាស់អាវុធខុសច្បាប់ និងបទល្មើសគ្រប់ប្រភេទ។
លោកជា ខេមា បានបន្តទៀតថា ក្រោយពីទទួលបានគោលនយោបាយនេះក៏ដូចជាមានការណែនាំផ្ទាល់ពីសាលារាជធានី គណៈបញ្ជាការឯកភាពរដ្ឋបាលខណ្ឌសែនសុខបានប្រជុំដាក់ផែនការដល់អធិការដ្ឋានខណ្ឌ និងអង្គភាពកងរាជអាវុធហត្ថខណ្ឌ ក៏ដូចជាមូលដ្ឋានសង្កាត់ទាំង៦ ឱ្យរៀបចំផែនការសកម្មភាពជាក់ស្តែង សំដៅអនុវត្តគោលនយោបាយភូមិ-សង្កាត់មានសុវត្ថិភាពទទួលបានប្រសិទ្ធភាពខ្ពស់។ រដ្ឋបាលខណ្ឌសែនសុខ បានរៀបចំនូវលិខិតបទដ្ឋានមួយចំនួន ដើម្បីជាយន្តការសម្រាប់អនុវត្តដូចជា ផែនការលេខ០០១ ផក អណ១ ចុះថ្ងៃទី៣១ មករា ឆ្នាំ២០១១ ស្តីពីការចាត់តាំងអនុវត្ត គោលនយោបាយភូមិ-សង្កាត់មានសុវត្ថិភាព ។ ខ្លឹមសារនៃលិខិតនេះ គឺបានដាក់ចេញនូវផែនការច្បាស់លាស់ និងផែនការសកម្មភាពជាក់ស្តែងសម្រាប់គណៈបញ្ជាការឯកភាពរដ្ឋបាលខណ្ឌអនុវត្ត ។
សេចក្តីសម្រេចលេខ០០៣ សសរ អណ១ ចុះថ្ងៃទី៣១ មករា ឆ្នាំ២០១១ ស្តីពីការបង្កើតក្រុមការងារចុះអនុវត្តគោលនយោបាយភូមិ-សង្កាត់មានសុវត្ថិភាព ។ ខ្លឹមសារនៃលិខិតនេះគឺសាលាខណ្ឌបានបែងចែកគណៈអភិបាលខណ្ឌ អធិការ អធិការរង មេបញ្ជាការ មេបញ្ជាការរង កងរាជអាវុធហត្ថខណ្ឌឱ្យចុះតាមសង្កាត់ទាំង៦ ដើម្បីពង្រឹងការអនុវត្តគោលនយោបាយភូមិ-សង្កាត់មានសុវត្ថិភាពឱ្យទទួលបានលទ្ធផលខ្ពស់។
សេចក្តីសម្រេចលេខ០១១ សសរ.អណ១ ចុះថ្ងៃទី២១ មីនា ឆ្នាំ២០១១ ស្តីពីការបង្កើតក្រុមប្រឹក្សាប្រលងប្រណាំងអនុវត្តគោលនយោបាយភូមិ-សង្កាត់មានសុវត្ថិភាព។ ខ្លឹមសារនៃលិខិតនេះគឺដើម្បីបំផុសចលនាប្រលងប្រណាំង និងត្រួតពិនិត្យ បូកសរុបវាយតម្លៃ ជ្រើសរើសភូមិ-សង្កាត់ និងបុគ្គល ដែលមានលក្ខណៈសម្បត្តិ និងស្នាដៃល្អ ដើម្បីផ្តល់ការសរសើរ និងជូនរង្វាន់លើកទឹកចិត្ត។
ដើម្បីលុបបំបាត់នូវសកម្មភាពល្មើសទាំង៥យ៉ាងដែលបានរៀបរាប់ខាងលើ អាជ្ញាធរសង្កាត់-ភូមិ និងប៉ុស្តិ៍នគរបាលត្រូវអនុវត្តឱ្យបាននូវផែនការសកម្មភាពដូចតទៅ-គណៈបញ្ជាការឯកភាពសង្កាត់ ត្រូវអនុវត្តឱ្យបានរបបប្រជុំជាប្រចាំ ដើម្បីត្រួតពិនិត្យសភាពការណ៍ដាក់ចេញនូវផែនការ និងវិធានការជាក់ស្តែង ក្នុងការអនុវត្តគោលនយោបាយ «ភូមិ-សង្កាត់មានសុវត្ថិភាព» ក្នុងរង្វង់សមត្ថកិច្ចទទួលខុសត្រូវរបស់ខ្លួន ។ ពង្រឹងប៉ុស្តិ៍នគរបាលរដ្ឋបាលសង្កាត់ឱ្យមានសកម្មភាពការងារតាមស្តង់ដាអន្តរជាតិ ដើម្បីក្លាយជាស្នូលពិតប្រាកដនៃចលនាការពារភូមិ-សង្កាត់មានសុវត្ថិភាព និងក្លាយជាសេវាសាធារណៈ ដែលនៅជាប់ជាមួយប្រជាពលរដ្ឋ។
ចាត់តាំងឱ្យមានកម្លាំងប្រចាំ ការជាអចិន្ត្រៃយ៍នៅស្នាក់ការសាលាសង្កាត់ និងប៉ុស្តិ៍នគរបាលរដ្ឋបាលដើម្បីទំនាក់ទំនង និងទទួលព័ត៌មានពីប្រជាពលរដ្ឋត្រូវមានកិច្ចសហប្រតិបត្តិការល្អជាមួយកងកម្លាំងមានសមត្ថកិច្ចនានា ដែលបោះទីតាំងក្នុងភូមិ-សង្កាត់របស់ខ្លួន និងពីគ្រប់មជ្ឈដ្ឋានប្រជាពលរដ្ឋដោយមិនប្រកាន់និន្នាការនយោបាយជំនឿសាសនា ជនជាតិ ដើម្បីបង្កើតឱ្យមានយន្តការផ្តល់ព័ត៌មានជួយគាំទ្រឧបត្ថម្ភទៅវិញទៅមក៕
ចែករំលែកព័តមាននេះ