ខេត្តរតនគិរីភូមិភាគឦសានពេញទៅដោយភ្នំតូច ភ្នំធំ
- រតនគិរី
ខេត្តរតនគិរី ៖ ខេត្តនៅភូមិភាគឦសានមួយនេះ មានក្រុង-ស្រុកចំនួន៩រួមមាន ក្រុងបានលុង ស្រុកកូនមុំ ស្រុកអូរជុំ ស្រុកវើនសៃ ស្រុកតាវែង ស្រុកអណ្តូងមាស…
ខេត្តរតនគិរី ៖ ខេត្តនៅភូមិភាគឦសានមួយនេះ មានក្រុង-ស្រុកចំនួន៩រួមមាន ក្រុងបានលុង ស្រុកកូនមុំ ស្រុកអូរជុំ ស្រុកវើនសៃ ស្រុកតាវែង ស្រុកអណ្តូងមាស ស្រុកបរកែវ ស្រុកអូរយ៉ាដាវ និងស្រុកលំផាត់ ។
ខេត្តរតនគិរីមានផ្ទៃដីទំហំ១០៧៨២គីឡូម៉ែត្រការ៉េ គឺជាតំបន់សម្បូរទៅដោយរតនសម្បត្តិធម្មជាតិប្រកបដោយភាពស្រស់បំព្រង ហើយក៏ជាភូមិកំណើតនៃជនជាតិដើមភាគតិចជាច្រើនអំបូរដូចជា ទំពួន ចារ៉ាយ គ្រឹង ព្រៅ កាវ៉ែតកាចក់ ព្នង(ពូនង) និងជនជាតិលន់ ។អ្នកទេសចរជាតិនិងអន្តរជាតិ អាចទៅទស្សនានិងស្វែងយល់ដោយផ្ទាល់ក៏បាននូវទំនៀមទម្លាប់ប្រពៃណី និងការរស់នៅប្រចាំថ្ងៃ ការគោរពបូជា និងជំនឿផ្សេងៗទៅតាមអំបូរនៃជនជាតិដើមភាគតិចរៀងៗខ្លួន ។
ក្រុងបានលុង ៖ ជាទីរួមខេត្ត ស្ថិតនៅលើតំបន់ខ្ពង់រាប មានទឹកធ្លាក់ និងបឹងធម្មជាតិ ដែលក្លាយមកពីបន្ទុះភ្នំភ្លើង ដែលកន្លងមកច្រើនសតវត្សរ៍មកហើយ មានព័ទ្ធជុំវិញទៅដោយជ្រលងភ្នំ និងភ្នំជាច្រើនដូចជា ៖
នៅស្រុកកូនមុំ ៖ មានភ្នំជាច្រើនដូចជា ភ្នំកូនមុំ ភ្នំពេទ្យសត្វ ភ្នំទន្សោង ភ្នំតាងរាង ភ្នំទឹកចេញ ភ្នំស្រួច និងភ្នំថ្មគ្រែ ។
ពេលយើងឆ្លងផុតពីទឹកដីនៃស្រុកកូនមុំចូលដល់ទឹកដីនៃក្រុងបានលុង មុនដំបូងយើងនឹងឃើញនៅចំពោះមុខចំកណ្តាលផ្លូវតែម្តង គឺភ្នំស្វាយ ដែលជារមណីយដ្ឋានឥសីបតមៈ ។ នៅលើកំពូលភ្នំ មានព្រះពុទ្ធបដិមាមួយព្រះអង្គយ៉ាងធំ ដែលទើបនឹងសាងសង់ឡើងថ្មីៗ ។ ក្រៅពីនេះ មាន ភ្នំបេង ក្នុងសង្កាត់កាចាញ ភ្នំយក្សឡោម និងភ្នំយោល ក្នុងសង្កាត់យក្ខឡោម ។
នៅស្រុកអូរជុំ ៖ មានភ្នំកាច់ចង្កេះ និងភ្នំតូចៗជាច្រើនទៀត ។
នៅស្រុកវើនសៃ ៖ មានភ្នំអូរតាង ក្នុងឃុំកាចូន ភ្នំវែង ក្នុងឃុំប៉ាកកាឡាន់ និងមានភ្នំជាច្រើនទៀត ដែលមិនបានស្គាល់ឈ្មោះអស់នៅឡើយ សូម្បីតែក្រុមមន្ត្រីពាក់ព័ន្ធក្ដីមិនបានស្គាល់អស់ទេ ។នៅស្រុកតាវែង មានភ្នំតាវែង ភ្នំតាយ៉ាក ភ្នំយ៉ាកគ្រាក់ និងភ្នំជាច្រើនទៀតនៅឧទ្យានវីរជ័យ ។
នៅស្រុកអណ្តូងមាស ៖ មានភ្នំវាលទោង ហៅភ្នំញ៉ាង ក្នុងឃុំញ៉ាង ភ្នំងោក ភ្នំជិ និងភ្នំអូរតាងីនៅក្នុងឃុំម៉ាលិក ភ្នំអូរតាយ៉ាក ក្នុងឃុំតាឡាវ និងភ្នំជាច្រើនទៀតនៅឆ្ងាយដាច់ស្រយាលដែលមិនស្គាល់ឈ្មោះព្រោះខេត្តគ្មានការស្រាវជ្រាវ ។នៅស្រុកបរកែវ មានភ្នំដាង ជាតំបន់ភ្នំដែលសម្បូរទៅដោយត្បូងមានតម្លៃ ។
ស្រុកអូរយ៉ាដាវ ៖ មានភ្នំព្រៀង និងភ្នំបឿកក្នុងឃុំយ៉ាទុង ភ្នំក្រហម ក្នុងឃុំប៉ក់ញ៉ៃ និងនៅស្រុកលំផាត់មាន ភ្នំកូនសេកជាដើម ដែលអ្នកធ្វើដំណើរតែងឆ្លងកាត់តាមភ្នំនោះ ។
នៅខេត្តរតនគិរីនេះ ៖ តាមស្រុកនីមួយៗក្រៅពីឈ្នោះភ្នំដែលបានរៀបរាប់ខាងលើ ក៏នៅមានភ្នំតូចធំជាច្រើនទៀត ស្ថិតនៅតំបន់ឆ្ងាយៗដាច់ស្រយាលមិនអាចរៀបរាប់បានអស់នោះឡើយ គឺពេញទៅដោយភ្នំ ។
ភ្នំឥសីបតមៈ បាននិងកំពុងទាក់ទាញភ្ញៀវទេសចរចូលលេងកម្សាន្តមិនចេះដាច់ ដោយសារនៅទីនោះមានសម្រស់ធម្មជាតិខៀវស្រងាត់ អាកាសធាតុត្រជាក់ ខ្យល់បរិសុទ្ធ និងជាទីគោរពសក្ការៈដ៏ស័ក្តិសិទ្ធិផងដែរ ។ មន្ត្រីមន្ទីរទេសចរណ៍ខេត្តនិយាយថា អាជ្ញាធរខេត្តបានរៀបចំកែច្នៃ និងអភិវឌ្ឍន៍ហេដ្ឋារចនាសម្ព័ន្ធជាច្រើននៅក្នុងតំបន់នោះ រួមមានកសាងព្រះពុទ្ធបដិមាអង្គធំ មានផ្លូវឡើង មានរៀបចំទីធ្លាសម្រាប់សម្រាកកម្សាន្ត ។ តំបន់ធម្មជាតិមួយនេះ បានក្លាយជាគោលដៅទេសចរណ៍វប្បធម៌សម្រាប់ភ្ញៀវទេសចរទៅលេងកម្សាន្តនៅទីនោះ ។មន្ត្រីដដែលបន្តថា ភ្ញៀវទេសចរភាគច្រើនឡើងទៅលំហែអារម្មណ៍និងស្រូបយកខ្យល់អាកាសបរិសុទ្ធ គយគន់ទិដ្ឋភាពក្រុងសមុទ្រកសិកម្មចម្រុះពីកំពូលភ្នំជារៀងរាល់ល្ងាច ។
ជាក់ស្តែង មានបងប្អូនប្រជាពលរដ្ឋនៅក្នុងតំបន់នោះជាច្រើន ធ្វើដំណើរឡើងទៅកម្សាន្តនៅលើភ្នំនោះ ហើយតែងតែប្រណិប័តន៍ និងគោរពបូជាវត្ថុដ៏ស័ក្តិសិទ្ធនៅទីនោះ ។តំបន់នេះជាតំបន់ភ្នំខ្ពស់ ហើយនៅជិតកណ្ដាលទីក្រុងតែម្ដង ។ ជារៀងរាល់ពេលថ្ងៃលិច ភ្ញៀវទេសចរជាតិ-អន្តរជាតិ ក៏ដូចជាប្រជាពលរដ្ឋទូទៅ តែងឡើងទៅទស្សនាថ្ងៃអស្ដង្គតក៏ដូចជាហាត់ប្រាណ និងស្រូបយកខ្យល់បរិសុទ្ធនៅលើកំពូលភ្នំភ្នំឥសីបតមៈ ។
ម្យ៉ាងទៀត ក៏ជាកន្លែងដែលយើងគយគន់ទេសភាពលំហអាកាសនាពេលរាត្រីផងដែរ ។ ចំណែកនៅពេលព្រឹក គឺភ្ញៀវទេសចរជាតិ-អន្តរជាតិ បានមើលទស្សនាពពកដែលរសាត់តាមចង្កេះភ្នំ ។
តំបន់ទេសចរណ៍មួយទៀត គឺភ្នំវាលធំ នៃឧទ្យានជាតិវីរៈជ័យ មន្ត្រីនៃការិយាល័យឧទ្យានជាតិវីរៈជ័យ បានឲ្យដឹងថា ភ្នំវាលធំ ជាតំបន់មានវាលស្មៅខៀវស្រងាត់ បង្កើតជាទេសភាពស្រស់ស្អាតនៅតាមជួរជ្រលងភ្នំ ព្រមទាំងមានបរិយាកាសស្រស់ស្រាយនិងត្រជាក់ មិនចាញ់ខេត្តមណ្ឌលគិរីឡើយ ជាពិសេសជាកន្លែងទេសចរណ៍បែបផ្សងព្រេង ។
ភ្ញៀវទេសចរអាចឡើងទៅលេងលើភ្នំវាលធំបាន ដោយការធ្វើដំណើរថ្មើរជើងប្រហែល៦ម៉ោង ឬការជិះម៉ូតូកែច្នៃ ហើយអាចបោះជំរំ សម្រាកលំហែនៅទីនោះបាន ។ ពួកគាត់អាចថតរូបទុកជាអនុស្សាវរីយ៍ ស្តាប់សំឡេងសត្វព្រៃតូចធំ និងបានឃើញសត្វព្រៃដូចជា ឈ្លូស ក្តាន់ ប្រើស និងសត្វព្រៃជាច្រើនទៀតនៅក្នុងឧទ្យាននេះដែរ ។
ទោះបីជាបែបណា បើសិនជានៅរដូវវស្សាគឺមានការពិបាកក្នុងការឡើង ប៉ុន្តែសម្រាប់ជនបរទេស ពួកគេចូលចិត្តឡើងលើភ្នំនៅខែវស្សា ។នៅទីនោះមានតំបន់ប្រវត្តិសាស្ត្រជាច្រើន គឺជ្រោះក៏មាន ភ្នំក៏មាន ហើយសត្វព្រៃក៏មាន គេអាចឮសំឡេងសត្វទោចយំផងដែរ ។
មន្ត្រីដដែលបន្តថា ប្រសិនបើភ្ញៀវទេសចរចង់ទៅលេងកម្សាន្ត ឬបោះតង់សម្រាកលំហែនៅក្នុងឧទ្យាននេះ គឺសូមទាក់ទងមកការិយាល័យ អេកូទេសចរណ៍ធម្មជាតិ នៃមន្ទីរបរិស្ថានខេត្តជាមុនសិន ព្រោះកន្លែងទេសចរណ៍នេះ ជាតំបន់គ្រប់គ្រងដោយឧទ្យានុរក្សបរិស្ថាន ពោលគឺជាកន្លែងដែលមានការអភិរក្សយ៉ាងមុតមាំ ក្នុងការការពារព្រៃឈើ និងដែនជម្រកសត្វព្រៃ ហើយបានចុះបញ្ជីជាតំបន់ការពារបេតិកភ័ណ្ឌរបស់អាស៊ានទៀតផង ។
សូមបញ្ជាក់ថា តំបន់ទេសចរណ៍ភ្នំវាលធំ ស្ថិតក្នុងឃុំកោះប៉ង ស្រុកវើនសៃ និងឃុំតាវែងក្រោម ស្រុកតាវែង នៃឧទ្យានជាតិវីរៈជ័យ ជាជម្រកនៃសម្រស់ធម្មជាតិយ៉ាងសំខាន់សម្រាប់សត្វស្លាប២០០ប្រភេទ ថនិកសត្វ១៥ប្រភេទ សត្វល្មូន៣៥ប្រភេទ មច្ឆា៣៧ប្រភេទ កណ្តូប១៩ប្រភេទនិងប្រភេទសត្វផ្សេងៗទៀត ៕
ចែករំលែកព័តមាននេះ