រាជធានីភ្នំពេញ ៖ លោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកំរិតស្រាល បានឲ្យដឹងថា ដោយទទួលបញ្ជាដឹកនាំដ៏ខ្ពង់ខ្ពស់ពីឧត្តមសេនីយ៍ឯក ជួន ណារិន្ទ…
រាជធានីភ្នំពេញ ៖ លោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកំរិតស្រាល បានឲ្យដឹងថា ដោយទទួលបញ្ជាដឹកនាំដ៏ខ្ពង់ខ្ពស់ពីឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ លោកឧត្តមសេនីយ៍ទោ លី ប៊ុនអេង ស្នងការរងទទួលដឹកនាំការិយាល័យ នៅថ្ងៃទី១ ខែសីហា ឆ្នាំ២០២៤ វេលាម៉ោងប្រហែល១៤ និង០០នាទី កម្លាំងការិយាល័យជំនាញព្រហ្មទណ្ឌ គឺដឹកនាំដោយរូបលោកផ្ទាល់ បានចុះទៅសហការជាមួយសមត្ថកិច្ចប៉ុស្តិ៍នគរបាលរដ្ឋបាលបឹងត្របែក ធ្វើការឃាត់ខ្លួនជនសង្ស័យម្នាក់ នៅចំណុចប៉ុស្តិ៍នគរបាលរដ្ឋបាលបឹងត្របែក សង្កាត់បឹងត្របែក ខណ្ឌចំការមន រាជធានីភ្នំពេញ ពាក់ព័ន្ធប្រព្រឹត្តបទល្មើសអំពើលួចមានស្ថានទម្ងន់ទោស និងបង្កឲ្យមានរបួសដោយអចេតនា ។
លោកវរសេនីយ៍ឯក ម៉ម សាវន បន្តថា ជនសង្ស័យបើកម៉ូតូកង់បី “ផាស្អេប” ដឹកជនរងគ្រោះទៅកន្លែងស្ងាត់ ដែលជនរងគ្រោះប្រាប់ឲ្យឈប់តែមិនព្រមឈប់ ដោយមានការភ័យជនរងគ្រោះបានលោតចុះពីលើម៉ូតូកង់បី បណ្តាលឲ្យរងរបួស ហើយក៏ត្រូវបក្ខពួក អ្នករត់ម៉ូតូកង់បី១ក្រុម ដែលនៅចាំទីនោះ បានធ្វើសកម្មភាពលួចយកសម្ភាររបស់ជនរងគ្រោះតែម្តងទៅ ប្រព្រឹត្តនៅចំណុចផ្លូវ០៥ ភូមិ១៤ ភូមិទួលរកា សង្កាត់ចាក់អង្រែក្រោម ខណ្ឌមានជ័យរាជធានីភ្នំពេញ កាលពីវេលាម៉ោងប្រហែល០៤ និង០០នាទីថ្ងៃទី៣១ ខែកក្កដា ឆ្នាំ២០២៤ ។
លោក ម៉ម សាវន បន្តទៀតថា ពេលចាប់ខ្លួនជនសង្ស័យ និងវត្ថុតាង ត្រូវបានបញ្ជូនមកការិយាល័យមកដល់នៅនារសៀលថ្ងៃដដែល ដើម្បីសាកសួរ និងចាត់ការតាមនីតិវិធី ។
ជនសង្ស័យមានឈ្មោះ តាត វណ្ណៈ ភេទប្រុស អាយុ៣៥ឆ្នាំ មុខរបរអ្នករត់ម៉ូតូកង់បី មានទីលំនៅផ្ទះគ្មានលេខផ្លូវលំ ភូមិបារាជ ឃុំស្វាយជ្រុំ ស្រុកខ្សាច់កណ្តាល ខេត្តកណ្តាល ។
វត្ថុតាងចាប់យក រួមមាន ៖
-ម៉ូតូកង់បី១គ្រឿង ម៉ាក BAJAJ 3W RE 4S LPG ពណ៌ក្រហម សេរីឆ្នាំ២០១៧ ពាក់ផ្លាកលេខកណ្តាល 1Z-8889
-ទូរសព្ទដៃ ម៉ាកវីវ៉ូ ពណ៌ទឹកមាស ១គ្រឿង
-ទូរសព្ទ័ដៃ ម៉ាកសាំសុង ពណ៌ខ្មៅ ១ គ្រឿង ពាក់ព័ន្ធបទល្មើសខាងលើនេះ ។
ចំណែកជនរងគ្រោះមានឈ្មោះ P H N ភេទស្រី ជនជាតិកូរ៉េ កាន់លិខិត ស្នាក់នៅសណ្ឋាគារយូតៃ ផ្លូវលេខ២១៤ ភូមិ២ សង្កាត់បឹងរាំង ខណ្ឌដូនពេញ រាជធានីភ្នំពេញ ។
សម្ភារៈបាត់បង់ ៖
.ទូរសព្ទដៃម៉ាកអាយហ្វូន១២ ចំនួន០១ គ្រឿង
.កាតធនាគារ និងកូនសោសណ្ឋាគារ ។
យោងតាមពាក្យបណ្តឹងរបស់ជនរងគ្រោះ និងស្តាប់ចម្លើយជនសង្ស័យមានភាពស៊ីសង្វាក់ពាក់ពន្ធបទល្មើស “លួចមានស្ថានទម្ងន់ទោស” សមត្តកិច្ចបានកសាងសំណុំរឿងបញ្ជូនជនសង្ស័យ និងវត្ថុតាង ទៅសាលដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ