ប្រទេស​បារាំង ៖ គិត​ត្រឹម​បញ្ចប់​ការ​ប្រកួត​កាលពី​ថ្ងៃ​ទី​៥ ខែសីហា ឆ្នាំ​២០២៤ កន្លង​ទៅ ថៃ ក្លាយជា​ប្រទេស​អាស៊ី​អាគ្នេយ៍​ទី​៤ បន្ទាប់​ពី​ប្រទេស​ហ្វី​លី​ពី​ន ឥណ្ឌូ​ណេ​ស៊ី និង​ម៉ា​ឡេ​ស៊ី ដែល​ឈ្នះ​មេដាយ​ពី​ព្រឹត្តិការណ៍​កីឡា​អូ​ឡាំ​ពិ​ក​រដូវក្តៅ​ទី​ក្រុងប៉ារីស​ឆ្នាំ ២០២៤​។

ហ្វី​លី​ពី​ន ជា​ប្រទេស​អាស៊ី​អាគ្នេយ៍​ដំបូង​គេ​បង្អស់ ដែល​ឈ្នះ​មេដាយ​ពី​កីឡា​អូ​ឡាំ​ពិ​ក​ទី​ក្រុងប៉ារីស ពោល​ចំនួន​២​គ្រឿង​ហើយ ដែល​ជា​មេដាយមាស​ទាំង​២​គ្រឿង ដណ្តើម​បាន​ដោយ​កីឡាករ Carlos Yulo អាយុ​២៤​ឆ្នាំ ប្រភេទ​កីឡា​កាយសម្ព័ន្ធ​លើ​វិញ្ញាសា​លើ​កម្រាល (Floor Exercise) កាលពី​ថ្ងៃ​ទី​៣ ខែសីហា កន្លង​ទៅ និង​១​គ្រឿង​ទៀត​លើ​វិញ្ញាសា​សេះ​លោត (Vault) កាលពី​ថ្ងៃ​ទី​៤ ខែ​ឆ្នាំ​ដដែល​។

ប្រទេស​ឥណ្ឌូ​ណេ​ស៊ី​ឈ្នះ​មេដាយ​សំរឹទ្ធ​១​គ្រឿង ដណ្តើម​បាន​ដោយ​កីឡាការិនី Gregoria Mariska Tunjung អាយុ​២៤​ឆ្នាំ ប្រភេទ​កីឡា​វាយ​សី (Badminton) វិញ្ញាសា​ឯកត្តជន កាលពី​ថ្ងៃ​ទី​៤ ខែសីហា កន្លង​ទៅ​។

ប្រទេស​ម៉ា​ឡេ​ស៊ី​ឈ្នះ​មេដាយ​សំរឹទ្ធ​២​គ្រឿង ដណ្តើម​បាន​ដោយ​កីឡាករ Aaron Chia អាយុ​២៧​ឆ្នាំ និង​កីឡាករ Soh Wooi Yik អាយុ​២៦​ឆ្នាំ ប្រភេទ​កីឡា​វាយ​សី (Badminton) វិញ្ញាសា​ដៃគូ កាលពី​ថ្ងៃ​ទី​៤ ខែសីហា កន្លង​ទៅ​។ ហើយ​១​គ្រឿង​ទៀត ដណ្តើម​បាន​កីឡាករ Lee Zii Jia អាយុ​២៦​ឆ្នាំ ប្រភេទ​កីឡា​វាយ​សី​ដដែល ប៉ុន្តែ​នៅ​លើ​វិញ្ញាសា​ឯកត្តជន កាលពី​ថ្ងៃ​ទី​៥ ខែ​ឆ្នាំ​ដដែល​។

ដោយឡែក ប្រទេស​ថៃ​ឈ្នះ​មេដាយ​ប្រាក់​១​គ្រឿង ដណ្តើម​បាន​ដោយ​កីឡាករ Kunlavut Vitidsarn អាយុ​២៣​ឆ្នាំ ប្រភេទ​កីឡា​វាយ​សី (Badminton) វិញ្ញាសា​ឯកត្តជន ក្រោយ​ចាញ់​កីឡាករ​ដា​ណឺ​ម៉ាក Viktor Axelsen នៅ​វគ្គ​ផ្តាច់ព្រ័ត្រ កាលពី​ថ្ងៃ​ទី​៥ ខែសីហា កន្លង​ទៅ​។

គិត​ត្រឹម​បញ្ចប់​ការ​ប្រកួត​កាលពី​ថ្ងៃ​ទី​៥ ខែសីហា ឆ្នាំ​២០២៤ សហរដ្ឋអាមេរិក​បន្ត​កាប់​កាន់​កំពូល​តារាង​បណ្តោះអាសន្ន ក្រោយ​ឈ្នះ​មេ​ដា​សរុប​៧៩​គ្រឿង មាស​២១​គ្រឿង ប្រាក់​៣០​គ្រឿង និង​សំរឹទ្ធ​២៨​គ្រឿង​។ តាម​ពីក្រោយ​ដោយ​ប្រទេស​ចិន ដែល​ឈ្នះ​មេដាយ​សរុប​៥៣​គ្រឿង មាស​២១​គ្រឿង ប្រាក់​១៨​គ្រឿង និង​សំរឹទ្ធ​១៤​គ្រឿង​។ ចំណែកឯ​ម្ចាស់ផ្ទះ​បារាំង​ឈរ​នៅ​លេខ ៣ ឈ្នះ​មេដាយ​សរុប​៤៨​គ្រឿង មាស​១៣​គ្រឿង ប្រាក់​១៦​គ្រឿង និង​សំរឹទ្ធ​១៩​គ្រឿង​៕ (​ប្រភព ៖ Paris 2024 និង Seasia Stats)