ទីក្រុងដាកា៖ ប្រទេសអាមេរិកចាប់ផ្ដើមបញ្ចេញប្រតិកម្មដំបូងគេក្រោយការចុះពីតំណែងរបស់នាយករដ្ឋមន្ត្រីបង់ក្លាដែស និងការចាកចេញដំណើរសំដៅទៅប្រទេសឥណ្ឌាតាមឧទ្ធម្ភាគចក្រ។ ថ្មីៗនេះ ប្រធានក្រុមភាគច្រើននៃព្រឹទ្ធសភាអាមេរិក លោកឆាក់ស៊ូមើ (Chuck Schumer) បានអំពាវនាវឱ្យប្រទេសបង់ក្លាដែសបង្កើតរដ្ឋាភិបាលបណ្ដោះអាសន្នដែលប្រកបដោយតុល្យភាព មានន័យថាមានសំឡេងពីគ្រប់និន្នាការ ដើម្បីឱ្យប្រទេសជាតិរៀបចំការបោះឆ្នោតតាមបែបប្រជាធិបតេយ្យ។
ការចាកចេញរបស់លោកស្រីហាស៊ីណាកើតឡើងបន្ទាប់ពីមានអំពើហិង្សាស្លាប់មនុស្សជាង៣រយនាក់ត្រឹមតែរយៈពេលប៉ុន្មានថ្ងៃប៉ុណ្ណោះ នេះបើយោងតាមការផ្សាយរបស់ទូរទស្សន៍ប៊ីប៊ីស៊ី (BBC)។ ការហែបាតុកម្មនេះផ្ដើមឡើងពីការកើតទុក្ខមិនសុខចិត្តរបស់យុវជនក្មេងៗចំពោះការកំណត់កូតាដើម្បីប្រឡងចូលក្របខណ្ឌមន្ត្រីរដ្ឋការ។ ការតវ៉ានេះក៏បានប្រែក្លាយជាកំហឹងមហាជនយ៉ាងខ្លាំងដោយសារមនុស្សមកពីគ្រប់និន្នាការដែលមិនសប្បាយចិត្តនឹងបញ្ហាដែលពួកគេជួបប្រទះដូចជាមនុស្សអត់ការងារធ្វើកាន់តែច្រើន, អំពើពុករលួយ និងបញ្ហាដទៃទៀត។
លោកស៊ូមើបានបង្ហោះសារនយោបាយនៅលើបណ្ដាញអ៊ិចថាការដែលលោកស្រីហាស៊ីណាបង្ក្រាបដោយអំពើហិង្សាទៅលើហ្វូងបាតុករដែលតវ៉ាដោយសន្តិវិធីធ្វើឱ្យលោកស្រីមិនអាចស្ថិតនៅក្នុងអំណាចតទៅទៀតទេ។ លោកស៊ូមើហាក់ដូចជាគាំទ្រក្រុមអ្នកតវ៉ាដែលមានចិត្តក្លាហាន។ លោកក៏បានទាមទារឱ្យអាជ្ញាធរស្វែងរកយុត្តិធម៌ជូនជនរងគ្រោះដែលស្លាប់នៅពេលហែបាតុកម្មនោះផងដែរ។
លោកស៊ូមើសង្កត់ធ្ងន់ថាវាជារឿងសំខាន់ណាស់ដែលប្រទេសបង់ក្លាដែសត្រូវមានរដ្ឋាភិបាលបណ្ដោះអាសន្នមួយដែលមានតុល្យភាព និងគោរពសិទ្ធិមនុស្សគ្រប់រូប។ លោកក៏បានអំពាវនាវឱ្យរៀបចំការបោះឆ្នោតឱ្យបានឆាប់រហ័សតាមបែបប្រជាធិបតេយ្យផងដែរ។ ក្រសួងការបរទេសអាមេរិកតាំងពីប៉ុន្មានសប្ដាហ៍មុននេះបានជំរុញឱ្យរដ្ឋភិបាលបង់ក្លាដែសគាំទ្រសិទ្ធិបញ្ចេញមតិរបស់ក្រុមអ្នកតវ៉ាដោយសន្តិវិធី។ ប៉ុន្តែក្រោយពេលមានសភាពការណ៍ប្រែប្រួលថ្មីនៅបង់ក្លាដែសយ៉ាងដូច្នេះ ក្រសួងមិនទាន់ធ្វើអត្ថាធិប្បាយអ្វីទេនៅពេលអ្នកសារព័ត៌មានព្យាយាមទាក់ទងដើម្បីស្នើសុំការការឆ្លើយបំភ្លឺ។
អគ្គបញ្ជាការកងទ័ពបង់ក្លាដែស ឧត្ដមសេនីយ៍ វេកខឺ អ៊ូ ហ្សាម៉ាន់ (Waker-Uz-Zaman) បានប្រកាសថាលោកស្រីហាស៊ីណាសម្រេចចិត្តលាលែងពីតំណែងហើយ។ លោកបានថ្លែងសុន្ទរកថាតាមកញ្ចក់ទូរទស្សន៍អំពីសភាពការណ៍វិវត្តថ្មីៗ ហើយសន្យាថានឹងបង្កើតរដ្ឋាភិបាលបណ្ដោះអាសន្នដើម្បីទុកពេលឱ្យប្រទេសជាតិរៀបចំការបោះឆ្នោតឡើងវិញ។
សូមជម្រាបថាប្រទេសបង់ក្លាដែសជួបប្រទះនឹងការហែបាតុកម្មតវ៉ា ហើយពេលខ្លះឈានដល់ការប៉ះទង្គិចគ្នា និងអំពើហិង្សាធ្ងន់ធ្ងរចាប់ពីខែកក្កដា។ បញ្ហាចាប់ផ្ដើមកើតមានជាបណ្ដើរៗចាប់តាំងពីលោកស្រីហាស៊ីណាស្បថចូលកាន់តំណែងនៅអាណត្តិទីបួនកាលពីខែមករា ឆ្នាំ២០២៤។ ក្រសួងការបរទេសអាមេរិកធ្លាប់និយាយតាំងពីខែមករាថាការបោះឆ្នោតនោះមិនប្រកបដោយភាពសេរី និងយុត្តិធម៌ទេ។ ក្រសួងយល់ថាមានភាពមិនប្រក្រតីជាច្រើនកើតឡើងនៅអំឡុងពេលបោះឆ្នោត។
ក្រសួងការបរទេសអាមេរិកក៏បានប្រកាសថ្កោលទោសអំពើហិង្សានៅអំឡុងពេលបោះឆ្នោតផងដែរ។ នៅពេលមានសញ្ញាមិនស្រួលដែលហ្វូងបាតុករទាមទារជាដាច់ខាតឱ្យលោកស្រីហាស៊ីណាចុះពីតំណែង អមដោយអំពើហិង្សាយ៉ាងពុះកញ្ច្រោលផងនោះ ក្រសួងការបរទេសអាមេរិកបានអំពាវនាវទៅប្រជាជនរបស់ខ្លួនកាលពីខែកក្កដាថាបើគ្មានការចាំបាច់ទេ សូមកុំធ្វើដំណើរទៅប្រទេសបង់ក្លាដែសឱ្យសោះ។ អាមេរិកចាត់ទុកថានោះជាបញ្ហាអស្ថិរភាពដែលបង្កឡើងដោយជនស៊ីវិល៕
ចែករំលែកព័តមាននេះ