ប្រទេសថៃ ៖ ប្រតិបត្តិករទេសចរណ៍ប៉ាតាយ៉ា បានដាក់សំណើអភិវឌ្ឍន៍ទេសចរណ៍ទៅកាន់រដ្ឋមន្ត្រីក្រសួងទេសចរណ៍នៅក្នុងគោលបំណង ដើម្បីផ្លាស់ប្តូរមុខមាត់ និងកេរ្តិ៍ឈ្មោះទីក្រុងនៃខេត្តឈុនបុរីមួយនេះ ទៅជាទីក្រុងទេសចរណ៍បែបគ្រួសារ និងដកចេញនូវសមាគមទេសចរណ៍ផ្លូវភេទ និងល្បែងស៊ីសងខុសច្បាប់។ នេះបើយោងតាមប្រភពពីកាសែតបាងកកប៉ុស្ត៍…
ប្រទេសថៃ ៖ ប្រតិបត្តិករទេសចរណ៍ប៉ាតាយ៉ា បានដាក់សំណើអភិវឌ្ឍន៍ទេសចរណ៍ទៅកាន់រដ្ឋមន្ត្រីក្រសួងទេសចរណ៍នៅក្នុងគោលបំណង ដើម្បីផ្លាស់ប្តូរមុខមាត់ និងកេរ្តិ៍ឈ្មោះទីក្រុងនៃខេត្តឈុនបុរីមួយនេះ ទៅជាទីក្រុងទេសចរណ៍បែបគ្រួសារ និងដកចេញនូវសមាគមទេសចរណ៍ផ្លូវភេទ និងល្បែងស៊ីសងខុសច្បាប់។ នេះបើយោងតាមប្រភពពីកាសែតបាងកកប៉ុស្ត៍ ចេញផ្សាយនៅថ្ងៃទី៥ ខែសីហា ឆ្នាំ២០២៤។
សមាគមសហព័ន្ធទេសចរណ៍ឈុនបូរី ដែលហៅកាត់ថា ACTF កាលពីពេលថ្មីៗនេះ បានជួបពិភាក្សាជាមួយលោក Sermsak Pongpanit រដ្ឋមន្ត្រីក្រសួងទេសចរណ៍ថៃ។ ភាគីទាំងពីរបានពិភាក្សាអំពីលទ្ធផលសិក្ខាសាលាមួយ ដែលចូលរួមជាមួយទីភ្នាក់ងារទេសចរណ៍បរទេសមកពីទីផ្សារសំខាន់ៗចំនួន ៥ រួមមានប្រទេសរុស្ស៊ី អាល្លឺម៉ង់ កូរ៉េខាងត្បូង ចិន និងឥណ្ឌា រួមនឹងផែនការ ACTF ដើម្បីសហការជាមួយនឹងរដ្ឋាភិបាលក្នុងការលើកស្ទួយវិស័យទេសចរណ៍ប៉ាតាយ៉ា ក៏ដូចជាផ្លាស់ប្តូររូបភាព និងកេរ្តិ៍ឈ្មោះមិនល្អរបស់ទីក្រុង ដែលទាក់ទាញភ្ញៀវទេសចរដ៏សំខាន់របស់ប្រទេសថៃមួយនេះ។
លោក Thanet Supornsahasrungsi ប្រធាន ACTF បានថ្លែងថា ទីក្រុងប៉ាតាយ៉ា បានធ្វើការផ្លាស់ប្តូរពីគោលដៅកម្សាន្តនៅពេលរាត្រី ទៅជាទីក្រុងងាយស្រួលសម្រាប់ទេសចរណ៍បែបគ្រួសារ ជាមួយនឹងសកម្មភាពផ្សេងៗគ្នា។ លោកបន្តទៀតថា ទីក្រុងប៉ាតាយ៉ា មានសក្តានុពលក្នុងការក្លាយជាទីក្រុងទាក់ទាញផ្សេងៗ និងជាមជ្ឈមណ្ឌលសម្រាប់ការវិនិយោគ ក៏ដូចជាព្រឹត្តិការណ៍លំដាប់ពិភពលោកផងដែរ។
ទីក្រុងធំលំដាប់ទី២ នៃខេត្តឈុនបូរីមួយនេះ អាចផ្តល់នូវភាពទាក់ទាញចម្រុះបន្ថែមទៀត រួមទាំងឆ្នេរសមុទ្រ ទីលានវាយកូនហ្គោលស្តង់ដារអន្តរជាតិ កន្លែងវប្បធម៌ កន្លែងប្រជុំ និងផ្សារទំនើបជាច្រើនផងដែរ។ ទីក្រុងនេះក៏នៅជិតអាកាសយានដ្ឋានសុវណ្ណភូមិរបស់ទីក្រុងបាងកក និងអាកាសយានដ្ឋាន U-tapao ខេត្តឈុនបូរី ជាមួយខេត្តជិតៗ និងកន្លែងត្រៀមជាស្រេចដើម្បីជួយស្រូបទាញភ្ញៀវទេសចរ ក៏ដូចជាទីក្រុងរ៉ាក់យ៉ង ខេត្តរ៉ាក់យ៉ង និងឆ្នេរបាងសេន (Bang Saen) ជាដើម។
កាលពីខែមុន អ្នកស្រុក និងប្រតិបត្តិករទេសចរណ៍ប៉ាតាយ៉ា ផ្ទុះការតវ៉ាប្រឆាំងប្រព័ន្ធផ្សព្វផ្សាយថៃមួយ ដែលដាក់ឈ្មោះទីក្រុងប៉ាតាយ៉ាថា «ទីក្រុងបាប»។ ត្រង់ចំណុចនេះ លោក Thanet បានថ្លែងថា មានតែភ្ញៀវមិនបានទៅលេងប៉ាតាយ៉ាជាង២០ឆ្នាំប៉ុណ្ណោះ ដែលនៅតែមានការយល់ឃើញចាស់អំពីជីវិតភ្លើងពណ៌នៅពេលយប់ និងទេសចរណ៍ផ្លូវភេទ ផ្ទុយពីបណ្តាភ្ញៀវមកលេងញឹកញាប់ ក៏ដូចជាភ្នាក់ងារទេសចរណ៍បរទេស ដែលទទួលស្គាល់អំពីផលិតផលទេសចរណ៍ជាច្រើននោះទេ។
លោកស្រី Morrakot Kuldilok ប្រធានផ្នែកភាគខាងកើតនៃសមាគមសណ្ឋាគារថៃ បានលើកឡើងថា ដោយសារតែពេស្យាចារនៅតែមាន អាជ្ញាធរគួរតែគ្រប់គ្រងការកាន់កាប់ និងការពារអ្នករកស៊ីផ្លូវភេទជាមួយនឹងវិធានការសុខុមាលភាព។ បូករួមនឹងរបាយការណ៍ព័ត៌មានអំពីល្បែងស៊ីសងខុសច្បាប់ក្នុងចំណោមជនបរទេស លោកស្រីនិយាយថា ប្រតិបត្តិការកាស៊ីណូស្របច្បាប់គួរតែដំណើរការ ដើម្បីដោះស្រាយបញ្ហាទាំងនេះនៅទីក្រុងប៉ាតាយ៉ា និងគ្រប់ទីកន្លែងនៅក្នុងប្រទេសថៃ ដែលមានសកម្មភាពស្រដៀងគ្នានេះ។
សមាគមសហព័ន្ធទេសចរណ៍ឈុនបូរី ក៏បានស្នើសម្រាប់ការកែប្រែទីក្រុងប៉ាតាយ៉ា ទៅជាទីក្រុងកាស៊ីណូស្របច្បាប់ដំបូងគេរបស់ប្រទេសថៃ។ ផ្នែកផ្សេងទៀតដែលត្រូវការកែលម្អរួមមាន សុវត្ថិភាព អនាម័យ ហេដ្ឋារចនាសម្ព័ន្ធសាធារណៈ និរន្តរភាព និងបទប្បញ្ញត្តិកំណត់តំបន់កម្សាន្តទីក្រុង ដែលទាមទារការគាំទ្រពីរដ្ឋាភិបាល។ ដ្បិតបទប្បញ្ញត្តិកំណត់តំបន់ទីក្រុងប៉ាតាយ៉ា មិនត្រូវបានធ្វើបច្ចុប្បន្នភាពត្រឹមត្រូវទេ ចាប់តាំងពីកន្លែងកម្សាន្តពេលរាត្រីនៅតែលាយឡំជាមួយសណ្ឋាគារ និងកន្លែងស្នាក់នៅ ដែលធ្វើឱ្យអ្នកទេសចរបែបគ្រួសារមួយចំនួនមានអារម្មណ៍ថា គ្មានសុវត្ថិភាពក្នុងការដើរតាមផ្លូវ៕ (ប្រភព ៖ បាងកកប៉ុស្ត៍)
ចែករំលែកព័តមាននេះ