រាជធានីភ្នំពេញ ៖ អិដ្ឋធាតុអាកាសយានិកពីររូប គឺលោក ស៊ុន ផល្លា និងលោក ខេង ឆៃយុទ្ធ ត្រូវបានដឹកមកដល់រោងពិធីបុណ្យនាបរិវេណមូលដ្ឋានកងទ័ពជើងអាកាសពោធិចិនតុង…
រាជធានីភ្នំពេញ ៖ អិដ្ឋធាតុអាកាសយានិកពីររូប គឺលោក ស៊ុន ផល្លា និងលោក ខេង ឆៃយុទ្ធ ត្រូវបានដឹកមកដល់រោងពិធីបុណ្យនាបរិវេណមូលដ្ឋានកងទ័ពជើងអាកាសពោធិចិនតុង រាជធានីភ្នំពេញ នាល្ងាចថ្ងៃទី១ ខែសីហា ឆ្នាំ២០២៤នេះ ដើម្បីធ្វើបុណ្យទក្ខិណានុប្បទាន តាមប្រពៃណីព្រះពុទ្ធសាសានា បន្ទាប់ពីស.ពអាកាសយានិកទាំងពីររូប បានបូជានៅនឹងកន្លែងកាលពីយប់ថ្ងៃទី៣១ ខែកក្កដា ។
សូមជម្រាបថា សាកស.ពអាកាសយានិកទ័ពអាកាសទាំង២នាក់ ដែលបានរកឃើញកាលពីថ្ងៃទី២៩ និងថ្ងៃទី៣០ ខែកក្កដា ឆ្នាំ២០២៤ កន្លងមកនេះ មិនទាន់បានយកចេញពីក្នុងព្រៃភ្លាមៗនោះទេ ដោយសារព្រៃក្រាស់ និងភ្លៀងធ្លាក់ជាប់ៗគ្នា ជារៀងរាល់ថ្ងៃ ។
នៅថ្ងៃទី៣១ ម្សិលមិញនេះ កម្លាំងរុករក និងសង្គ្រោះបានច្រកសាកស.ពបម្រុងសែងកាត់ព្រៃយកមកឡើងឧទ្ទម្ភាគចក្រ ដែលនៅចតចម្ងាយប្រមាណ២គីឡូម៉ែត្រ ពីទីនោះដែរ ប៉ុន្តែដោយសារអាកាសធាតុភ្លៀងធ្លាក់កាន់តែខ្លាំង ហើយព្រៃក្រាស់ស្នាប់ និងការធ្វើដំណើរឡើងភ្នំ ចុះភ្នំ ពិបាកពេកនោះ ទើបមិនអាចនាំយកសាកសពចេញមកបាន។ លុះនៅវេលាម៉ោង៣ទៅ៤ល្ងាច ភ្លៀងចាប់ផ្ដើមរាំងជាបណ្ដើរៗ កម្លាំងរុករក ក៍បានធ្វើពិធីបូជាស.ពនៅក្នុងព្រៃនោះតែម្ដង។ ពិធីបូជាតាំងពីម៉ោង៥ល្ងាច រហូតដល់ម៉ោង៨យប់ ទើបសុសអស់ ។
នៅថ្ងៃទី១ ខែសីហា ឆ្នាំ២០២៤នេះ កងកម្លាំងក៍បានប្រមូលអដ្ឋិធាតុទាំង២រូប ហើយបានវេចខ្ចប់ធ្វើដំណើរដោយថ្មើរជើង ចេញមកកាន់ឧទ្ទម្ភាគចក្រ ដែលមានចម្ងាយពីទីនោះប្រហែល២គីឡូម៉ែត្រ ។ មិនដឹងថា ត្រូវចំណាយពេលប៉ុន្មានម៉ោងនោះទេ ប៉ុន្តែថ្ងៃទី១ ខែសីហា ឆ្នាំ២០២៤នេះ អដ្ឋិធាតុរបស់អាកាសយានិកទាំងពីរនាក់ នឹងនាំយកមកដល់ក្រុមគ្រួសារនៅឯភ្នំពេញ នេះបើតាមការផ្ដល់ព័ត៌មាន ពីលោកឧត្តមសេនីយ៍ត្រី គួយ សារឿន ស្នងការរងនគរបាលខេត្តពោធិ៍សាត់ ទទួលផែនព្រំដែន ៕
ចែករំលែកព័តមាននេះ