ក្រុងតូក្យូ៖ មានបញ្ហាពាក់ព័ន្ធនឹងអន្ទង់ទៀតហើយ។ កាលពីម្សិលមិញព័ត៌មានពាក់ព័ន្ធនឹងគ្រូពេទ្យជនជាតិវៀតណាមវះកាត់ពោះវៀនរបស់បុរសជនជាតិឥណ្ឌាម្នាក់នៅមន្ទីរពេទ្យទីក្រុងហាណូយដើម្បីយកអន្ទង់ចេញពីក្នុងខ្លួនគាត់។ ដោយឡែក ថ្ងៃនេះមានព័ត៌មានពាក់ព័ន្ធនឹងការពុលអន្ទង់នៅប្រទេសជប៉ុនវិញម្ដង។
អន្ទង់អាំងជាប្រភេទអាហារដ៏ពេញនិយមនៅប្រទេសជប៉ុន។ ប៉ុន្តែថ្មីៗនេះមានរឿងដ៏គួរឱ្យសោកស្ដាយ១កើតឡើងដោយសារបរិភោគអន្ទង់អាំង។ ជនជាតិជប៉ុនម្នាក់ស្លាប់ និងជាង១៤០នាក់ទៀតធ្លាក់ខ្លួនដោយសារពុលអាហាប្រភេទនេះ។ នេះបើយោងតាមការបង្ហើបឱ្យដឹងពីម្ចាស់ផ្សារទំនើបដែលមានហាងលក់អន្ទង់អាំងបើកតូបលក់នៅក្នុងផ្សារនោះ។
អ្នកគ្រប់គ្រងផ្សារទំនើបខាងលើសូមអភ័យទោសចំពោះបញ្ហាដែលបានកើតឡើងដែលធ្វើឱ្យអតិថិជនជួបនឹងបញ្ហានេះបន្ទាប់ពីពួកគេទិញបាយប្រអប់សម្រាប់ញ៉ាំពេលថ្ងៃត្រង់ និងមានអន្ទង់អាំងសម្រាប់ញ៉ាំជាមួយបាយនោះ។ ក្រោយពេលបរិភោគរួច ពួកគេចាប់ផ្ដើមក្អួតចង្អោរ និងរាករូសដោយសារជាតិពុលជ្រាបចូលទៅក្នុងសរីរៈរាងកាយរបស់ពួកគេ។
នៅក្នុងចំណោមជនរងគ្រោះទាំងនោះ អតិថិជនម្នាក់ជាស្ត្រីវ័យ៩០ឆ្នាំប្លាយបានស្លាប់។ នេះបើយោងតាមអ្នកគ្រប់គ្រងផ្សារទំនើបប្រាប់អ្នកសារព័ត៌មាន។ គាត់បានឱនក្បាលចុះក្រោមបន្តិចដើម្បីជាការសូមទោស និងសម្ដែងមរណៈទុក្ខដ៏ស្មោះអស់ពីដួងចិត្តជូនចំពោះក្រុមគ្រួសារសពជនរងគ្រោះ។ នៅក្នុងមុខទំនិញដែលអតិថិជនទិញយកទៅបរិភោគនោះមានអន្ទង់អាំងដែលចម្អិនតាមប្រពៃណីរបស់ជប៉ុន។ នោះជាប្រភេទអន្ទង់ប្រឡាក់គ្រឿង ទឹកស៊ីអ៊ីវ និងស្រាស ហើយដោតនឹងតម្បុតយកទៅអាំង។
សូមជម្រាបថាសត្វអន្ទង់ត្រូវមនុស្សបរិភោគទូទាំងពិភពលោកគ្មានបញ្ហាអ្វីកើតឡើងទេបើសិនអន្ទង់នោះមានអនាម័យគ្រប់គ្រាន់ និងគ្មានមេរោគអ្វីនៅក្នុងខ្លួន។ ជាពិសេស ប្រជាជននៅទ្វីបអាស៊ីនិយមចូលចិត្តបរិភោគណាស់។ នៅប្រទេសជប៉ុន គេឃើញថាប្រជាជនបរិភោគអន្ទង់តាំងពីរាប់ពាន់ឆ្នាំមកហើយ។ លទ្ធផលស៊ើបអង្កេតរបស់អាជ្ញាធរសុខាភិបាលរកឃើញថានៅក្នុងអន្ទង់អាំងដែលអតិថិជនបរិភោគទៅធ្វើឱ្យធ្លាក់ខ្លួនឈឺសឹងស្លាប់សឹងរស់នោះមានផ្ទុកបាក់តេរីចម្លែកមួយប្រភេទ។
ម្ចាស់ហាងលក់អន្ទង់អាំងខាងលើនេះថ្លែងថាខ្លួនយកចិត្តទុកដាក់ខ្ពស់ចំពោះអ្វីដែលបានកើតឡើង ហើយក៏សោកស្ដាយសម្បើមណាស់ចំពោះហេតុការណ៍នេះ។ យើងនឹងសហការយ៉ាងពេញទំហឹងនៅក្នុងដំណើរការស៊ើបអង្កេតដែលធ្វើឡើងដោយអាជ្ញាធរសុខាភិបាល។ ហាងលក់អន្ទង់អាំងនៅក្នុងផ្សារទំនើបដែលកើតមានការពុលចំណីអាហារនោះជាហាងដែលមានទីស្នាក់ការធំនៅទីក្រុងតូក្យូ។ សាខានៅក្នុងផ្សារទំនើបខាងលើនេះជាអ្នករ៉ាប់រងចម្អិន និងលក់អន្ទង់អាំងទៅឱ្យអតិថិជន៕
ចែករំលែកព័តមាននេះ