ខេត្តកំពង់ស្ពឺ ៖ នៅរសៀលថ្ងៃទី២ និង៣០ខែកក្កដា ឆ្នាំ២០២៤ នៅទីតាំងទំនាស់រឿងចាក់ដីសាងសង់រោងចក្រនៅទំនប់អូរក្រាំងអំបិល បន្ទាប់ពីពលរដ្ឋម្ចាស់ដីបិទផ្លូវមិនឲ្យក្រុមឡានដឹកដីរបស់លោក លឹម ចាន់ថុល រត់កាត់ដីរបស់គេ…
ខេត្តកំពង់ស្ពឺ ៖ នៅរសៀលថ្ងៃទី២ និង៣០ខែកក្កដា ឆ្នាំ២០២៤ នៅទីតាំងទំនាស់រឿងចាក់ដីសាងសង់រោងចក្រនៅទំនប់អូរក្រាំងអំបិល បន្ទាប់ពីពលរដ្ឋម្ចាស់ដីបិទផ្លូវមិនឲ្យក្រុមឡានដឹកដីរបស់លោក លឹម ចាន់ថុល រត់កាត់ដីរបស់គេ រួចមក ពេលនេះ ថៅកែថុល បានបញ្ជាឲ្យឡានដឹកដីកូនចៅខ្លួន រត់លើផ្លូវជាតិលេខ៤យ៉ាងអនាធិបតេយ្យបំផុត ។
ការដឹកដីរបស់ក្រុមថៅកែ លឹម ចាន់ថុល នេះបង្កឲ្យប្រឡាក់ផ្លូវ ពិបាកដល់ពលរដ្ឋធ្វើដំណើរយ៉ាងខ្លាំង ជាងនេះទៅទៀត ប្រសិនបើមានភ្លៀងធ្លាក់ ធ្វើឲ្យផ្លូវបែកភក់ ពេញផ្លូវ ជាពិសេសអាចបង្កឲ្យអ្នកដំណើរដោយម៉ូតូងាយរងគ្រោះថ្នាក់បំផុត ។
យោងតាមប្រភព ដែលស្និទ្ធិនឹងថៅកែថុលបានបង្ហើបថា ថៅកែថុល គឺមានលោក អ៊ី លាងអេង ជាអ្នកបញ្ជាឲ្យឡានដឹកដីទាំងនោះ រត់តាមផ្លូវជាតិលេខ៤ នោះដែរ ។
ប្រជាពលរដ្ឋបានលើកឡើងជាចម្ងល់ថា ពួកគាត់ឆ្ងល់ណាស់ អាជ្ញាធរស្រុកសំរោងទង ទាំងមូលហាក់បីដូចជាមិនសូវអើពើទាល់តែសោះ នូវរាល់សកម្មភាពរបស់ថៅកែថុល និងលោក អ៊ី លាងអេង តែបើពលរដ្ឋ ឬក្រុមលោក អ៊ឹម សុជាតិ នាំគ្នាតវ៉ា យកលុយថ្លៃដីអស់លោកទាំងនោះ មិនអើពើស្វះស្វែងអន្តរាគមន៍សោះ ។
ជាក់ស្តែង កាលពីថ្ងៃទី២៧ ខែកក្កដា ឆ្នាំ២០២៤ លោក លឹម ចាន់ថុល និងបក្សពួកបានគ្នាទៅដកបង្គោលរបងដីរបស់ពលរដ្ឋពួកគាត់ មិនឃើញអស់លោកអាជ្ញាធរពាក់ព័ន្ឋណាមួយចេញមុខមកអន្តរាគមន៍សោះ អស់លោកធ្វើនេះ ហាក់បីដូចជាលំអៀងទៅរកអ្នកមានលុយពេកហើយ ។ រឿងដកបង្គោលរបងនេះ នៅមិនទាន់ចប់ទេ ដោយពលរដ្ឋរង់ចាំចំណាត់ការផ្លូវច្បាប់ ទៅលើថៅកែថុល ។ ពលរដ្ឋរង់ចាំមើលថា តើនៅពេលពលរដ្ឋប្តឹងលោក លឹម ចាន់ថុល តើអ្នកណាចេញមុខរត់ការ ?
យោងតាមប្រភពពីមន្ត្រី នៃមន្ទីររ៉ែ មួយរូប បានបង្ហើបប្រាប់ផងដែរថា កន្លងមក ខាងជំនាញបានចុះវាស់វែងរណ្តៅដីរបស់លោក លឹមចាន់ថុល ម្តងហើយឃើញថា ជីលខុសលក្ខណៈបច្ចេកទេស (ជ្រៅលើសកំណត់ក្រសួង) តែមិនដឹងថា លោកប្រធានមន្ទីរ គិតយ៉ាងណានោះទេឃើញស្ងាត់ឈឹងបាត់ទៅ ។ ករណីនេះ មានតែខាងជំនាញក្រសួងទេ ទើបចាត់ការបាន ព្រោះអ្នកតានៅខាងណេះ ដូចជាត្រូវសំណែនគេអស់ហើយ ។
ដោយឡែក ករណីឡានដឹកដីរត់លើផ្លូវជាតិលេខ៤នេះ តើលោកប្រធានមន្ទីរសាធារណការ មានជ្រាបរឿងនេះដែរ ឬទេ ? បើលោកមិនទាន់ជ្រាបទេ តាមរយៈការផ្សាយនេះ សូមលោកជួយចាត់វិធានការទប់ស្កាត់ កុំឲ្យមានការដឹកដីរត់លើផ្លូវជាតិលេខ៤នេះទៀត ព្រោះងាយបង្កគ្រោះថ្នាក់ខ្លាំងណាស់ ។
ពាក់ព័ន្ឋករណីនេះដែរ អ្នកយកព័ត៌មានយើង មិនអាចសុំការពន្យល់ពីលោកប្រធានមន្ទីរសាធារណការ និងសាមីខ្លួនពាក់ព័ន្ឋបានទេ ដោយពុំមានលេខទំនាក់ទំនង ៕
ចែករំលែកព័តមាននេះ