(អូឡាំពិក)៖ រូបភាពរបស់ អត្តពលិកប្រេស៊ីល លោក Gabriel Medina ឈរកណ្តាលអាកាស អបអរជ័យជម្នះ នៅឯកីឡាអូឡាំពិកទីក្រុងប៉ារីសឆ្នាំ២០២៤ បង្កភាពភ្ញាក់ផ្អើលទូទាំងពិភពលោក ដែលគេចាត់ទុកថានេះជារូបភាពដ៏អស្ចារ្យប្រចាំព្រឹត្តិការណ៍កីឡាអូឡាំពិក២០២៤។

នៅក្នុងជុំទី៣ នៃវិញ្ញាសារជិះស្គីលើទឹកនៅឯកីឡាអូឡាំពិករដូវក្តៅឆ្នាំនេះ អត្តពលិកប្រេស៊ីល Gabriel Medina ទទួលបាន ៩.៩ពិន្ទុ ដែលជាពិន្ទុខ្ពស់ក្នុងប្រវត្តិសាស្ត្រនៃការប្រកួត។នៅពេលអបអរសាទរចុងបញ្ចប់នៃការប្រកួតប្រជែង Medina បានបង្កើតឈុតឆាកដ៏គួរឱ្យភ្ញាក់ផ្អើលមួយ ដោយឈរនៅអណ្តែតកណ្តាលអាកាសជាមួយនឹងក្តារបន្ទះរបស់គាត់។

កំណត់ត្រាពិន្ទុ ៩.៩ជួយ Medina ឆ្លងផុតជុំទី៣ ហើយនឹងប្រកួតប្រជែងក្នុងវគ្គ ១/៤ ផ្តាច់ព្រ័ត្រ ដែលគ្រោងនឹងធ្វើឡើងនៅព្រឹកព្រលឹមថ្ងៃទី៣១ ខែកក្កដា។ សូមរំលឹកថាវិញ្ញាសាកីឡាជិះស្គីលើទឹក បានរៀបចំនៅកោះ Tahiti ជាទឹកដីបារាំងមានចំងាយ ១៦០០០គីឡូម៉ែត្រពីទីក្រុងប៉ារីស៕