ខេត្តកំពង់ស្ពឺ ៖ កាលពីវេលាម៉ោងប្រមាណ៧ និង១០នាទីព្រឹកថ្ងៃទី៣០ ខែកក្កដា ឆ្នាំ២០២៤ នេះ មានករណីបាក់ស្រុតដំបូលអគាររោងចក្រកំពុងសាងសង់មួយកន្លែងស្ថិតនៅក្នុងក្រុមហ៊ុន Ventura leatherwear…
ខេត្តកំពង់ស្ពឺ ៖ កាលពីវេលាម៉ោងប្រមាណ៧ និង១០នាទីព្រឹកថ្ងៃទី៣០ ខែកក្កដា ឆ្នាំ២០២៤ នេះ មានករណីបាក់ស្រុតដំបូលអគាររោងចក្រកំពុងសាងសង់មួយកន្លែងស្ថិតនៅក្នុងក្រុមហ៊ុន Ventura leatherwear (CD) Co.,Ltd មានអាសយដ្ឋានស្ថិតនៅតាមបណ្តោយផ្លូវជាតិលេខ៤១ ភូមិវាលវង់ ឃុំសែនដី ស្រុកសំរោងទង ខេត្តកំពង់ស្ពឺ ។
យោងតាមប្រភពបានឲ្យដឹងថា ការបាក់ស្រុតដំបូលអគារកំពុងសាងសង់នេះ មិនបណ្តាលឱ្យមានគ្រោះថ្នាក់ដល់កម្មករនោះទេ ព្រោះក្រុមកម្មករមិនទាន់ចាប់ផ្តើមធ្វើការងារនៅខាងក្នុងអគារនៅឡើយ ។ ប្រភពបន្តថា តាមកាសាកសួរព័ត៌មានទៅអ្នកគ្រប់គ្រងក្រុមហ៊ុនបានឱ្យដឹងថា អគារមានទំហំ៤,០០០ម៉ែត្រការ៉េអគារដែលកំពុងសាងសង់នេះ គឺជាអគារសាងសង់ថ្មី ជាអគារដែលថៅកែតម្រូវឱ្យធ្វើជាអគារផលិតកម្មគំរូ ជាន្លែងច្នៃម៉ូដ និងជាកន្លែងទទួលបដិសណ្ឋារកិច្ចភ្ញៀវ ដែលត្រូវធ្វើឱ្យបានល្អបំផុត ។
សូមបញ្ជាក់ថាកាលពីថ្ងៃទី១៣ ខែកក្កដា ឆ្នាំ២០២៤ លោកស្រីថៅកែក្រុមហ៊ុនបានមក ហើយបានទៅពិនិត្យស្ថានភាពសំណង់ ហើយថៅកែបានកត់សម្គាល់ថា អគារនេះ ធ្វើមិនបានត្រឹមត្រូវតាមស្តង់ដារដែលគាត់ចង់បាន នឹងបានតម្រូវឱ្យក្រុមហ៊ុនម៉ៅការសាងសង់ធ្វើការកែសម្រួលផ្នែកដំបូលឡើងវិញ ។
លុះដល់ព្រឹកថ្ងៃទី៣០ ខែកក្កដា ឆ្នាំ២០២៤ វេលាម៉ោង៧ និង១០នាទីព្រឹក ស្រាប់តែដំបូលអគារបានបាក់ស្រុតចុះមកតែម្តង ។ សមត្ថកិច្ចបានប្រាប់ថា ដោយសារជាអគារថ្មីកំពុងសាងសង់ ដូចនេះមិនទាន់មានកម្មករបំពេញការងារនៅក្នុងអគារនេះទេ គឺមានតែកម្មករសំណង់ ហើយនៅម៉ោង៧ និង១០នាទីនេះ កម្មករសំណង់ក៏មិនទាន់ចូលធ្វើការងារនោះដែ ដូចនេះ មិនមានគ្រោះថ្នាក់ដល់មនុស្សនោះទេ ។ ក្រុមហ៊ុននេះ ជាក្រុមហ៊ុនផលិតកាបូប មានកម្មករនិយោជិតសរុប៧,៦៦០នាក់ ស្រី៤៣២,៦នាក់ ៕
ចែករំលែកព័តមាននេះ