រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញ កាលពីព្រឹកថ្ងៃទី២៩ ខែកក្ដដា ឆ្នាំ២០២៤ បានលើកយកសំណុំរឿងជន ជាប់ចោទឈ្មោះ នី ណាក់…
រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញ កាលពីព្រឹកថ្ងៃទី២៩ ខែកក្ដដា ឆ្នាំ២០២៤ បានលើកយកសំណុំរឿងជន ជាប់ចោទឈ្មោះ នី ណាក់ ពាក់ពន្ធពីបទ.បរិហាកេរ្ត៍ជាសាធារណៈ និងញុះញង់ឲ្យមានការរើសអើង ។
ជនជាប់ចោទត្រូវបានអនុរ័ក្សពន្ធនាគារផ្ទេរពីពន្ធនាគារខេត្តត្បូងឃ្មុំ មកកាន់មណ្ឌលអប់រំកែប្រែទី១ និងនាំមកកាន់សាលាដំបូងរាជធានីភ្នំពេញ ដើម្បីចូលរួមសួរដេញដោល ក្នុងសវនាការតាមនីតិវិធី ។
សវនាការមានលោក ទិតសុទ្ធី បូរ៉ាឆាត ជាចៅក្រមជំនុំជម្រះ និងលោក សេង ហៀង ព្រះរាជអាជ្ញារង តំណាងអយ្យការអមសាលាដំបូងរាជធានីភ្នំពេញ និងចំពោះមុខមេធាវីក្ដីឲ្យភាគីវិវាទ ។ ដើមបណ្ដឹងក្នុងរឿងក្ដីនេះ គឺមេធាវីតំណាងឲ្យលោក ហេង សួរ រដ្ឋមន្ត្រីក្រសួងការងារ ដោយភ្ជាប់ នូវអង្គហេតុ នៃការផ្សព្វផ្សាយរបស់ជនជាប់ចោទឈ្មោះ នី ណាក់ តាមគណនីហ្វេសបុកឈ្មោះ «Iman KH» ដែលចោទប្រកាន់ថា លោក ហេង សួរ មានដីទំហំ ៩១ហិកតា នៅខេត្តកំពត ។
ក្រោយបញ្ចប់ការសាកសួរដេញដោល តុលាការបានសម្រេចលើក ប្រកាសសាលក្រមផ្តន្ទាទោសជនជាប់ចោទ ទៅថ្ងៃទី២២ ខែ សីហា ឆ្នាំ២០២៤ ខាងមុខនេះ ។
សូមជម្រាបថា លោក ញឹម ពិសាល ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី៥ ខែមករា ឆ្នាំ២០២៤ បានចេញ ដីកាបង្គាប់ឱ្យឃុំខ្លួនឈ្មោះ នី ណាក់ ភេទប្រុស អាយុ៤៥ឆ្នាំ មុខរបរអាជីវករ មានកន្លែងកំណើតភូមិរកា ឃុំរការ ស្រុកសង្កែ ខេត្ត បាត់ដំបង និងទីលំនៅមុនឃាត់ខ្លួនស្នាក់នៅផ្ទះលេខ៤៧ ផ្លូវបេតុង ភូមិគោកឃ្លាង ខណ្ឌសែនសុខ រាជធានីភ្នំពេញ ។
តាមដីកាបង្គាប់ឱ្យឃុំខ្លួនបញ្ជាក់ថា ជននេះត្រូវបានដាក់ឱ្យស្ថិតនៅក្រោមការពិនិត្យពីបទ.ការមិនរាងចាល ក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម បរិហារកេរ្តិ៍ជាសាធារណៈ និងញុះញង់ឱ្យមានការរើសអើង ប្រព្រឹត្តនៅរាជធានីភ្នំពេញ កាលពីថ្ងៃទី១២ ថ្ងៃទី១៧ ខែធ្នូ ឆ្នាំ២០២៣ បទល្មើសព្រហ្មទណ្ឌ ដែលមានចែងឱ្យផ្តន្ទាទោសតាមបញ្ញាត្តិមាត្រា ៨៨មាត្រា ៣០៧ មាត្រា៤៩៥ និងមាត្រា៤៩៦ នៃក្រមព្រហ្មទណ្ឌ ។
ជនជាប់ចោទឈ្មោះ នី ណាក់ ត្រូវបានសមត្ថកិច្ចឃាត់ខ្លួន និងបញ្ជូនទៅតុលាការភ្លាមៗ កាលពីព្រឹកថ្ងៃទី៥ ខែមករា ឆ្នាំ ២០២៤ ។
សូមជម្រាបទៀតថា ឈ្មោះ នី ណាក់ ធ្លាប់ជាប់ពន្ធនាគារម្តងរួចមកហើយ កាលពីឆ្នាំ២០២០ ក្រោមបទចោទ. ញុះញង់ឱ្យប្រព្រឹត្តបទឧក្រិដ្ឋ ទាក់ទិននឹងការប្រកាសពីផែនការទិញម៉ាស់មកពាក់ឱ្យសត្វមាន់ ក្នុងអំឡុងពេល នៃការឆ្លងរាតត្បាត នូវជំងឺកូវីដ១៩ ដោយតុលាការបានផ្តន្ទាទោសដាក់ពន្ធនាគាររយៈពេល១៨ ខែ ហើយជនជាប់ចោទបានអនុវត្តទោសគ្រប់ចំនួន និងបានចេញពីពន្ធនាគារវិញ កាលពីថ្ងៃទី១០ ខែមិថុនា ឆ្នាំ២០២១ ៕
ចែករំលែកព័តមាននេះ