ខេត្តកំពង់ស្ពឺ ៖ រឿងទិញដីមិនទាន់គិតគូរលុយកាក់ដែលនៅសល់រាប់លានដុល្លារ ដែលភាគីអ្នកទិញដី(ឈ្មួញកណ្តាលលោកស័ក្តិ៤កន្លះ អ៊ី លាងអេង) មិនទាន់ប្រគល់លុយឱ្យមកប្រជាពលរដ្ឋម្ចាស់ដីគ្រប់ចំនួនផងនោះ ធ្វើឱ្យមានចលាចលធ្វើបាតុកម្មតវ៉ាទាមទារថ្លៃជំពាក់ដី បែរជាលោកអ៊ី លាងអេង…
ខេត្តកំពង់ស្ពឺ ៖ រឿងទិញដីមិនទាន់គិតគូរលុយកាក់ដែលនៅសល់រាប់លានដុល្លារ ដែលភាគីអ្នកទិញដី(ឈ្មួញកណ្តាលលោកស័ក្តិ៤កន្លះ អ៊ី លាងអេង) មិនទាន់ប្រគល់លុយឱ្យមកប្រជាពលរដ្ឋម្ចាស់ដីគ្រប់ចំនួនផងនោះ ធ្វើឱ្យមានចលាចលធ្វើបាតុកម្មតវ៉ាទាមទារថ្លៃជំពាក់ដី បែរជាលោកអ៊ី លាងអេង មិនព្រមដោះស្រាយសោះ ។
លោក អ៊ឹម សុជាតិ អាយុ៤២ឆ្នាំ រស់នៅក្នុងភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ ជាម្ចាស់ដីផង និងជាតំណាងប្រជាពលរដ្ឋចំនួន៦៣គ្រួសារ បានចេញមកប្រតិកម្មថា លោកអ្នកកាសែតខ្លះ ព្រោះតែចង់បានលុយក្បត់វិជ្ជាជីវរបស់ខ្លួននិយាយតែមួយជ្រុង មិនចុះមកយកព័ត៌មានពិតពីប្រជាពលរដ្ឋផ្ទាល់ទេ បែរជាផ្សាយព័ត៌មានមិនពិតថែមទៀត លោកអត់មានអាណិតពលរដ្ឋម្ចាស់ដីទេ?
លោកអ៊ឹម សុជាតិ បានបញ្ជាក់ថា លោកទទួលបានលុយពីលោក អ៊ី លាងអេង ជិត៥លានដុល្លារតែប៉ុណ្ណោះ លុយដែលនៅសល់គីជាង២លានដុល្លារអាមេរិកទៀត ដែលលោកអ៊ី លាងអេងមិនទាន់ឲ្យ ។
លោក អ៊ឹម សុជាតិ បានបន្តថា ក្នុងនាមលោកជាម្ចាស់ដីម្នាក់ និងជាតំណាងប្រជាពលរដ្ឋចំនួន៦៣គ្រួសារ រស់នៅក្នុងភូមិបាក់ចិញ្ចៀន និងភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ បានព្រមព្រៀងលក់ដីទំហំ៣០ហិកតា ទៅឱ្យលោក អ៊ី លាងអេង ភេទប្រុស អាយុ៣៧ឆ្នាំ រស់នៅក្នុងភូមិត្រពាំងពី ឃុំគោកគង់លិច ស្រុកញ្ជ្រៀច ខេត្តព្រៃវែង កាលពីថ្ងៃទី០២ ខែវិច្ឆិកា ឆ្នាំ២០២៣។
លោកបន្តថា បច្ចុប្បន្នខាងក្រុមហ៊ុន(ភាគីចិន)ដែលជាថៅកែបានប្រគល់លុយគ្រប់ចំនួនទៅឱ្យភាគីលោក អ៊ី លាងអេង អស់ហើយ ។ ប៉ុន្តែក្នុងនាមលោកជាម្ចាស់ដីផង និងជាតំណាងប្រជាពលរដ្ឋផង ទើបតែទទួលលុយបានចំនួន៤.៩៧០.០០០ដុល្លារទេ គាត់នៅខ្វះខ្ញុំ និងប្រជាពលរដ្ឋសរុប២.១៦០.០០០ដុល្លារទៀត។
លោក អ៊ឹម សុជាតិ បានបន្តទៀតថា ចំពោះទំហំទឹកប្រាក់ដែលនៅសល់២.១៦០.០០០ដុល្លារនេះ សម្រាប់ទូទាត់ឱ្យទៅប្រជាពលរដ្ឋ១.៧០០.០០០ដុល្លារជាង ។ ហើយសល់ប៉ុន្មានគឺជាកតាព្វកិច្ចរបស់ខ្ញុំចាក់ដីបង្ហើយ ។
គួររំលឹកផងដែរថា កាលពីថ្ងៃទី១៧ ១៨ និងថ្ងៃទី១៩ ខែកក្កដា ឆ្នាំ២០២៤ កន្លងទៅ ប្រជាពលរដ្ឋជាច្រើននាក់ រស់នៅក្នុងភូមិបាក់ចិញ្ចៀន ភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ បាននាំគ្នាឈតវ៉ានៅមុខរោងចក្រដែលទើបសាងសងថ្មី ដើម្បីទាមទារលុយជាង២លានដុល្លារដែលខាងភាគីអ្នកទិញដី មិនទាន់ប្រគល់ឱ្យគ្រប់ចំនួនដល់ពួកគាត់ ។
ការតវ៉ារបស់ប្រជាពលរដ្ឋរយៈពេល៣ថ្ងៃនោះ ធ្វើឱ្យមានការចាប់អារម្មណ៍ដល់អាជ្ញាធរ ឃុំ ស្រុក និងខេត្ត មានកិច្ចអន្តរាគមន៍ចុះមកដល់ទីតាំង និងឈានទៅដល់សាលាខេត្តកំពង់ស្ពឺរហូតមកដល់ពេលនេះ មិនទាន់បានដោះស្រាយជូនប្រជាពលរដ្ឋបាននៅឡើយទេ ។
ពាក់ព័ន្ធនឹងរឿងទិញលក់ដីសាងសង់រោងចក្រ ហើយមិនទាន់ប្រគល់លុយគ្រប់ទៅប្រជាពលរដ្ឋម្ចាស់ដីនេះដែរ អ្នកយកព័ត៌មានយើងបានទាក់ទង ដើម្បីសួរនាំលោក អ៊ី លាងអេង ប៉ុន្តែលោកមិនបកស្រាយអ្វីឡើយ បែរជាសូមឱ្យអ្នកសារព័ត៌មានជួបមេធាវីរបស់លោកទៅវិញ។
សូមរំលឹកថា លោកវរសេនីយ៍ទោ អ៊ី លាងអេង ជាជំនួយការនៅអគ្គនាយកដ្ឋានសម្ភារបច្ចេកទេសក្រសួងការពារជាតិ ៕
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ