ឥណ្ឌូណេស៊ីដំណើរការ«ទិដ្ឋាការមាស»ជាផ្លូវការ ដើម្បីទាក់ទាញវិនិយោគិនបរទេស
រដ្ឋធានីហ្សាការតា ៖ ប្រធានាធិបតីឥណ្ឌូណេស៊ី ចូកូ វីដូដូ (Joko Widodo) កាលពីថ្ងៃទី២៥ ខែកក្កដា ឆ្នាំ២០២៤…
រដ្ឋធានីហ្សាការតា ៖ ប្រធានាធិបតីឥណ្ឌូណេស៊ី ចូកូ វីដូដូ (Joko Widodo) កាលពីថ្ងៃទី២៥ ខែកក្កដា ឆ្នាំ២០២៤ បានប្រកាសថា ប្រទេសឥណ្ឌូណេស៊ី បានចាប់ផ្តើមដំណើរការទិដ្ឋាការរយៈពេលវែង ដែលត្រូវបានប្រសិទ្ធនាមថា «ទិដ្ឋាការមាស» ជាផ្លូវការ ក្នុងគោលបំណងទាក់ទាញជនបរទេស ជាពិសេសវិនិយោគិនបរទេស សម្រាប់ការចេញ-ចូលប្រទេសសេដ្ឋកិច្ចធំបំផុតនៅអាស៊ីអាគ្នេយ៍មួយនេះ។
តាមប្រភពពីទីភ្នាក់សារព័ត៌មាន Reuters កាលពីថ្ងៃទី២៥ ខែកក្កដា ឆ្នាំ២០២៤ បានរាយការណ៍ថា «ទិដ្ឋាការមាស» សម្រាប់រយៈពេល៥ឆ្នាំ តម្រូវឱ្យវិនិយោគិនម្នាក់ បង្កើតក្រុមហ៊ុនមានតម្លៃចាប់ពី២.៥លានដុល្លារ ខណៈដែលទិដ្ឋាការរយៈពេល១០ឆ្នាំ ទាមទារការវិនិយោគចាប់ពី៥លានដុល្លារ។
ចំពោះបុគ្គលដែលមិនមានបំណងចង់បើកក្រុមហ៊ុន ពួកគេត្រូវដាក់ប្រាក់តម្កល់ចំនួន៣៥០,០០០ដុល្លារ ដើម្បីទទួលបានការស្នាក់នៅរយៈពេល៥ឆ្នាំ និង៧០ម៉ឺនដុល្លារ សម្រាប់រយៈពេល១០ឆ្នាំ។ ហើយប្រាក់ទាំងនោះ អាចត្រូវបានប្រើប្រាស់ដើម្បីទិញមូលបត្របំណុលរដ្ឋាភិបាលឥណ្ឌូណេស៊ី ក៏ដូចជាភាគហ៊ុនក្រុមហ៊ុនសាធារណៈ ឬដាក់ប្រាក់បញ្ញើជាដើម។
ដោយឡែក ការវិនិយោគសាជីវកម្មតម្រូវឱ្យវិនិយោគចំនួន ២៥លានដុល្លារអាមេរិក ដើម្បីទទួលបានទិដ្ឋាការរយៈពេល៥ឆ្នាំ សម្រាប់បុគ្គលតំណែងជានាយកក្រុមហ៊ុន។ ហើយពួកគេត្រូវវិនិយោគ៥០លានដុល្លារ ដើម្បីទទួលបានទិដ្ឋាការរយៈពេល១០ឆ្នាំ។ ប្រភពពីកាសែត The Jakarta Post កាលពីថ្ងៃទី២៥ ខែកក្កដា ឆ្នាំ២០២៤ បានឱ្យដឹងថា ការចាប់ផ្តើមដំណើរការទិដ្ឋាការមាសជាផ្លូវការនេះ ប្រធានាធិបតីឥណ្ឌូណេស៊ីបានគូសបញ្ជាក់ថា ដើម្បីទទួលបានជនបរទេស ជាពិសេសវិនិយោគិនបរទេសដែលមានគុណភាព។ ហើយលោកក៏បានព្រមានប្រឆាំងនឹងអ្នកចំណូលថ្មី ដែលមិនផ្តល់អត្ថប្រយោជន៍ ឬអាចបង្កបញ្ហាគំរាមកំហែងដល់សន្តិសុខជាតិ។
លោក Silmy Karim ប្រធានទីភ្នាក់ងារអន្តោប្រវេសន៍ជាតិឥណ្ឌូណេស៊ី បានថ្លែងថា ប្រទេសឥណ្ឌូណេស៊ីបានផ្តល់ទិដ្ឋាការមាសដល់បុគ្គលជិត៣០០នាក់ ចាប់តាំងពីការ ចាប់ផ្តើមសាកល្បង កាលពីឆ្នាំមុន ដោយបានទាក់ទាញការវិនយោគសរុបចំនួន ១២៣លានដុល្លារ។
ទន្ទឹមនឹងនេះ លោកបានបន្ថែមថា អាជ្ញាធរក៏កំពុងតែពិភាក្សាអំពីការផ្តល់ជូនពិសេស សម្រាប់ជនបរទេសមានដើមកំណើតឥណ្ឌូណេស៊ី ដោយយកគំរូតាម Overseas Citizenship of India (OCI) របស់ប្រទេសឥណ្ឌា ដែលអនុញ្ញាតឱ្យជនបរទេសមានដើមកំណើតឥណ្ឌាអាចមកលេង ធ្វើការ និងរស់នៅក្នុងប្រទេសឥណ្ឌា ដោយគ្មានកំណត់៕ (ប្រភព ៖ Reuters និង The Jakarta Post)
ចែករំលែកព័តមាននេះ