ជនជាតិបង់ក្លាដេសបើកបររថយន្តតូយ៉ូតាអាល់ហ្វាត ធ្លាក់ផ្លូវ នគរបាលស្ទូចយកទៅទុកទាំងព្រឹក
រាជធានីភ្នំពេញ ៖ រថយន្តម៉ាករថយន្តតូយ៉ូតា អាល់ហ្វាត (TOYOTA ALPHARD) ១គ្រឿង បើកបរ និងជិះដោយបុរសជនជាតិបង់ក្លាដេស ចំនួន៣នាក់…
រាជធានីភ្នំពេញ ៖ រថយន្តម៉ាករថយន្តតូយ៉ូតា អាល់ហ្វាត (TOYOTA ALPHARD) ១គ្រឿង បើកបរ និងជិះដោយបុរសជនជាតិបង់ក្លាដេស ចំនួន៣នាក់…
រាជធានីភ្នំពេញ ៖ រថយន្តម៉ាករថយន្តតូយ៉ូតា អាល់ហ្វាត (TOYOTA ALPHARD) ១គ្រឿង បើកបរ និងជិះដោយបុរសជនជាតិបង់ក្លាដេស ចំនួន៣នាក់ ខណៈពេលបើកបរសុខៗ ស្រាប់តែរេចង្កូតធ្លាក់ផ្លូវផ្អៀងមួយចំហៀង វិះនឹងក្រឡាប់ធ្លាក់ចូលប្រឡាយទៅហើយ ដោយពុំដឹងថា អ្នកបើកបរស្រវឹងស្រា ឬក៏ងងុយដេកហើយងោកនោះឡើយ ទើបជួបបញ្ហាបែបនេះ ប៉ុន្តែពុំបានបណ្ដាលឲ្យពួកគាត់រងរបួសឡើយ។ ក្រោយពេលកើតហេតុ ដោយខ្លាចរថយន្តនេះ មានជាប់ពាក់ព័ន្ធ និងបទល្មើសអ្វីមួយនោះ នគរបាលក៏បានស្ទូចយកទៅរក្សាទុកនៅប៉ុស្តិ៍ ដើម្បីធ្វើការស្រាវជ្រាវ និងរង់ចាំឲ្យម្ចាស់យកឯកសារទៅផ្ទៀងផ្ទាត់ឲ្យច្បាស់លាស់ទើបប្រគល់ជូនវិញ ។
ឧប្បត្តិហេតុនោះបានកើតឡើងកាលពីវេលាម៉ោង៦ព្រឹកថ្ងៃទី១៧ ខែតុលា ឆ្នាំ២០២៤ នៅតាមផ្លូវបេតុងចូលវត្តពោធិ៍វ័ន ស្ថិតនៅក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
បុរសអ្នកច្រូតស្មៅគោម្នាក់ បានប្រាប់ឲ្យដឹងថា នៅមុនពេលកើតហេតុ ខណៈដែលគាត់កំពុងរកច្រូតស្មៅឲ្យគោស៊ី ក៏បានឃើញរថយន្ត ១គ្រឿង ម៉ាកតូយ៉ូតា អាល់ហ្វាត ពណ៍ស ពាក់ស្លាកលេខភ្នំពេញ 2BS-2010 បើកបរធ្វើដំណើរតាមផ្លូវបេតុងខាងលើ ក្នុងទិសដៅពីកើតទៅលិច។ លុះពេលទៅដល់ត្រង់ចំណុចកើតហេតុ ពុំដឹងថា អ្នកបើកបររថយន្តនេះស្រវឹងស្រា ឬងងុយដេក ហើយងោកនោះឡើយ ស្រាប់តែរេចង្កូតធ្លាក់ផ្លូវផ្អៀងមួយចំហៀង ដែលនៅតែបន្តិចប៉ុណ្ណោះ និងក្រឡាប់ធ្លាក់ចូលក្នុងប្រឡាយទឹកបាត់ទៅហើយ ។
អ្នកច្រូតស្មៅគោខាងលើ បានប្រាប់ឲ្យដឹងបន្តទៀតថា បន្ទាប់មកអ្នកជិះក្នុងរថយន្តរួមទាំងអ្នកបើកបរសរុបចំនួន៣នាក់ បានចេញពីក្នុងរថយន្ត ហើយមុនដំបូងគាត់ស្មានថា ជាជនជាតិខ្មែរ តែនៅពេលបានឮការនិយាយគ្នា ទើបដឹងថាជាជនបរទេស ប៉ុន្តែគាត់ក៏មិនដឹងថា ជនជាតិអ្វីដែរ ព្រោះគាត់មិនចេះស្ដាប់ភាសា អ្នកទាំង៣នាក់នោះទេ ហើយបន្តិចក្រោយមក អ្នកបើកបររថយន្តក៏បានចាកចេញទៅបាត់ ដោយទុកតែអ្នករួមដំណើរ ២នាក់ នៅនឹងកន្លែងកើតហេតុប៉ុណ្ណោះ ។
នគរបាលបានប្រាប់ថា អ្នកបើកបរ និងអ្នកនៅក្នុងរថយន្តនេះ គឺជាជនជាតិបង់ក្លាដេស ហើយពុំទាន់ដឹងថា ស្រវឹងស្រា ឬងងុយដេកនោះទេ ទើបបានជាបើករថយន្តធ្លាក់ផ្លូវបែបនេះ ដោយឡែករថយន្តនោះវិញ ក៏ពុំទាន់ដឹងថាមានជាប់ពាក់ព័ន្ធទៅនិងបទល្មើសដែរឬអត់នៅឡើយទេ ។
ក្រោយពេលកើតហេតុកម្លាំងនគរបាលប៉ុស្តិ៍សំរោងក្រោម និងនគរបាលខណ្ឌពោធិ៍សែនជ័យ បាននាំយករថយន្តស្ទូច ទៅស្ទូចយករថយន្តនោះ ទៅរក្សាទុកនៅប៉ុស្តិ៍ ដើម្បីធ្វើការស្រាវជ្រាវនិងឲ្យម្ចាស់យកឯកសារទៅផ្ទៀងផ្ទាត់ឃើញថាត្រឹមត្រូវ គ្មានបទល្មើស ទើបប្រគល់ជូនវិញ ៕
ចែករំលែកព័តមាននេះ