ខេត្តបាត់ដំបង៖ លំនៅឋានដ៏ធំមួយខ្នងត្រូវអគ្គិភ័យដែលគេមិនទាន់ដឹងពីមូលហេតុឆាបឆេះអស់ស្ទើរទាំងស្រុងផ្នែកខាងក្រោយ និងអស់ប្រហែលជាង៣០%នៃទំហុំផ្ទះទាំងមូល កាលពីវេលាម៉ោងជិត១រំលងអធ្រាត្រឈានចូលថ្ងៃទី២៦ កក្កដា នៅក្នុងភូមិរំចេក១ សង្កាត់រតនៈ ក្រុងបាត់ដំបង តែពុំមានគ្រោះថ្នាក់មនុស្សទេ ។
យោងតាមរបាយការណ៍បឋមរបស់មន្ត្រីពន្លត់អគ្គិភ័យបានឲ្យដឹងថា លំនៅឋានដែលត្រូវភ្លើងឆេះផ្អើលកណ្ដាលអធ្រាត្រនោះ មានទំហុំ៨,៥ម៉x៤៣ម៉ ធ្វើពីថ្ម និងដែក ដែលមានម្ចាស់ឈ្មោះ ពូន សុជាតិ ភេទស្រី អាយុ៥០ឆ្នាំ ។ ប៉ុន្តែរបាយការណ៍មិនបាននិយាយពីមូលហេតុ ដែលនាំឲ្យមានអគ្គិភ័យនេះ កើតឡើងនោះទេ សូម្បីម្ចាស់ផ្ទះក៏នៅមិនទាន់ហ៊ានសន្និដ្ឋានដែរ ដោយមន្ត្រីជំនាញគ្រាន់តែប្រាប់ថា «កំពុងស្រាវជ្រាវបន្ត» ។
អធិការក្រុងបាត់ដំបង លោកពេជ្រ សារ៉ែន បានប្រាប់ថា លំនៅឋាននោះមានទំហំធំវែង ទៅផ្នែកខាងក្រោយ ។ លោកថា ផ្ទះនេះផ្នែកខាងមុខធ្វើពីថ្ម រីឯផ្នែកខាងក្រោយ ជាផ្ទះបាយធ្វើពីថ្មីនិងដែក ។ ប៉ុន្តែអគ្គិភ័យបានឆេះផ្នែកខាងក្រោយនៃផ្ទះបាយអស់ប្រហែល៥០% រីឯផ្ទះផ្នែកខាងមុខឆេះរោលជញ្ជាំង តែសម្ភារ ឬអីវ៉ាន់ផ្សេងៗនៅក្នុងផ្ទះបាយឆេះអស់ទាំងស្រុងតែម្ដង ។
នៅក្នុងគ្រោះអគ្គិភ័យនេះ គេឃើញលោកដាញ់ អេងប៊ុនចាន់ ស្នងការខេត្ត ដឹកនាំកម្លាំងចុះអន្តរាគមន៍ទាំងកណ្ដាលយប់ជាមួយនឹងប្រជាពលរដ្ឋយ៉ាងច្រើនសន្ធឹកសន្ធាប់ និងរថយន្តពន្លត់អគ្គីភ័យរបស់សមត្ថកិច្ចជាច្រើនគ្រឿងបានចេញអន្តរាគមន៍ ។
បើតាមមន្ត្រីពន្លត់អគ្គិភ័យបានបញ្ជាក់ថា ពិតមែនតែភ្លើងបានឆេះអស់ផ្ទះបាយស្ទើរ៥០% តែមន្ត្រីជំនាញ បានប្រឹងប្រែងបាញ់ទឹកទប់ស្កាត់មិនឲ្យឆេះរាលដាលទៅកាន់ផ្ទះនៅក្បែរខាងបានឡើយ ។ ប៉ុន្តែយ៉ាងណា មន្ត្រីជំនាញមិនទាន់ដឹងថា តើជនរងគ្រោះបានខូចខាត ឬបាត់បង់អ្វីខ្លះនោះទេ? ដោយគ្រាន់តែបញ្ជាក់ថា មន្ត្រីជំនាញកំពុងសួរនាំម្ចាស់ផ្ទះ ៕
ចែករំលែកព័តមាននេះ