ខេត្តពោធិ៍សាត់៖ សព្វថ្ងៃនេះ កម្លាំងគណៈបញ្ជាការឯកភាពរដ្ឋបាលខេត្តចំនួន៥០នាក់ បានបែងចែកជា៥ក្រុមបានចូលរួមជាមួយកម្លាំងកងយោធពលខេមរភូមិន្ទ ក្រោមការដឹកនាំបញ្ជាផ្ទាល់ពីនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរៈភូមិន្ទបន្តរុករកទាំងយប់ទាំងថ្ងៃតាមជួរភ្នំក្រវាញ ជួរភ្នំសំកុស…
ខេត្តពោធិ៍សាត់៖ សព្វថ្ងៃនេះ កម្លាំងគណៈបញ្ជាការឯកភាពរដ្ឋបាលខេត្តចំនួន៥០នាក់ បានបែងចែកជា៥ក្រុមបានចូលរួមជាមួយកម្លាំងកងយោធពលខេមរភូមិន្ទ ក្រោមការដឹកនាំបញ្ជាផ្ទាល់ពីនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរៈភូមិន្ទបន្តរុករកទាំងយប់ទាំងថ្ងៃតាមជួរភ្នំក្រវាញ ជួរភ្នំសំកុស ភ្នំខ្មោច តំបន់យាយម៉ៅភ្នំ១៥០០ និងអូរជាំស្លាឃុំថ្មដា ស្រុកវាលវែងងជាប់ព្រំប្រទល់ខេត្តកោះកុង ប៉ុន្តែភូមិសាស្ត្រមានភាពស្មុគស្មាញខ្លាំង និងអាកាសធាតុមិនអំណោយផលសោះ ប៉ុន្តែទោះយ៉ាងណាកម្លាំងមុតស្រួចទាំងអស់ ពុំមានការរាថយនោះឡើយ ។ សូមរំលឹកថា៖ កម្លាំងចម្រុះជាង១ពាន់នាក់បន្តប្រតិបត្តិការរុករកឧទ្ធម្ភាគចក្រដែលកំពុងបាត់ការទាក់ទង
សូមបញ្ជាក់ថា កាលពីរសៀលថ្ងៃទី២៤ កក្កដា ឆ្នាំ២០២៤ លោក ខូយ រីដា ប្រធានគណៈបញ្ជាការឯកភាពរដ្ឋបាលខេត្តពោធិ៍សាត់ និងលោកម៉ក់ រ៉ា ប្រធានក្រុមប្រឹក្សាខេត្ត បានអញ្ជើញសួរសុខទុក្ខកងកម្លាំងចម្រុះខេត្ត ដែលកំពុងប្រតិបត្តិការរុករកឧទ្ធម្ភាគចក្រកងទ័ពជើងអាកាសដែលបានធ្លាក់បាត់ កាលពីថ្ងៃទី១២ ខែកក្កដា ឆ្នាំ២០២៤ ស្ថិតក្នុងភូមិសាស្ត្រឃុំថ្មដា ស្រុកវាលវែង ព្រំប្រទល់ខេត្តពោធិ៍សាត់ និងខេត្តកោះកុង ។
ក្នុងឱកាសនោះ លោក ខូយ រីដា បាននាំយកថវិការបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឧបត្ថម្ភដល់កងកម្លាំងចម្រុះ និងគ្រូពេទ្យនៅទីនោះប្រមាណ៥០នាក់ ក្នុងម្នាក់ៗទទួលបាន៤០ម៉ឺនរៀល រួមជាមួយអំណោយរបស់ក្រុមប្រឹក្សាខេត្ត មានអង្ករ១តោន និងថវិកា១លាន៣សែនរៀលផងដែរ ។
លោក ខូយ រីដា និង ម៉ក់ រ៉ា បានសម្ដែងការកោតសរសើរចំពោះកងកម្លាំងចម្រុះទាំងអស់ ដែលបានពុះពារទាំងយប់ទាំងថ្ងៃ ក្នុងការជួយរុករកឧទ្ធម្ភាគចក្រមួយគ្រឿងរបស់កងទ័ពជើងអាកាសដែលជួបឧបទ្ទវហេតុធ្លាក់បាត់ក្នុងភូមិសាស្ត្រឃុំថ្មដា ស្រុកវាលវែង ក្នុងពេលកំពុងហ្វឹកហាត់នាពេលថ្មីៗនេះ ទោះបីជួបឧបសគ្គឡើងភ្នំចុះភ្នំ ជ្រោះជ្រងជ្រលងដងអូរ ព្រៃជ្រៅ ព្យុះភ្លៀង សត្វទាក និងបញ្ហាប្រឈមផ្សេងៗទៀតក៍ដោយ។
ឯកឧត្តមបានផ្ដាំផ្ញើដល់កងកម្លាំងចម្រុះទាំងអស់ ត្រូវមានការប្រុងប្រយ័ត្នខ្ពស់ ថែរក្សាសុខភាព និងចេះជួយគ្នាក្នុងគ្រាមានអាសន្ន ។
សូមបញ្ជាក់ទៀតថា ឧទ្ធម្ភាគចក្រមួយគ្រឿងរបស់កងទ័ពជើងអាកាស ដែលបាត់ដានធ្លាក់នៅឃុំថ្មដាស្រុកវាលវែង គិតមកដល់ថ្ងៃទី២៥ ខែកក្កដា ឆ្នាំ២០២៤ នេះ មានរយៈពេលជិត២សប្ដាហ៍ហើយ រកមិនទាន់ឃើញនៅឡើយទេ ។
ចែករំលែកព័តមាននេះ