ខេត្តបន្ទាយមានជ័យ ៖ ប្រឡាយទឹកដែលហូរចេញពីអូរព្រំដែន ស្រាប់តែមានក្លិនស្អុយអាសោចន៍ សង្ស័យទឹកស្អុយនេះបង្ហូរចេញពីកាស៊ីណូចូលអូរ ស្ថិតនៅចំណុចភូមិសុខសាន្ត សង្កាត់និមិត្ត ក្រុងប៉ោយប៉ែត គិតត្រឹមថ្ងៃទី២២ កក្កដា…
ខេត្តបន្ទាយមានជ័យ ៖ ប្រឡាយទឹកដែលហូរចេញពីអូរព្រំដែន ស្រាប់តែមានក្លិនស្អុយអាសោចន៍ សង្ស័យទឹកស្អុយនេះបង្ហូរចេញពីកាស៊ីណូចូលអូរ ស្ថិតនៅចំណុចភូមិសុខសាន្ត សង្កាត់និមិត្ត ក្រុងប៉ោយប៉ែត គិតត្រឹមថ្ងៃទី២២ កក្កដា ២០២៤ ។
ប្រជាពលរដ្ឋបានប្រាប់ថា ទឹកប្រឡាយដែលហូរចេញពីអូរព្រំដែនចូលមកប្រឡាយមេ ស្ថិតក្នុងភូមិសុខសាន្ត កំពុងមានក្លិនស្អុយដែលមិនអាចប្រើប្រាស់បាន សូម្បីតែដើរកាត់ត្រង់ចំណុចសំណង់ទ្វារទឹកក៏ធុំក្លិនស្អុយទៅហើយ និងមានទឹកពណ៌ខៀវបែកពពុះសាប៊ូទៀតផង ។ រីឯត្រីដែលនេសាទបានគឺមិនអាចយកយកធ្វើម្ហូបហូបបានទេ ព្រោះទឹកនេះក្លិនស្អុយខ្លាំង ប្រជាពលរដ្ឋមិនហ៊ានយកទឹកនេះប្រើប្រាស់ផងដែរ ។
ប្រជាពលរដ្ឋបានបញ្ជាក់ទៀតថា ទឹកស្អុយនេះមានប្រភពចេញបង្ហូរចូលពីតំបន់កាស៊ីណូជាប់អូរព្រំដែនដែលបង្ហូរចូលក្នុងអូរត្រង់ចំណុចខាងត្បូងស្ពានមិត្តភាពកម្ពុជា-ថៃ ត្រូវបានហូរធ្លាក់ចូលតាមអូរព្រំដែនទៅផ្នែកខាងក្រោមដែលហូរចូលត្រង់ចំណុចស្ទឹងបត់ ហូរធ្លាក់ចូលប្រឡាយមេ ទៅភូមិសុខសាន្ត អាចហូរធ្លាក់ចូលទៅអូរដុងអារ័ញ្ញ ផ្នែកខាងក្រោម ហើយសុំអោយអាជ្ញាធរក្រុង/ខេត្ត និងមន្ទីរជំនាញចុះពិនិត្យរកដំណោះស្រាយជូនប្រជាពលរដ្ឋបានប្រើប្រាស់ទឹកកុំអោយមានទឹកស្អុយចូល ។
លោកខាត់ ធា ចៅសង្កាត់និមិត្តបានប្រាប់ថា ទឹកចំណុចប្រឡាយមេ ស្ថិតភូមិសុខសាន្តពិតជាមានក្លិនស្អុយពិតមែន ដែលជាទឹកហូរមកពីអូរព្រំដែនទឹកកខ្វក់ ហើយត្រូវបានបិទត្រឹមសំណង់ទឹក ចំណុចភូមិសុខសាន្ត មិនបានបើកទំលាក់ទៅផ្នែកខាងក្រោមនោះទេ បើនៅរដូវវស្សាទឹកច្រើនអាចបើករំដោះទៅផ្នែកខាងក្រោមខ្លះ ។
លោកបានបញ្ជាក់ថា បញ្ហាទឹកស្អុយចេញពីអូរព្រំដែនត្រូវបានអាជ្ញាធរក្រុង និងខេត្តកំពុងគិតគូរ និងដោះស្រាយជូនដោយបង្កើតស្ថានីយប្រតិកម្មទឹក ឬអាងបម្លែងទឹក ហើយរាជរដ្ឋាភិបាលកម្ពុជាគម្រោងអភិវឌ្ឍន៍ទីក្រុងចង់រស់នៅទៅពេលអនាគត់នៅក្រុងប៉ោយប៉ែត ។
ចែករំលែកព័តមាននេះ