ទីក្រុងប៉េកាំង៖ នៅរសៀលថ្ងៃសៅរ៍ ប្រធានាធិបតីចិន លោកស៊ីជីនពីង បានអំពាវនាវឱ្យគ្រប់ស្ថាប័នពាក់ព័ន្ធទាំងអស់ត្រូវតែខិតខំឱ្យអស់ពីសមត្ថភាពដើម្បីជួយសង្គ្រោះអាយុជីវិតរបស់មនុស្សដែលត្រូវរបួស និងបាត់ខ្លួននៅក្នុងហេតុការណ៍បាក់ស្ពាន១កន្លែងធ្លាក់ចូលទៅក្នុងទឹកដែលហូរត្របាញ់គ្នាដោយកម្លាំងខ្សែទឹក។ គេដឹងថាមនុស្សយ៉ាងតិច១១នាក់បានស្លាប់ហើយនៅក្នុងហេតុការណ៍នេះ។ នេះបើយោងតាមការផ្សាយរបស់សារព័ត៌មានរដ្ឋ។
ឧបទ្ទវហេតុនេះកើតឡើងកាលពីវេលាម៉ោង៨:៤០យប់ថ្ងៃសុក្រនៅទីក្រុងសាងលួ (Shangluo)។ កាលនោះមានជំនន់ទឹកភ្លៀងហូរចាក់ពីតំបន់ខ្ពង់រាបធ្លាក់ទៅតំបន់ទំនាប ហើយធ្វើឱ្យយានជំនិះជាច្រើនគ្រឿងធ្លាក់ចូលទៅក្នុងទឹកនៅពេលពួកគេជិះកាត់ស្ពាន។ គិតត្រឹមម៉ោង១០ព្រឹកថ្ងៃសៅរ៍ គេស្រង់បានយានជំនិះ៥គ្រឿង ខណៈដែលមនុស្ស៣០នាក់នៅបាត់ខ្លួន។
លោកស៊ីជីនពីងថ្លែងថាប្រទេសចិនកំពុងស្ថិតនៅក្នុងដំណាក់កាលដ៏ផុយស្រួយបំផុតប្រឈមនឹងគ្រោះទឹកជំនន់នៅរដូវវស្សាឆ្នាំនេះ។ ដូច្នេះ លោកសូមអំពាវនាវឱ្យមន្ត្រីរដ្ឋបាលថ្នាក់មូលដ្ឋានត្រូវតែយកចិត្តទុកដាក់ខ្ពស់នៅក្នុងការងាររបស់ខ្លួនដើម្បីពង្រឹងការឃ្លាំមើលសភាពការណ៍ជាក់ស្ដែង និងចេញសេចក្ដីប្រកាសអាសន្នទុកជាមុនឱ្យបានទាន់ពេលវេលា។
អាជ្ញាធរចិនបានបញ្ជូនកម្លាំងមកពីការិយាល័យជាតិគ្រប់គ្រងអគ្គិភ័យ និងការិយាល័យជួយសង្គ្រោះដើម្បីចុះទៅកន្លែងកើតហេតុ។ ក្នុងនោះ មានកម្លាំងមនុស្ស៨៥៩នាក់ យានជំនិះ៩០គ្រឿង ទូកកៅស៊ូ២០គ្រឿង និងយន្តហោះដ្រូន៤១គ្រឿង។ យោងតាមការផ្សាយរបស់ទីភ្នាក់ងារព័ត៌មានស៊ីនហួរ, ស្ពាននៅទីក្រុងសាងលួ ខេត្តសានស៊ីបានបាក់គ្រឹបទៅក្នុងទឹកទាំងកណ្ដាលយប់នៅពេលមនុស្សកំពុងធ្វើដំណើរនៅលើនោះ។ ហេតុនេះពួកគេមិនអាចរំដោះខ្លួនទាន់ពេលវេលាបានឡើយ។
ប្រទេសចិនភាគខាងជើង និងភាគកណ្ដាលកំពុងមានភ្លៀងធ្លាក់ខ្លាំងណាស់ពេញ១សប្ដាហ៍មកហើយ។ ដូចនេះ មានទឹកជំនន់ល្ហល្ហាច ហើយមានការខូចខាតជាច្រើនកន្លែង។ នៅទីក្រុងប៉ាវជី (Baoji) ខេត្តសានស៊ីដដែល មនុស្សយ៉ាងតិច៥នាក់បានស្លាប់ និង៨នាក់ទៀតបាត់ខ្លួនបន្ទាប់ពីមានគ្រោះទឹកជំនន់ និងការបាក់ដីជាច្រើនកន្លែង។ ខេត្តជិតខាងនោះដូចជាកានស៊ូ និងហឺណាន (Gansu & Henan) ក៏មានភ្លៀងធ្លាក់ខ្លាំងផងដែរ។ នៅទីក្រុងណានយ៉ាងនៃខេត្តកានស៊ូ គេឃើញថាភ្លៀងធ្លាក់ខ្លាំងបំផុត។ ត្រឹមតែរយៈពេលប៉ុន្មានថ្ងៃប៉ុណ្ណោះ ទីក្រុងនេះទទួលបានរបបទឹកភ្លៀងស្មើនឹងរយៈពេលពេញមួយឆ្នាំ។
នៅឆ្នាំនេះ ប្រទេសចិនជួបប្រទះនឹងអាកាសធាតុក្ដៅហួតហែងខ្លាំងនៅរដូវប្រាំង។ នៅពេលឈានដល់រដូវវស្សា តំបន់ភាគកណ្ដាល និងភាគខាងត្បូងមានភ្លៀងធ្លាក់ខ្លាំង និងគ្រោះទឹកជំនន់។ ចំណែកបណ្ដាខេត្តភាគខាងជើងបែរជាទទួលរងអាកាសក្ដៅខ្លាំង។ កាលពីដើមខែកក្កដានេះ ប្រទេសចិនភាគខាងកើតទទួលរងខ្យល់ព្យុះកំបុតត្បូងដ៏ធំ១ដែលបណ្ដាលឱ្យមនុស្សម្នាក់ស្លាប់ និង៧៩នាក់រងរបួស។ ខ្យល់ព្យុះនេះក៏បង្កការខូចខាតចំពោះហេដ្ឋារចនាសម្ព័ន្ធច្រើនគួរសមផងដែរ។ អ្នកវិទ្យាសាស្ត្រអះអាងថាគ្រោះធម្មជាតិដ៏អាក្រក់ទាំងនេះបណ្ដាលមកពីការប្រែប្រួលអាកាសធាតុ៕
ចែករំលែកព័តមាននេះ