ខេត្តកំពង់ស្ពឺ ៖ អស់រយ:ពេលច្រើនថ្ងៃមកហើយ ដែលប្រជាពលរដ្ឋជាច្រើននាក់ រស់នៅក្នុងឃុំត្រពាំងគង ស្រុកសំរោងទង នៅរសៀលថ្ងៃទី១៩ ខែកក្កដា ឆ្នាំ២០២៤ បានបន្តប្រមូលគ្នាតវ៉ានៅមុខផ្លូវចូលកន្លែងសាងសង់រោងចក្រសុំឲ្យថៅកែចិន…
ខេត្តកំពង់ស្ពឺ ៖ អស់រយ:ពេលច្រើនថ្ងៃមកហើយ ដែលប្រជាពលរដ្ឋជាច្រើននាក់ រស់នៅក្នុងឃុំត្រពាំងគង ស្រុកសំរោងទង នៅរសៀលថ្ងៃទី១៩ ខែកក្កដា ឆ្នាំ២០២៤ បានបន្តប្រមូលគ្នាតវ៉ានៅមុខផ្លូវចូលកន្លែងសាងសង់រោងចក្រសុំឲ្យថៅកែចិន និងលោក អុី លាងអេង បើកលុយថ្លៃទិញដីឲ្យពួកគាត់។ ពេលនេះ ពលរដ្ឋស្នើសុំឲ្យលោកឧត្តមសនីយឯកអគ្គនាយកនៃអគ្គនាយកដ្ឋានសំភារ:បច្ចេកទេសក្រសួងការពារជាតិ ជួយអន្តរាគមន៍រឿងលោកវរសេនីយ៍ទោ អុី លាងអេង មានបំណងចង់ស៊ីដាច់លុយថ្លៃដីពួកគាត់ដែលបានលក់ឲ្យថៅកែចិនសាងសង់រោងចក្រនេះផង ។
ប្រជាពលរដ្ឋបាននិយាយឲ្យដឹងថា ការមកប្រមូលផ្ដុំគ្នានេះក្នុងគោលបំណងស្នើសុំឲ្យថៅកែជនជាតិចិន និងលោក អុី លាងអេង បើកលុយថ្លៃដីរបស់ពួកគាត់តាមការសន្យា និងគ្រប់ចំនួន។ ព្រោះពេលនេះលុយថ្លៃដីរបស់ពួកគាត់ដែលឈ្មោះ អុី លាងអេង បើកពីថៅកែជនជាតិចិនបានហើយ ប៉ុន្តែមិនបើកលុយនោះមកឲ្យពួកគាត់ជាម្ចាស់ដីស្របច្បាប់តាមការសន្យាឡើយ ហើយប្លង់ក៏រត់ការផ្ទេរឈ្មោះទៅក្រុមហ៊ុនជិតអស់ហើយដែរ ។
ពលរដ្ឋឈ្មោះ ណាំ ប៊ុនធឿន ភេទប្រុស អាយុ៦១ឆ្នាំ រស់នៅភូមិអូរក្រាំងអំបិល ត្រពាំងគង ស្រុកសំរោងទង ខេត្តកំពង់ស្ពឺ បាននិយាយឱ្យអ្នកយកព័ត៌មានដឹងថា បានជាប្រជាពលរដ្ឋ ប្រមូលផ្តុំគ្នាមកធ្វើការតវ៉ានៅមុខក្រុមហ៊ុនជាលើកទី៣នេះ គឺដើម្បីទាមលុយរបស់ពួកគាត់ចំនួន៦៣គ្រួសារ ដែលអ្នកទិញដីពីគាត់់ ប្រមូលទាំងប្លង់ដីដោយសន្យាថាក្នុងខែមិថុនាកន្លងទៅនេះ ប្រគល់លុយគ្រប់ចំនួន ប៉ុន្តែរហូតមកដល់ថ្ងៃទី១៩ ខែកក្កដា ឆ្នាំ២០២៤នេះហើយពួកគាត់មិនទាន់ទទួលបានលុយគ្រប់ចំនួននៅឡើយទេ។ ហេតុដូច្នេះ ទើបពួកគាត់នាំគ្នាមកធ្វើការតវ៉ាដើម្បីទាមទារលុយរបស់គាត់គ្រប់ចំនួនគឺចប់រឿងហើយ។
ជាក់ស្ដែង កាលពីអំឡុងពួកគាត់នាំគ្នាតវ៉ាអាជ្ញាធរស្រុកសំរោងទងបានប្រាប់ថានៅថ្ងៃទី១៩ កក្កដា នេះ ឲ្យទៅធ្វើការជួបជុំគ្នាជាមួយភាគីលោកអ៊ី លាងអេង ដើម្បីរកដំណោះស្រាយក៏ប៉ុន្តែតំណាងប្រជាពលរដ្ឋ និងពលរដ្ឋបានទៅដល់សាលាឃុំ តែភាគីលក់អ៊ីលាងអេងពុំបានចូលខ្លួនមកដោះស្រាយឡើយ។
លោកតា នូ សុខស៊ីន អាយុ៧៤ឆ្នាំ រស់នៅក្នុងភូមិបាក់ ចិញ្ចៀន ឃុំត្រពាំងគង ស្រុកសំរោងទង បានលើកឡើងថា គាត់មានដីតែមួយកន្លែងនឹងទេ ហើយបានលក់ គេយកប្លង់ទៅហើយ។ពេលនេះជនជាតិចិនបានសាងសង់អគាររោងចក្រយ៉ាងធំ ប៉ុន្តែគាត់មិនទាន់ទទួលបានលុយគ្រប់ចំនួននៅឡើយទេ ។ គាត់មិនដឹងថា តើលុយដែលមិនទាន់ទទួលបានគ្រប់ចំនួននេះ ថៅកែជនជាតិចិនមិនទាន់ប្រគល់ឱ្យ ឬ មួយក៏អ្នកណាមួយមិនប្រគល់ឱ្យគាត់នោះទេ។ លុយរបស់គាត់ដែលនៅសល់នោះជាង២ម៉ឺនដុល្លារ ប្រសិនបើមិនមានដំណោះស្រាយណាមួយជូនប្រជាពលរដ្ឋ ទេនោះ ពួកគាត់នឹងបន្តតវ៉ានៅការដ្ឋាននេះ ដើម្បីស្នើឲ្យមានដំណោះស្រាយ យកតែលុយគាត់គ្រប់ចំនួនតែប៉ុណ្ណោះ។
ដោយឡែក ស្ត្រីវ័យចំណាស់ឈ្មោះភួង ស្រីម៉ៅ អាយុ៦៦ឆ្នាំ រស់នៅក្នុងភូមិអូរក្រាំងអំបិល ឃុំត្រពាំងគង ស្រុកសំរោងទង លើកឡើងស្រដៀងគ្នាថា ពួកគាត់ជាម្ចាស់ដី សុំឱ្យថៅកែជនជាតិចិន និងលោកអុី លាងអេង ប្រគល់លុយថ្លៃដីដែលទិញពីពួកគាត់ជាប្រជាពលរដ្ឋ ប្រគល់មកឱ្យគ្រប់ចំនួនតាមការសន្យាគឺមិនមានរឿងអ្វីកើតឡើងនោះទេ។ លុយរបស់គាត់ដែលគេត្រូវប្រគល់នោះ នៅប្រហែលជាង២ម៉ឺនដុល្លារអាមេរិកទៀត។ ប្រសិនបើមិនមានដំណោះស្រាយ យកលុយប្រគល់ឱ្យប្រជាពលរដ្ឋ គ្រប់ចំនួនទេនោះពួកគាត់ នឹងបន្តនាំគ្នាមកធ្វើការតវ៉ានៅមុខរោងចក្រនេះ ដើម្បីស្នើសុំឲ្យមានដំណោះស្រាយ។
ប្រជាពលរដ្ឋ សូមធ្វើការសំណូមពរដល់ អស់លោក អាជ្ញាធរ ឃុំ ស្រុក ខេត្ត និងជំនាញពាក់ព័ន្ធនានា និងសូមឲ្យលោក ចៅ ភាររឹទ្ឋ អគ្គនាយក នៃអគ្កនាយកដ្ឋានសំភារ:បច្ចេកទេសរួមទាំងឯកឧត្តម ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាពិសេស សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណា ចក្រកម្ពុជា មេត្តាជួយអន្តរាគមន៍ដោះស្រាយ និងរកយុត្តិធម៌ជូនប្រជាពលរដ្ឋ ម្ចាស់ដីទាំង៦៣គ្រួសារ ដែលលោកវតសេនីយ៍ទោ អុី លាងអេង អត្តលេខ 186454 មុខងារ ជំនួយការ អង្គភាព អគ្គនាយកដ្ឋានសម្ភារៈបច្ចេកទេស ក្រសួងការពារជាតិមិនទាន់ប្រគល់លុយគ្រប់ នៅក្នុងភូមិអូរក្រាំងអំបិល និងភូមិបាក់ចិញ្ចៀន ឃុំត្រពាំងគង ស្រុកសំរោងទង ខេត្តកំពង់ស្ពឺផង ព្រោះពេលនេះលោក អុី លាងអេង ជាមន្ត្រីយោធារូបនេះ យកលុយពីជនជាតិចិនគ្រប់ហើយ មិនព្រមប្រគល់ឱ្យប្រជាពលរដ្ឋ គ្រប់ចំនួនឡើយ ។ បើសរុបជាង៦០គ្រួសារនេះ នៅសល់លុយជាង២លានដុល្លារសហរដ្ឋអាមេរិកទៀត ហើយរោងចក្រសាងសង់ជិតរួចរាល់ហើយ។
បើយោងតាមប្រភពដែលស្និតជាមួយភាគីខាងរោងចក្របានបង្ហើបប្រាប់ថា លុយ២លាន១៧មុឺនដុល្លារគឺខាងថៅកែរោងចក្របានបើកទៅឲ្យលោកអុី លាងអេង អស់ ហើយ។ ក៏ប៉ុន្តែមិនដឹងថាមានមូលហេតុអ្វីនោះទេ ទើបលោកអុី លាងអេងមិនព្រមបើកជូនប្រជាពលរដ្ឋដែលជាម្ចាស់ដី ។
ពាក់ព័ន្ធនិងប្រភពខាងលើនេះដែរ អ្នកយកព័ត៌មានយើងមិនអាចសុំការពន្យល់បកស្រាយពីលោកអ៊ីលាងអេងបានឡើយ ។
ចែករំលែកព័តមាននេះ