រាជធានីភ្នំពេញ ៖ ដោយសារតែក្រុមកម្ចីអនឡាញ ហើយខុសច្បាប់កាន់តែសកម្មនៅក្នុងពិភពនិងចលនាឥណទាននៅក្នុងសង្គមជីវភាពរស់នៅប្រចាំថ្ងៃ គ្រឹះស្ថានហិរញ្ញាវត្ថុស្របច្បាប់ និងសមត្ថកិច្ចកំពុងឈានដល់ការសហការគ្នាក្នុងការបង្ក្រាប ហើយចាត់ទុកក្រុមសេវាកម្មឥណទាននេះថា ជាបទលើ្មសឆបោកតាមប្រព័ន្ធអនឡាញ ។ លោក…
រាជធានីភ្នំពេញ ៖ ដោយសារតែក្រុមកម្ចីអនឡាញ ហើយខុសច្បាប់កាន់តែសកម្មនៅក្នុងពិភពនិងចលនាឥណទាននៅក្នុងសង្គមជីវភាពរស់នៅប្រចាំថ្ងៃ គ្រឹះស្ថានហិរញ្ញាវត្ថុស្របច្បាប់ និងសមត្ថកិច្ចកំពុងឈានដល់ការសហការគ្នាក្នុងការបង្ក្រាប ហើយចាត់ទុកក្រុមសេវាកម្មឥណទាននេះថា ជាបទលើ្មសឆបោកតាមប្រព័ន្ធអនឡាញ ។
លោក កាំង តុងងី អ្នកនាំពាក្យសមាគមមីក្រូហិរញ្ញាវត្ថុ បានឱ្យដឹងថា សមាគមមីក្រូហិរញ្ញាវត្ថុ មានក្តីព្រួយបារម្ភ និងស្នើសុំកិច្ចសហការជាមួយសមត្ថកិច្ចជំនាញ ជាពិសេសអគ្គស្នងការនគរបាលជាតិ ក្នុងការទប់ស្កាត់ និងបង្ក្រាបបទលើ្មសឆបោកតាមប្រព័ន្ធអនឡាញ ។
លោក កាំង តុងងី បានឱ្យកម្មវិធីលុយ នៃសារព័ត៌មាន កោះសន្តិភាព ដឹងថា «ក្នុងកិច្ចប្រជុំជាមួយអគ្គស្នងការនគរបាលជាតិ ខាងសមាគមក៏បានលើកឡើងពីការបារម្ភក៏ដូចជាការស្នើសុំសហប្រតិបត្តិការ ឧទាហរណ៍ដូចជាក្រុមការងារដែលយើងអាចធ្វើការងារជាមួយអគ្គស្នងការនគរបាលជាតិ ដើម្បីបង្ក្រាបលើករណីសង្ស័យល្មើសឱ្យបានទាន់ពេលវេលា ក៏ដូចជាបង្កើនយន្តការរួមគ្នាក្នុងការអប់រំ ផ្សព្វផ្សាយលើកកម្ពស់ការយល់ដឹងដល់ប្រជាពលរដ្ឋ ក៏ដូចជាគ្រោះថ្នាក់» ។ លោក កាំង តុងងី បានបន្តថា សមាគមស្នើភា្នក់ងារសមត្ថកិច្ចសហការជាមួយគ្រឹះស្ថានហិរញ្ញាវត្ថុ ធ្វើការបង្ក្រាបសកម្មទៅលើក្រុមកម្ចីអនឡាញ ក្រុមកម្ចីខុសច្បាប់ ក្រុមកម្ចីបោកប្រាស់ប្រជាពលរដ្ឋ ។
អ្នកនាំពាក្យសមាគម បន្ថែមថា «មែនទែនទៅយើងមើលឃើញថា ប្រជាពលរដ្ឋយើងមួយចំនួនបានក្លាយជាជនរងគ្រោះ ដោយសារក្រុមទាំងនេះ ហើយយើងចង់សហការជាមួយអាជ្ញាធរ ដើម្បីជំរុញ ទប់ស្កាត់ បង្ក្រាបក្រុមទាំងអស់នេះកាន់តែមានប្រសិទ្ធភាព» ។
កាលពីពេលថ្មីៗនេះ ក្រសួងមហាផ្ទៃបានសម្រេចបង្កើតគណៈកម្មការដើម្បីបង្កើនការបង្ក្រាបបទល្មើសតាមប្រព័ន្ធអនឡាញនៅតាមបណ្តាបណ្តារាជធានី-ខេត្តនៃប្រទេសកម្ពុជា ។ បើតាមលិខិតរបស់ក្រសួងចុះថ្ងៃទី ២៧ ខែមិថុនា ឆ្នាំ ២០២៤ លោក សុខ ផល រដ្ឋលេខាធិការក្រសួងមហាផ្ទៃជាប្រធាន លោក ស ថេត អគ្គស្នងការនគរបាលជាតិ ជាអនុប្រធានអចិន្ត្រៃយ៍ លោក នៅ លក្ខណា រដ្ឋលេខាធិការក្រសួងមហាផ្ទៃ ជាអនុប្រធាន លោក អ៊ូ វណ្ណា អនុរដ្ឋលេខាធិការ ជាអនុប្រធាន និងមានសមាជិកជាច្រើនទៀតផងដែរ ។
បើតាមក្រសួងមហាផ្ទៃ គណៈកម្មការមានភារកិច្ចដូចជាបង្កើនការស្រាវជ្រាវទីតាំងដែលមានបទល្មើសឆបោក តាមប្រព័ន្ធអនឡាញតាមគ្រប់ប្រភេទ និងគ្រប់រូបភាពក្នុងភូមិសាស្ត្របណ្តារាជធានីខេត្ត ហើយគណៈបញ្ជាការឯកភាពរាជធានីខេត្ត ធ្វើការចុះបង្ក្រាបជាក់ស្តែងតាមគោលដៅដែលបានរកឃើញ និងកំណត់ដោយប្រធានគណៈកម្មការ ។ ក្រសួងមហាផ្ទៃបញ្ជាក់ថា ក្នុងករណីចាំបាច់ ប្រធានគណៈកម្មការអាចប្រើប្រាស់មន្ត្រីនៃអង្គភាពពាក់ព័ន្ធចំណុះគណៈកម្មការចុះសហការសម្របសម្រួលប្រតិបតិ្តការជាក់ស្តែងឱ្យបានទាន់ពេលវេលា និងមានប្រសិទ្ធិភាពខ្ពស់ ។
ពាក់ព័ន្ធនឹងកិច្ចការនេះខាងធនាគារជាតិនៃកម្ពុជា ក៏កំពុងតែយកចិត្តទុកដាក់ផងដែរ នៅលើករណីឧក្រិដ្ឋកម្មហិរញ្ញវត្ថុអនឡាញនេះ ។ លោក រ័ត្ន សុវណ្ណនរៈ ទេសាភិបាលរងធនាគារជាតិនៃកម្ពុជា បានជំរុញការប្រើប្រាស់សេវាមីក្រូហិរញ្ញវត្ថុប្រកបដោយការទទួលខុសត្រូវ បង្កើនស្មារតីប្រុងប្រយ័ត្ន និងការពារពីអំពើឆបោកផ្នែកហិរញ្ញវត្ថុនៅតាមសហគមន៍នៅពេលដែលលោកបានអញ្ជើញចូលរួមសិក្ខាសាលាមួយនៅខេត្តរតនៈគីរី កាលពីថ្ងៃទី ១៦ ខែ កក្កដា កន្លងទៅថ្មីៗនេះ ៕
ចែករំលែកព័តមាននេះ