ខេត្តបាត់ដំបង ៖ គ្រាប់មីនប្រភេទ «៧២ ឬសញ្ញាលេខបូក» ចំនួន០៤គ្រាប់ ត្រូវបានម្ចាស់ចម្ការប្រទះឃើញផុសចេញពីក្នុងដីនៅក្នុងចម្ការពោតរបស់គាត់ កាលពីរសៀលថ្ងៃទី១៧ កក្កដា ស្ថិតនៅចំណុចក្បែរជើងភ្នំចាក់អង្កាម ខាងមុខច្រកចូលល្អាងទូរ ស្ថិតក្នុងភូមិស្នឹងកើត ឃុំស្នឹង ស្រុកបាណន់ ហើយត្រូវបានមន្ត្រីមូលដ្ឋានចុះទៅពិនិត្យ និងប្រមូលយកភ្លាមៗដែរ ។
ម្ចាស់ចម្ការពោត និងជាអ្នកប្រទះឃើញគ្រាប់មីននេះ លោក អឿន ម៉ៅ អាយុ៤៤ឆ្នាំ បានថ្លែងប្រាប់កោះសន្តិភាព នៅព្រឹកថ្ងៃទី១៨ កក្កដា ថា គ្រាប់មីនចំនួន០៤គ្រាប់នោះ ត្រូវបានប្រទះឃើញជាបន្តបន្ទាប់នៅក្នុងចម្ការពោតរបស់គាត់ខាងលើនេះ ។ គាត់បានប្រាប់ថា គ្រាប់មីនចំនួន០២គ្រាប់ដំបូង ត្រូវកូនប្រុសគាត់ប្រទះឃើញ ក្រោយពេលភ្លៀងកាលពីថ្ងៃទី១៥ កក្កដា ហើយវាបានប្រាប់គាត់ដែរ តែដោយសារជាប់រវល់ពេក ទើបគាត់មិនបានទៅមើល ។
លុះនៅរសៀលថ្ងៃទី១៧ កក្កដា គាត់បានដើរទៅមើលគ្រាប់មីននោះ ក៏ស្រាប់តែប្រទះឃើញចំនួន០២គ្រាប់ថែមទៀតនៅក្បែរៗគ្នាក្នុងចម្ការពោតដែលទើបដុះបានមួយចំអាម ។ បើពិនិត្យលើរូបភាពដែលម្ចាស់ចម្ការបានថតទុក គ្រាប់មីននោះត្រូវគេស្គាល់ថា ជាប្រភេទ «មីន៧២ ឬហៅមីនសញ្ញាលេខបូក»។ គ្រាប់មីននោះ អណ្ដែតឡើងរាយប៉ាយនៅលើដីក្នុងចម្ការពោត ដែលម្ចាស់ធ្លាប់ភ្ជួរដាំដំណាំរាល់ឆ្នាំ ។ ហើយបើតាមអឿន ម៉ៅ បានបញ្ជាក់ថា នេះមិនមែនជាលើកដំបូងទេ ដែលគាត់ប្រទះឃើញគ្រាប់មីនប្រភេទនេះ នៅក្នុងចម្ការពោតរបស់គាត់ត្រង់ចំណុចដដែលៗខាងលើនេះ ។
លោក អឿន ម៉ៅ បានប្រាប់ថា កាលពីឆ្នាំទៅមិញ ក្រោយភ្ជួរដីរួច គាត់បានប្រទះឃើញគ្រាប់មីនប្រភេទនេះ ជាបន្តបន្ទាប់ និងបានរាយការណ៍ប្រាប់ទៅសមត្ថកិច្ចឲ្យជួយអន្តរាគមន៍យកគ្រាប់មីននោះ ។ បើគិតដល់ពេលនេះ គាត់បានប្រទះឃើញគ្រាប់មីនប្រភេទនេះសរុបចំនួន១១គ្រាប់ហើយ ។ ប៉ុន្តែរហូតដល់ពេលនេះ គាត់មិនធ្លាប់ឃើញអង្គភាពកំចាត់មីន ជួយចុះពិនិត្យឬចុះរុករកគ្រាប់មីននៅក្នុងចម្ការគាត់ម្ដងណាទេ ។
ពាក់ព័ន្ធនឹងការប្រទះឃើញគ្រាប់មីនដ៏គ្រោះថ្នាក់ជាបន្តបន្ទាប់នៅក្នុងចម្ការពោតខាងលើនេះ បើតាមប្រភពពីអតិតយោធា ដែលធ្លាប់ដឹងពីប្រវត្តិខ្លះៗ នៃតំបន់នោះបាននិយាយថា នៅតំបន់នោះមានគេបង្កប់គ្រាប់មីនជាច្រើនរាយប៉ាយរ៉បជើងភ្នំចាក់អង្កាម ។ ជាពិសេស នៅម្ដុំច្រកចូល «ល្អាងទូរនេះឯង» តាំងពីក្នុងអំឡុងទសវត្សឆ្នាំ១៩៨០ម្ល៉េះ ហើយកន្លងមក នៅតំបន់នោះក៏មិនធ្លាប់មានកម្លាំងកំចាត់មីនក្នុងអង្គភាពណាមួយធ្លាប់ចូលទៅរុករក ឬបោសសំអាតដែរ ដូច្នេះហើយទើបគ្រាប់មីននៅតែមានសេសសល់តាមចម្ការនៅឡើយ ។
អភិបាលស្រុកបាណន់ លោក ស្រេង សុខា បានបញ្ជាក់ប្រាប់កោះសន្តិភាព នៅព្រឹកថ្ងៃទី១៨ កក្កដា នេះដែរថា លោកបានទទូលព័ត៌មាននេះពីមន្ត្រីមូលដ្ឋាន ហើយភ្លាមៗមន្ត្រីមូលដ្ឋានបានចុះអន្តរាគមន៍ប្រមូលយកគ្រាប់មីននោះយកទៅរក្សាទុកជាបណ្ដោះអាសន្នហើយដែរ ។
ជុំវិញករណីប្រទះឃើញគ្រាប់មីនដ៏គ្រោះថ្នាក់ជាបន្តបន្ទាប់នេះ តាមរយៈកោះសន្តិភាព លោក អឿន ម៉ៅ ដែលជាម្ចាស់ចម្ការបានសំណូមពរសុំឲ្យអាជ្ញាធរ ឬមន្ត្រីអង្គភាពកំចាត់មីន«ស៊ីម៉ាក់» ជួយចុះរុករកគ្រាប់មីន ឬយុទ្ធភណ្ឌមិនទាន់ផ្ទុះនានា នៅតំបន់ដីចម្ការរបស់គាត់ផង ។ ព្រោះគាត់យល់ថា គ្រាប់មីន ឬ គ្រាប់ដទៃអាចនៅមានសេសសល់ នៅក្នុងដីចម្ការគាត់នៅឡើយ ។ ឆ្លើយតបទៅនឹងសំណូមពររបស់ប្រជាកសិកររូបនេះ លោក ស្រេង សុខា បានបញ្ជាក់ថា លោកបានរាយការណ៍ និងបានស្នើសុំទៅកាន់កម្លាំងអង្គភាពស៊ីម៉ាក់រួចហើយ ដើម្បីសុំឲ្យជួយចុះរាវរកគ្រាប់យុទ្ធភណ្ឌនៅតំបន់នោះ ចៀសវាងគ្រោះថ្នាក់ដល់ប្រជាពលរដ្ឋរស់នៅតំបន់នោះ ដោយយថាហេតុ៕
ចែករំលែកព័តមាននេះ