ខេត្តព្រះសីហនុ ៖ កាលពីថ្ងៃទី១៧ ខែកក្កដា ឆ្នាំ២០២៤ លោក មីន កុម្ភៈ អភិបាលរងនៃគណៈអភិបាលខេត្តព្រះសីហនុ បានធ្វើការអំពាវនាវដល់បងប្អូនប្រជាពលរដ្ឋដែលរស់នៅក្នុងស្រុកកំពង់សីលា…
ខេត្តព្រះសីហនុ ៖ កាលពីថ្ងៃទី១៧ ខែកក្កដា ឆ្នាំ២០២៤ លោក មីន កុម្ភៈ អភិបាលរងនៃគណៈអភិបាលខេត្តព្រះសីហនុ បានធ្វើការអំពាវនាវដល់បងប្អូនប្រជាពលរដ្ឋដែលរស់នៅក្នុងស្រុកកំពង់សីលា សូមមានការប្រុងប្រយ័ត្នចំពោះកូនចៅតូចៗ និងមានការយកចិត្តទុកដាក់ទឹកភ្លៀងធ្លាក់ និងជំនន់ទឹកភ្លៀងរួមទាំងខ្យល់កន្ត្រាក់ឱ្យបានប្រយ័ត្នខ្ពស់បំផុត ខណៈពេលមានជំនន់ទឹកភ្លៀងឡើងខ្ពស់ ដូច្នេះ យើងត្រូវរកកន្លែងទីទួលខ្ពស់ ដើម្បីធានាបានសុវត្ថិភាព ។
នៅក្នុងឱកាសចុះពិនិត្យស្ថានភាពទឹកតំបន់មួយចំនួនដែលរងនូវជំនន់ទឹកភ្លៀងជន់លិច ស្ថិតក្នុងភូមិសាស្ត្រស្រុកកំពង់សីលា ។ បន្ទាប់ពីខេត្តព្រះសីហនុបានទទួលរងនូវឥទ្ធិពលភ្លៀងធ្លាក់ជាប់ៗគ្នាក៏ធ្វើឱ្យតំបន់មួយចំនួននៃខេត្តព្រះសីហនុបានរងនូវទឹកជន់ចូលភូមិប្រជាពលរដ្ឋក្នុងភូមិសាស្ត្រស្រុកកំពង់សិលា តែម្តង ។
សូមរំលឹកថា ក្រសួងធនធានទឹក និងឧតុនិយម បានឲ្យដឹងនៅថ្ងៃទី១៧ ខែកក្កដា ឆ្នាំ២០២៤ថា ស្ថានភាពទឹកនៅតាមទន្លេនានា នៅកម្ពុជាចាប់ផ្តើមកម្រើកឡើង ។ ប្រភពដដែលបានឲ្យដឹងថា កម្ពស់ទឹកនៅទន្លេមេគង្គ នៅខេត្តស្ទឹងត្រែង ទឹកមានកម្ពស់៦,៦៥ ហើយអាចនឹងឡើងដល់៦,៩៦ម ស្របពេលដែលទឹកនៅខេត្តក្រចេះ មានកម្ពស់១៤,៩២ម ហើយនឹងឡើងដល់១៥,៥៨ម នៅថ្ងៃទី២០ ខែកក្កដា ។
ប្រភពដដែលបានបន្ថែមថា ទឹកនៅទន្លេមេគង្គអ្នកលឿង នៅថ្ងៃទី១៧ ខែកក្កដា មានកម្ពស់៣,២៥ម នឹងឡើងដល់៣,៦៧ម នៅថ្ងៃទី២០ ខែកក្កដា ដោយឡែកនៅទន្លេសាប-កោះខែលវិញ គឺទឹកមានកម្ពស់៤,២៧មនឹងឡើងដល់៤,៧៥ម។
ដោយឡែក ទឹកនៅទន្លេសាបព្រែកក្តាម នៅថ្ងៃទី១៧ ខែកក្កដា មានកម្ពស់៣,៤៦ម និងមានកម្ពស់៣,៩២ នៅថ្ងៃទី២០ ខែកក្កដា ។ ប៉ុន្តែកម្ពស់ទឹកមិនទាន់ដល់កម្រិតប្រុងប្រយ័ត្ននៅឡើយទេ ។
ប្រភពដដែលបានបន្តថា កម្ពស់ទឹកទន្លេមេគង្គ នៅកំពង់ចាម ថ្ងៃទី១៧ ខែកក្កដា មានកម្ពស់៨,២៧ ម នឹងកើនឡើងដល់៩,០២ មនៅថ្ងៃទី ២០ ខែកក្កដា ស្របពេលដែល ទន្លេសាក់ និងចតុមុខ មានកម្ពស់ ៤,៤៤ មនឹងឡើងដល់៤,៩០មក ។
ចែករំលែកព័តមាននេះ