(អន្តរជាតិ)៖ ការលក់ និងប្រាក់ចំណេញរបស់ក្រុមហ៊ុន SWATCH Group ក្រុមហ៊ុនផលិតនាឡិកាដ៏ធំបំផុតរបស់ពិភពលោក បានធ្លាក់ចុះ មិនធ្លាប់មានក្នុងរយៈពេល៤ឆ្នាំចុងក្រោយនេះ។ យោងតាម ទីភ្នាក់ងារព័ត៌មាន Bloomberg ស្ថានភាពសេដ្ឋកិច្ចដ៏លំបាក និងអំណាចទិញរបស់អតិថិជនចិន លែងមានភាពរឹងមាំដូចពីមុនទៀត ដែលប៉ះពាល់ដោយផ្ទាល់ដល់ក្រុមហ៊ុននាឡិកា និងម៉ាកប្រណីតជាទូទៅ។

Swatch Group ក្រុមហ៊ុនផលិតនាឡិកាម៉ាក Tissot, Longines និង Omega របស់ប្រទេសស្វីស បានចេញរបាយការណ៍ ដោយក្នុងរយៈពេល៦ខែដំបូងនៃឆ្នាំនេះ ប្រាក់ចំណេញបានថយចុះ ៧០% ហើយប្រាក់ចំណូលបានថយចុះ ១៤% ។ មូលហេតុចម្បងនៃការធ្លាក់ចុះ ក៏មកពីធ្លាក់ចុះនៃតម្រូវការសម្រាប់ទំនិញប្រណីតនៅក្នុងប្រទេសចិន។ លោក Nick Hayek នាយកប្រតិបត្តិនៃ Swatch Group បាននិយាយថា ក្រុមហ៊ុនបានកាត់បន្ថយផលិតកម្មជាង ២០% ខណៈពេលដែលរក្សាកម្លាំងការងារឱ្យនៅដដែល ដើម្បីទប់ទល់នឹងវិបត្តិសេដ្ឋកិច្ច។

លោក​បាន​និយាយ​ថា ផល​ប៉ះពាល់​ធំ​បំផុត​គឺ​មក​ពី​ប្រទេស​ចិន។ លោកព្យាករណ៍ថាទីផ្សារចិន រួមទាំងហុងកុង និងម៉ាកាវនឹងនៅតែជាបញ្ហាប្រឈមសម្រាប់ឧស្សាហកម្មប្រណីតទាំងមូលរហូតដល់ចុងឆ្នាំនេះ៕ ប្រភព៖ businesstimes