ខេត្តកំពង់ស្ពឺ ៖ ប្រជាពលរដ្ឋប្រមាណជាង៦០គ្រួសារ នៅព្រឹកថ្ងៃទី១៧ ខែកក្កដា ឆ្នាំ២០២៤ បាននាំគ្នាមកប្រមូលផ្តុំនៅមុខការដ្ឋានសាងសង់រោងចក្រយីហោជាន យូលានខន ស្ក្រាក់សិន (ខេមបូឌា)…
ខេត្តកំពង់ស្ពឺ ៖ ប្រជាពលរដ្ឋប្រមាណជាង៦០គ្រួសារ នៅព្រឹកថ្ងៃទី១៧ ខែកក្កដា ឆ្នាំ២០២៤ បាននាំគ្នាមកប្រមូលផ្តុំនៅមុខការដ្ឋានសាងសង់រោងចក្រយីហោជាន យូលានខន ស្ក្រាក់សិន (ខេមបូឌា) ឯ.ក របស់សម្ព័ន្ឋក្រុមហ៊ុនសាងសង់ហ៊ឹងចូវ ។
យោងតាមប្រភពពីពលរដ្ឋបានឲ្យដឹងថា ការមកប្រមូលផ្ដុំគ្នានេះ ក្នុងគោលបំណងស្នើសុំឲ្យថៅកែជនជាតិចិនបើកលុយថ្លៃដីរបស់ពួកគាត់តាមការសន្យា និងគ្រប់ចំនួន ។ ពួកគាត់ពិតជាត្រេកអរណាស់ នៅពេលដែលមានការអភិវឌ្ឍន៍នៅក្នុងមូលដ្ឋាន ក៏ប៉ុន្តែអ្វីដែលពួកគាត់ចង់បាននៅពេលនេះ គឺលុយថ្លៃដីរបស់ពួកគាត់ដែលឈ្មោះ អ៊ី លាងអេង បើកពីថៅកែជនជាតចិនបានហើយ ប៉ុន្តែមិនបើកលុយនោះមកឲ្យពួកគាត់តាមការសន្យាឡើយ សង្ស័យចង់ស៊ីដាច់ហើយមើលទៅ ។
ក្នុងនាម ជាប្រជាពលរដ្ឋទាំងអស់ស្នើសុំឲ្យអាជ្ញាធរឃុំ ស្រុក និងលោកអភិបាលខេត្តកំពង់ស្ពឺ សុំមេត្តាជួយដល់ប្រជាពលរដ្ឋក្រីក្រដូចជាពួកគាត់នេះផង ព្រោះថាពេលនេះ តាមអ្វីដែលគាត់ដឹងគឺអ្នកដែលទទួលលុយពីថៅកែជនជាតិចិនយកមកទិញដីពួកគាត់ គឺ(លោកវរសេនីយ៍ទោ ស័ក្តិ៤កន្លះ អ៊ី លាងអេង) ពេលនេះមិនព្រមយកមកទូទាត់ជាមួយពួកគាត់ឡើយ ។
ប្រជាពលរដ្ឋឈ្មោះ ថ្លាង ដាវី ភេទប្រុស អាយុ៤៣ឆ្នាំ រស់នៅភូមិអូរក្រាំងអំបិល ត្រពាំងគង ស្រុកសំរោងទង ខេត្តកំពង់ស្ពឺ បាននិយាយឱ្យអ្នកយកព័ត៌មានដឹងថា បានជាប្រជាពលរដ្ឋប្រមូលផ្តុំគ្នាមកធ្វើការតវ៉ានៅមុខក្រុមហ៊ុននេះ គឺដើម្បីទាមទារលុយរបស់ពួកគាត់ចំនួន៦៣គ្រួសារ ដែលអ្នកទិញដីពីគាត់់ប្រមូលទាំងប្លង់ដីសន្យាថា ក្នុងខែមិថុនា ប្រគល់លុយគ្រប់ចំនួន ប៉ុន្តែរហូតមកដល់ថ្ងៃទី១៧ ខែកក្កដា ឆ្នាំ២០២៤នេះ ហើយពួកគាត់មិនទាន់ទទួលបានលុយគ្រប់ចំនួននៅឡើយទេ ទើបពួកគាត់នាំគ្នាមកធ្វើការតវ៉ា ដើម្បីទាមទារលុយរបស់គាត់គ្រប់ចំនួន គឺចប់រឿងហើយ ។
បុរសវ័យចំណាស់ ឈ្មោះ នូ សុខស៊ីន អាយុ៧៤ឆ្នាំ រស់នៅក្នុងភូមិបាក់ចិញ្ចៀន ឃុំត្រពាំងគង ស្រុកសំរោងទងបានលើកឡើងថា គាត់មានដីតែមួយកន្លែងនឹងទេ ហើយបានលក់គេយកប្លង់ទៅហើយ ជនជាតិចិនបានសាងសង់អគាធំ ប៉ុន្តែគាត់មិនទាន់ទទួលបានលុយគ្រប់ចំនួននោះទេ ។ គាត់មិនដឹងថា តើលុយដែលមិនទាន់ទទួលបានគ្រប់ចំនួននេះ ថៅកែជនជាតិចិនមិនទាន់ប្រគល់ឱ្យ ឬមួយក៏អ្នកណាមួយមិនប្រគល់ឱ្យគាត់នោះទេ ។
លុយរបស់គាត់ដែលនៅសល់នោះជាង២ម៉ឺនដុល្លារ ប្រសិនបើមិនមានដំណោះស្រាយណាមួយជូនប្រជាពលរដ្ឋទេនោះ ពួកគាត់នឹងបន្តតវ៉ានៅការដ្ឋាននេះ ដើម្បីស្នើឲ្យមានដំណោះស្រាយ យកតែលុយគាត់គ្រប់ចំនួនតែប៉ុណ្ណោះ មិនចង់មានបញ្ហាអ្វី ឱ្យអាជ្ញាធរ ឃុំ ស្រុក ខេត្ត ឈឺក្បាលឡើយ។
ដោយឡែក ស្ត្រីវ័យចំណាស់ឈ្មោះហ៊ឹម សំអូន អាយុ៦៩ឆ្នាំ រស់នៅក្នុងភូមិអូរក្រាំងអំបិល ឃុំត្រពាំងគង ស្រុកសំរោងទង លើកឡើងស្រដៀងគ្នាថា ពួកគាត់ជាម្ចាស់ដី សុំឱ្យថៅកែជនជាតិចិន ប្រគល់លុយថ្លៃដីដែលទិញពីពួកគាត់ជាប្រជាពលរដ្ឋ ប្រគល់មកឱ្យគ្រប់ចំនួនតាមការសន្យា គឺមិនមានរឿងអ្វីកើតឡើងនោះទេ ។ លុយរបស់គាត់ដែលគេត្រូវប្រគល់នោះ នៅប្រហែលជិត១០ម៉ឺនដុល្លារអាមេរិកទៀត ។
ប្រសិនបើមិនមានដំណោះស្រាយយកលុយប្រគល់ឱ្យប្រជាពលរដ្ឋគ្រប់ចំនួនទេនោះពួកគាត់នឹងបន្តនាំគ្នាមកធ្វើការតវ៉ានៅមុខរោងចក្រនេះ ដើម្បីស្នើសុំឲ្យមានដំណោះស្រាយ ។ ជាមួយគ្នានេះដែរ ស្ត្រីវ័យចំណាស់ឈ្មោះឌឹក សរ អាយុ៧៥ឆ្នាំ រស់នៅក្នុងភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ បានធ្វើការសំណូមពរដល់ អស់លោក អាជ្ញាធរ ឃុំ ស្រុក ខេត្ត និងជំនាញពាក់ព័ន្ធនានា ជាពិសេស សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មេត្តាជួយអន្តរាគមន៍ដោះស្រាយ និងរកយុត្តិធម៌ជូនប្រជាពលរដ្ឋ ម្ចាស់ដីទាំង៦៣គ្រួសារ ដែលជនជាតិចិនទិញដីហើយមិនទាន់ប្រគល់លុយគ្រប់ នៅក្នុងភូមិអូរក្រាំងអំបិល និងភូមិបាក់ចិញ្ចៀន ឃុំត្រពាំងគង ស្រុកសំរោងទង ខេត្តកំពង់ស្ពឺផងទាន ។
ប្រភពដែលស្និតជាមួយភាគីខាងរោងចក្របានបង្ហើបប្រាប់ថា លុយរាប់លានដុល្លារ គឺខាងថៅកែរោងចក្របានបើកទៅឲ្យលោកអ៊ី លាងអេង អស់ហើយ។ ក៏ប៉ុន្តែមិនដឹងថា មានមូលហេតុអ្វីនោះទេ ទើបលោកអ៊ី លាងអេង មិនព្រមបើកជូនប្រជាពលរដ្ឋដែលជាម្ចាស់ដីនិងអ្នកតំណាង ។ បើទោះបីជាពលរដ្ឋនាំគ្នាមកតវ៉ាស្នើសុំទូទាត់លុយថ្លៃដីបែបនេះក៏ដោយ គេមិនឃើញមានវត្តមានលោកអ៊ី លាងអេង ចុះមកដោះស្រាយជាមួយប្រជាពលរដ្ឋឡើយ ។
អ្នកយកព័ត៌មានយើងមិនអាចសុំការពន្យល់បកស្រាយពីលោកអ៊ី លាងអេង បានឡើយ ព្រោះមិនមានលេខទូរស័ព្ទសម្រាប់ទំនាក់ទំនងយើងរង់ចាំស្វាគមន៍ជានិច្ច និងរាល់ពេលវេលាសម្រាប់ការបកស្រាយណាមួយពីសំណាក់លោកអ៊ី លាងអេង ៕
ចែករំលែកព័តមាននេះ