អ្នកចង់ជិះឡូរី មិនបាច់ទៅណាឆ្ងាយទេ គប្បីទៅកម្សាន្តនៅតំបន់កសិទេសចរណ៍
- កំពង់ស្ពឺ
ខេត្តកំពង់ស្ពឺ ៖ បើយើងធ្វើដំណើរពីរាជធានីភ្នំពេញតាមផ្លូវជាតិលេខ៤ ទៅដល់គីឡូម៉ែត្រលេខ៤៣
ខេត្តកំពង់ស្ពឺ ៖ បើយើងធ្វើដំណើរពីរាជធានីភ្នំពេញតាមផ្លូវជាតិលេខ៤ ទៅដល់គីឡូម៉ែត្រលេខ៤៣ យើងនឹងឃើញមានផ្លូវបត់ឆ្វេង រួចហើយបន្តដំណើរទៅតាមផ្លូវលេខ១៤៣ ប្រមាណ១៧គីឡូម៉ែត្រពីទីរួមខេត្ត នឹងបានទៅដល់តំបន់ទេសចរណ៍ធម្មជាតិមួយ នោះគឺតំបន់កសិទេសចរណ៍ម៉ុង ឫទ្ធី ។ នៅទីនោះ យើងនឹងបានឃើញផ្លូវឡូរីក្នុងតំបន់កសិទេសចរណ៍នេះ ដែលមានប្រវែងជិត១០គីឡូម៉ែត្រ និងជិតដាក់ឱ្យដំណើរការហើយ ។
បងប្អូនប្រាកដជាបានដឹងហើយថា នៅក្នុងតំបន់កសិទេសចរណ៍មួយនេះ របស់អ្នកឧកញ៉ាមុង ឫទ្ធី គឺជាទីកន្លែងទេសចរណ៍ធម្មជាតិមួយដ៏ស្រស់ស្អាត ក្នុងចំណោមតំបន់ទេសចរណ៍ជាច្រើនទៀតក្នុងខេត្តកំពង់ស្ពឺ ។
ថ្មីៗនេះ អ្នកឧកញ៉ា ម៉ុង ឫទ្ធី កំពុងសាងសង់ផ្លូវឡូរីប្រវែងជិត១០គីឡូម៉ែត្រ ដើម្បីឲ្យភ្ញៀវទេសចរដែលទៅកម្សាន្តនៅទីនោះបានជិះមើលទេសភាពព្រៃព្រឹក្សាដ៏ខៀវស្រងាត់នារដូវវស្សា ក្នុងតំបន់កសិទេសចរណ៍មួយនេះ ។
ផ្លូវឡូរីនេះ អ្នកឧកញ៉ាបានចាប់ផ្តើមសាងសង់ប្រមាណជិត៧ខែហើយ ហើយការជិះកម្សាន្តនឹងបើកដំណើរការទទួលភ្ញៀវនាពេលឆាប់ៗខាងមុខ ។ ផ្លូវឡូរីនេះមាន២ខ្សែ ដែលមានប្រវែងជាង៩គីឡូម៉ែត្រ ។ អ្វីដែលជាចំណុចទាក់ទាញ គឺមានផ្លូវរូងក្រោមដីចំនួន៣កន្លែង ត្រូវបានសាងសង់ចប់រួចរាល់ និងស្ថាបនាឡូរីបានចំនួន៣០គ្រឿងផងដែរ ។
ចំណុចគួរឲ្យកត់សម្គាល់គឺ ឡូរីទាំងអស់ប្រើថាមពលអាគុយ ដូច្នេះអ្នកទេសចរដែលមកកម្សាន្តនៅតាមតំបន់ទេសចរណ៍ក្នុងខេត្តកំពង់ស្ពឺ អាចមកលេង និងជិះឡូរីបានដូចនៅខេត្តបាត់ដំបងដែរ ក្នុងតំបន់កសិទេសចរណ៍ដែលមានទីតាំងនៅភូមិសំរោងជើងភ្នំ ឃុំសែនដី ស្រុកសំរោងទង ។ ក្រៅពីការជិះឡូរីកម្សាន្តហើយ នៅទីនោះក៏មានសួនសត្វ និងកសិដ្ឋានផងដែរ ។
តាមព័ត៌មានបានឱ្យដឹងថា ការជិះឡូរីកម្សាន្តនេះ នៅឯភ្នំវល្លិខេត្តកំពតក៏មានការធ្វើឡូរីសម្រាប់ការជិះកម្សាន្តដែរ ឆ្លងកាត់ព្រៃភ្នំជ្រលងដងអូរ ដែលកោះសន្តិភាពព្យាយាមនាំព័ត៌មាននេះមកផ្សាយជូនបន្ត ៕
ចែករំលែកព័តមាននេះ