ទីក្រុងវ៉ាស៊ីនតោន៖ ពាក់ព័ន្ធនឹងហេតុការណ៍បាញ់លោកត្រាំកាលពីយប់មិញនោះ ការិយាល័យស៊ើបអង្កេតសហព័ន្ធដែលហៅកាត់ថាអែហ្វប៊ីអាយ (FBI) កំពុងបន្តតាមដានយ៉ាងក្ដៅគគុក និងចាត់ទុកថានេះជា «ការប៉ុនប៉ងធ្វើឃាត» លោកត្រាំ អតីតប្រធានាធិបតីអាមេរិក និងជាបេក្ខជនប្រធានាធិបតីសម្រាប់ការបោះឆ្នោតនៅអាណត្តិថ្មី។ ហេតុការណ៍នេះកើតឡើងនៅរដ្ឋផឹនស៊ីលវេនៀ។ ខាងលើនេះជាអ្វីដែលអាជ្ញាធរចេញសេចក្ដីជូនដំណឹងស្ដីពីបច្ចុប្បន្នភាពចំពោះហេតុការណ៍នេះ។
![](https://kohsantepheapdaily.com.kh/wp-content/uploads/2024/07/d911860cd5488b491475c18ebfa33739-1.jpg)
លោកខេវីន រ៉ូជេក (Kevin Rojek) ជាទីភ្នាក់ការពិសេសរបស់អែហ្វប៊ីអាយទទួលបន្ទុកខាងការិយាល័យប្រចាំទីក្រុងភីតស្បឺក (Pittsburgh) រដ្ឋផឹនស៊ីលវេនៀ ថ្លែងថាអែហ្វប៊ីអាយគ្មានចេតនាបញ្ចេញអត្តសញ្ញាណខ្មាន់កាំភ្លើងដែលបាញ់លោកត្រាំនោះទេ ហើយក៏មិនទាន់រកឃើញមូលហេតុពិតប្រាកនៃការបាញ់នេះនៅឡើយដែរ។ ទង្វើរបស់ខ្មាន់កាំភ្លើងរូបនោះបណ្ដាលឱ្យលោកត្រាំត្រូវរបួសត្រង់ស្លឹកត្រចៀកខាងស្ដាំ ព្រមទាំងបណ្ដាលឱ្យរបួសមនុស្ស២នាក់ផ្សេងទៀត និងស្លាប់ម្នាក់។
![](https://kohsantepheapdaily.com.kh/wp-content/uploads/2024/07/e6f4d5d79b007bcc9ef507be3200571c-1.jpg)
មន្ត្រីអែហ្វប៊ីអាយខាងលើនេះថ្លែងថា «នៅល្ងាចនេះ យើងសូមចាត់ទុកទង្វើនោះជាការប៉ុនប៉ងធ្វើឃាតអតីតប្រធានាធិបតីដូណាល់ត្រាំ។ នេះជាអំពើឧក្រិដ្ឋដែលនៅតែបន្តការស៊ើបអង្កេតយ៉ាងក្ដៅគគុក។ ប៉ុន្តែសម្រាប់ពេលនេះ គ្មានអ្វីគួរឱ្យបារម្ភតទៅទៀតទេ»។ សូមជម្រាបថានៅពេលនេះ គេអាចស្គាល់អត្តសញ្ញាណរបស់ខ្មាន់កាំភ្លើងជាបណ្ដើរៗហើយ។ បុរសរូបនេះឈ្មោះថូម៉ាស់ មេតធូ គ្រូក (Thomas Matthew Crook) អាយុ២០ឆ្នាំ។
រូបខ្មាន់កាំភ្លើងឈ្មោះថូម៉ាស់ មេតធូ គ្រូក (Thomas Matthew Crook) ក្រោយពេលត្រូវកងការពារសម្ងាត់អាមេរិកបាញ់សម្លាប់នៅលើដំបូលរោងចក្រគាត់រស់នៅទីក្រុងបេថែល ផាក (Bethel Park) ដែលស្ថិតនៅចម្ងាយជាង៦០គីឡូម៉ែត្រពីកន្លែងជួបជុំរបស់លោកត្រាំ។ នៅក្នុងចំណោមគ្រាប់កាំភ្លើងដែលបាញ់តម្រង់ទៅរកក្បាលរបស់លោកត្រាំនោះ ១គ្រាប់ប៉ះត្រូវចំស្លឹកត្រចៀកលោកត្រាំខាងស្ដាំ, គ្រាប់ខ្លះហោះទៅចំមនុស្សបីនាក់បណ្ដាលឱ្យ២នាក់រងរបួស និងម្នាក់ស្លាប់។ ប្រភពខ្លះបង្ហើបឱ្យដឹងថាបុរសឈ្មោះគ្រូកបានដឹងថាមានការរៀបចំពិធីជួបជុំរបស់លោកត្រាំ។ ដូចនេះ គ្រូកក៏ត្រៀមកាំភ្លើង និងឡើងទៅលើរង់ចាំទុកមុននៅលើដំបូលរោងចក្រដែលស្ថិតនៅចម្ងាយពីវេទិកានោះប្រហែល១១៨ម៉ែត្រ។
រូបខ្មាន់កាំភ្លើងឈ្មោះថូម៉ាស់ មេតធូ គ្រូក (Thomas Matthew Crook) ក្រោយពេលត្រូវកងការពារសម្ងាត់អាមេរិកបាញ់សម្លាប់នៅលើដំបូលរោងចក្រក្រោយពេលបុរសរូបនោះបាញ់កាំភ្លើងប្រាវៗជាច្រើនគ្រាប់, កងការពារសម្ងាត់ក៏កំណត់ទីតាំងរបស់ជនដៃដល់ និងសម្រេចចិត្តបាញ់សម្លាប់ជនរូបនោះតែម្ដង។ សាក្សីនិយាយថាពួកគេឃើញបុរសឈ្មោះគ្រូកឡើងទៅលើដំបូលរោងចក្រ ហើយពួកគេបានយកដំណឹងនេះប្រាប់សមត្ថកិច្ច។ ពួកគេប្រាប់ថាមានអ្នកកាន់កាំភ្លើងវែងមួយដើមកំពុងស្ថិតនៅលើដំបូលអគារ។
រូបខ្មាន់កាំភ្លើងឈ្មោះថូម៉ាស់ មេតធូ គ្រូក (Thomas Matthew Crook) ក្រោយពេលត្រូវកងការពារសម្ងាត់អាមេរិកបាញ់សម្លាប់នៅលើដំបូលរោងចក្រសម្រាប់ពេលនេះ គេស៊ើបដឹងត្រឹមតែបន្តិចបន្តួចពីតម្រុយ ឬប្រវត្តិសាវតាររបស់ខ្មាន់កាំភ្លើង។ យោងតាមការផ្សាយរបស់កាសែតញូយ៉កប៉ុស្តិ៍ (New York Post), បុរសឈ្មោះគ្រូកជាអ្នករស់នៅទីក្រុងបេថែល ផាក (Bethel Park) នៃរដ្ឋផឹនស៊ីលវេនៀ។ នៅនឹងកន្លែងកើតហេតុ, គេឃើញកាំភ្លើងវែងម៉ាកអេអ័រ (AR) មួយដើម។ ភ្នាក់ងារអែហ្វប៊ីអាយ (FBI) ថ្លែងថាគេនៅតែមិនទាន់ស្រាវជ្រាវដឹងអំពីគោលបំណង ឬមូលហេតុពិតប្រាកដដែលនាំឱ្យជនដៃដល់រូបនោះប៉ុនប៉ងធ្វើឃាតលោកត្រាំទេ។
![](https://kohsantepheapdaily.com.kh/wp-content/uploads/2024/07/7f21a591fdd3688e895bccb4cbab7ab9.jpg)
ទីក្រុងបេថែលផាក (Bethel Park) ដែលជាទីកន្លែងរស់នៅរបស់ខ្មាន់កាំភ្លើងឈ្មោះគ្រូកនោះស្ថិតនៅចម្ងាយជាង៦០គីឡូម៉ែត្រពីកន្លែងរៀបចំវេទិការបស់លោកត្រាំ។ មានន័យថាបុរសរូបនេះបានធ្វើដំណើរចម្ងាយរាប់សិបគីឡូម៉ែត្រមករងចាំបាញ់លោកត្រាំ។ គេដឹងថាភ្នាក់ងារអែហ្វប៊ីអាយជាអ្នកទទួលរ៉ាប់រងតាមដាន ស្រាវជ្រាវ និងស៊ើបអង្កេតសំណុំរឿងនេះ៕
![](https://kohsantepheapdaily.com.kh/wp-content/uploads/2024/07/e16fa8037334883a12a1e99bb3b05d3f-1.jpg)
ចែករំលែកព័តមាននេះ