អ្នកដំណើរ២៧៧នាក់ ត្រូវបានក្រុមហ៊ុនអាកាសចរណ៍ Delta បម្រើអាហារមានដុះផ្សិត និងផ្អូមជូរ បណ្តាលឱ្យមនុស្សជាច្រើននាក់ពុល និងបង្ខំឱ្យយន្តហោះបង្វែរទិសចុះជាចតបន្ទាន់ ។ រូបថតអាហារខូច ដែលត្រូវបានអ្នកដំណើរបង្ហោះចែកចាយទម្លាយឱ្យឃើញថា អាហារដែលក្រុមហ៊ុនអាកាសចរណ៍ Delta AirLines បម្រើដល់អ្នកដំណើរលើយន្តហោះ គឺមានដុះផ្សិតឡើងខ្មៅ និងមានរសជាតិជូរខ្លាំង ។ នេះបើយោងតាមការចុះផ្សាយរបស់សារព័ត៌មាន simpleflying នៅថ្ងៃទី០៩ ខែ កក្កដា ឆ្នាំ២០២៤។
ហេតុការណ៍នេះ បានកើតមានឡើងកាលពីព្រឹកថ្ងៃទី០៣ ខែកក្កដា ឆ្នាំ២០២៤ លើជើងហោះហើរ Delta Flight 136 ដែលកំពុងហោះហើរដឹកអ្នកដំណើរ២៧៧នាក់ ក្នុងរយៈចម្ងាយឆ្ងាយ ដោយគ្រោងចំណាយពេលជាង៨ម៉ោងពីទីក្រុង Detroit សហរដ្ឋអាមេរិក ទៅឆ្ពោះកាន់ទីក្រុង Amsterdam ប្រទេសហូឡង់ ប៉ុន្តែវាត្រូវបានបង្វែរគោលដៅទៅចុះចតបន្ទាន់នៅទីក្រុងញូវយ៉ក បន្ទាប់ពីទទួលបានការណែនាំពីអ្នកជំនាញវេជ្ជសាស្ត្រ ដោយមានរថយន្តសង្គ្រោះនិងក្រុមគ្រូពេទ្យនៅរង់ចាំស្រាប់ ។
យន្តហោះ Airbus A330 នេះ បានចុះចតដោយសុវត្ថិភាពនៅក្នុងអាកាសយានដ្ឋាន John F. Kennedy នៅម៉ោង៤ទៀបភ្លឺ ហើយក្នុងចំណោមអ្នកដំណើរទាំងអស់ មានមនុស្ស២៤នាក់កើតមានអាការៈពុលអាហារ និង១២នាក់ទទួលការព្យាបាលពីគ្រូពេទ្យ ប៉ុន្តែមិនមាននរណាម្នាក់ ត្រូវបញ្ជូនទៅសង្គ្រោះបន្ទាន់នោះទេ ។
ក្រោយពេលយន្តហោះចុះចត អ្នកដំណើរជាច្រើននាក់ បានថ្លែងប្រាប់អ្នកកាសែតថា វាជាបទពិសោធន៍ដ៏អាក្រក់ ។ ពួកគេបានឃើញ ចំណុចខ្មៅនៅលើអាហារដែលមើលទៅស្ទើរតែដូចនឹងឈីសដុត «ខ្ញុំគិតថាវាគ្រាន់តែជាអ្វីដែលខុសគ្នា ហើយខ្ញុំស្មានថា វាក្លាយទៅជាផ្សិតខ្មៅ»។អ្នកដំណើរម្នាក់ទៀតបានរំឭកថា «កូនស្រីរបស់ខ្ញុំបានញ៉ាំសាច់មាន់ ហើយនាងញ៉ាំវាមិនអស់នោះទេ នាងបានឈប់ញ៉ាំ ព្រោះតែវា មានរសជាតិជូរខ្លាំងពេក» ។
ក្រុមហ៊ុនអាកាសចរណ៍ Delta បានបញ្ជាក់រតាមសេចក្តីថ្លែងការណ៍ថា សេវាអាហារត្រូវបានកែសម្រួលសសម្រាប់ជើងហោះហើររាប់សិប ក្នុងរយៈពេលប៉ុន្មានថ្ងៃចុងក្រោយនេះ បន្ទាប់ពីកើតមានហេតុការណ៍ខាងលើ ។ «ក្រុមសុវត្ថិភាពចំណីអាហាររបស់ Delta បានចូលរួមជាមួយអ្នកផ្គត់ផ្គង់របស់យើងដើម្បីផ្តាច់ផលិតផលភ្លាមៗ ហើយចាប់ផ្តើមការស៊ើបអង្កេតឱ្យបានហ្មត់ចត់លើឧប្បត្តិហេតុ» ។
«យើងសូមអភ័យទោសដោយស្មោះចំពោះអតិថិជនរបស់យើងចំពោះភាពរអាក់រអួល និងការពន្យារពេលក្នុងការធ្វើដំណើររបស់ពួកគេ» ។ អ្នកនាំពាក្យក្រុមហ៊ុន Delta លោក Anthony Black បាននិយាយថា ក្រុមហ៊ុនអាកាសចរណ៍មិនបានកំណត់ចំនួនពិតប្រាកដនៃមនុស្សដែលទទួលទានអាហារដែលខូចនោះទេ ខណៈដែលបុគ្គលិកបម្រើការលើយន្តហោះទាំងអស់មិនមានម្នាក់បានបរិភោគអាហារទាំងនោះឡើយ ។
សូមបញ្ជាក់ថា កញ្ចប់អាហារដែលក្រុមហ៊ុនអាកាសចរណ៍បម្រើជូនអ្នកដំណើរ គឺត្រូវបានផ្គត់ផ្គង់ដោយក្រុមហ៊ុនចំណីអាហារ ដែលចម្អិនស្រេច ដោយរក្សាទុកក្នុងទូទឹកកក បន្ទាប់មកត្រូវបានកំដៅ មុនបម្រើដល់អ្នកដំណើរ ។
យោងតាមអ្នកជំនាញសុខភាព ហេតុផលដែលធ្វើឱ្យអាហារខូច រួមមានការគ្រប់គ្រងទុកដាក់ ឬ ចម្អិនអាហារមិនត្រឹមត្រូវ ៕
ចែករំលែកព័តមាននេះ