រដ្ឋបាលខេត្តពោធិ៍សាត់ ច្រានចោលការចុះផ្សាយថា ទាហានសៀមចូលកាន់កា.ប់ស្ពានមេទឹក ជាព័ត៌មានមិនពិត
រាជធានីភ្នំពេញ ៖ រដ្ឋបាលខេត្តពោធិ៍សាត់ បំភ្លឺករណីគណនីហ្វេសប៊ុកឈ្មោះ Sarath Sun ផ្សាយថា ទាហានសៀមចូលមកជ្រៅ និងដោយសេរី ជាការមិនពិតនោះទេ…
រាជធានីភ្នំពេញ ៖ រដ្ឋបាលខេត្តពោធិ៍សាត់ បំភ្លឺករណីគណនីហ្វេសប៊ុកឈ្មោះ Sarath Sun ផ្សាយថា ទាហានសៀមចូលមកជ្រៅ និងដោយសេរី ជាការមិនពិតនោះទេ ។
សេចក្តីបំភ្លឺព័ត៌មានរបស់រដ្ឋបាលខេត្តពោធិ៍សាត់ បានលើកឡើង នៅថ្ងៃទី១៩ ខែមករា ឆ្នាំ២០២៦ មានម្ចាស់គណនីហ្វេសប៊ុកឈ្មោះ Sarath Sun បានចុះផ្សាយលើគណនីហ្វេសបុករបស់ខ្លួនថា ចូលជ្រៅណាស់ ចូលដោយសេរី បើតាមការអះអាងរបស់អភិបាលខេត្តពោធិ៍សាត់ លោក ខូយ រីដា ស្ពានមេទឹកដែលសៀមទម្លា.ក់គ្រាប់កម្ទេច ចំថ្ងៃមុន ឥឡូវទាហានសៀមចូលកាន់កាប់ឈរជើងហើយ…។
ពាក់ព័ន្ធករណីនេះ រដ្ឋបាលខេត្តពោធិ៍សាត់ សូមជម្រាបជូនដល់សាធារណជន និងបណ្តាញផ្សព្វផ្សាយព័ត៌មានទាំងអស់ឱ្យបានជ្រាបថា ៖ ១. ស្ពានស្ទឹងមេទឹក ដែលពីមុនទាហានសៀម បានរំលោភបំពាន តាមរយៈការកម្ទេចស្ពាន ដោយយន្តហោះ F-16 កន្លងទៅនោះ បច្ចុប្បន្នពុំមានទាហានសៀម ចូលកាន់កាប់ដូចការចុះផ្សាយរបស់គណនីហ្វេសបុកឈ្មោះ Sarath Sun ឡើយ ។
ជាក់ស្តែងទីតាំងនោះ ត្រូវបានជំនាញសាធារណការកំពុងធ្វើការជួសជុល និងសម្រួលផ្លូវធ្វើដំណើរជូនបងប្អូនប្រជាពលរដ្ឋដែលវិលត្រឡប់ទៅតាមលំនៅឋានដើមរបស់គាត់វិញ ។ ២. កាលពីថ្ងៃទី១៥-១៦ ខែមករា ឆ្នាំ២០២៦ កន្លងទៅថ្មីៗនេះ ឯកឧត្តមអភិបាលខេត្តពោធិ៍សាត់ ក៏បានអមដំណើរ និងបានធ្វើការបង្ហាញជូនក្រុមអ្នកសង្កេតការណ៍អាស៊ាន (AOT) នៅទីតាំងចំនួន៤ ក្នុងនោះ ទីតាំងចំនួន ២រួមមាន ចំណុចអូរភ្លុកដំរី និងច្រកជ័យជំនះ(ច្រកផ្លូវ៥៦) មានផលប៉ះពាល់ដោយទាហានសៀមរំលោភឈ្លានពានចូលរាយបន្លាលួសក្នុងទឹកដីកម្ពុជា ។
ចំពោះទីតាំងចំនួន ២ទៀតរួមមាន ស្ពានស្ទឹងមេទឹក និងចំណុច(ច១) ត្រូវបានទាហានសៀមរំលោភបំពាន ដោយការបំផ្លិចបំផ្លាញ ខូចខាតហេដ្ឋារចនាសម្ព័ន្ធ និងទ្រព្យសម្បត្តិតែប៉ុណ្ណោះ ពុំមានការរំលោភចូលកាន់កាប់ទឹកដីរបស់កម្ពុជាយើងនោះឡើយ ។ ហើយជាក់ស្តែង នៅក្នុងថ្ងៃនោះដដែល ឯកឧត្តមអភិបាលខេត្ត ក៏បានផ្តល់បទសម្ភាសន៍ ជូនទូរទស្សន៍នៅលើទីតាំងស្ពានស្ទឹងមេទឹកផ្ទាល់តែម្តង ។
៣. ក្រោយពីមានបទឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥ ប្រជាពលរដ្ឋក្នុងឃុំថ្មដា ស្រុកវាលវែង ដែលបានជម្លៀសមកមណ្ឌលសុវត្ថិភាពនោះ ត្រូវបានវិលត្រឡប់ទៅកាន់លំនៅឋានដើមគាត់វិញប្រមាណ ៩០%ហើយ ជាពិសេសប្រជាពលរដ្ឋដែលរស់នៅម្តុំស្ពានស្ទឹងមេទឹកកំពុងរស់នៅជាធម្មតា ហើយថែមទាំងបានផលិតអំបោសផ្កាស្មៅលក់ ដើម្បីរួមចំណែកកែលម្អជីវភាពទៀតផង ។
រដ្ឋបាលខេត្តពោធិ៍សាត់ សូមធ្វើការច្រានចោលទាំងស្រុងចំពោះការផ្សាយរបស់គណនីហ្វេសបុកឈ្មោះ Sarath Sun ដែលជាការផ្សាយមិនពិត ហើយយករូបថតចាស់ពីមុនមកផ្សាយ ក្នុងគោលបំណង ដើម្បីបំភ្លើស ញុះញង់ បំពុលបរិយាកាសសង្គម និងអាចធ្វើឱ្យសាធារណជនមានការយល់ច្រលំ៕
ចែករំលែកព័តមាននេះ