ទីក្រុងបាងកក៖ តុលាការធម្មនុញ្ញថៃកំណត់យកថ្ងៃទី២៧ ខែកក្កដាខាងមុខនេះដើម្បីបើកសវនាការសម្រេចថាតើត្រូវដកហូតតំណែងលោកសេដ្ឋា ថាក់វិស៊ីនពីតំណែងនាយករដ្ឋមន្ត្រីឬយ៉ាងណា។ បញ្ហានេះពាក់ព័ន្ធនឹងពាក្យបណ្ដឹងរបស់សមាជិកព្រឹទ្ធសភាខាងក្រុមយោធាដែលដាក់ញត្តិប្ដឹងទៅតុលាការបន្ទាប់ពីលោកសេដ្ឋាតែងតាំងមនុស្សធ្លាប់មានពិរុទ្ធភាពឲ្យកាន់តំណែងនៅក្នុងគណៈរដ្ឋមន្ត្រី។
កាលពីដើមខែកក្កដានេះ តុលាការធម្មនុញ្ញប្រកាសថាសាលដីកាស្ថាពរនឹងប្រកាសឱ្យដឹងមុនការចូលមកដល់នៃខែកញ្ញា។ បានសេចក្ដីថាយ៉ាងយូរបំផុតត្រឹមចុងខែសីហា។ ឥឡូវនេះ តុលាការកំពុងខិតខំស្វះស្វែងរកភស្តុតាងបន្ថែមទៀតដើម្បីដាក់បន្ទុក។ តុលាការបង្គាប់ឱ្យម្ចាស់បណ្ដឹងបញ្ជូនឯកសារបន្ថែមទៀតរួមទាំងភស្តុតាងផ្សេងៗ។ ក្រៅពីនេះ តុលាការក៏ទាមទារព័ត៌មានបន្ថែមពីបុគ្គលដែលត្រូវបានកោះហៅឱ្យចូលឆ្លើយបំភ្លឺកាលពីមុននេះផងដែរ។
សំណុំរឿងដកតំណែងលោកសេដ្ឋាកើតមានឡើងបន្ទាប់ពីសមាជិកព្រឹទ្ធសភា៤០រូបដាក់ពាក្យប្ដឹងកាលពីខែឧសភា។ តបតាមពាក្យបណ្ដឹងនោះ តុលាការធម្មនុញ្ញយល់ព្រមទទួលយកមកពិនិត្យ និងបើកសវនាការនាពេលខាងមុខ។ ភាពចម្រូងចម្រាសពាក់ព័ន្ធនឹងការតែងតាំងលោកពិចិត្រ ឈឺនបាន (Pichit Chuenban) ដែលធ្លាប់ជាប់ពន្ធនាគារពីបទមិនគោរពតុលាការ។
ពាក្យបណ្ដឹងនោះចោទប្រកាន់ថាលោកសេដ្ឋាបានតែងតាំងមនុស្សដែលមិនមានលក្ខណៈសម្បត្តិគ្រប់គ្រាន់ដើម្បីទទួលតំណែងជារដ្ឋមន្ត្រី។ ក្រោយពាក្យបណ្ដឹងនោះ ដោយសារមើលសភាពការណ៍មិនស្រួល លោកពិចិត្រក៏ដាក់ពាក្យសូមលាលែងពីតំណែងដើម្បីកុំឱ្យមានរឿងវែងឆ្ងាយ។ ជាពិសេស លោកពិចិត្រមិនចង់ឱ្យលោកសេដ្ឋាអស់តំណែងដោយសារគាត់។ ប៉ុន្តែនៅទីបំផុត គេនៅតែតាមរករឿងគាត់ (លោកសេដ្ឋា) ឱ្យទាល់តែបាន។ នៅក្នុងទិដ្ឋភាពនេះ អ្នកខ្លះចាត់ទុកថាជារឿងនយោបាយច្រើនជាង។
ឧបមាថាលោកសេដ្ឋាក្នុងនាមជាអ្នកនយោបាយថ្មីថ្មោងត្រូវតុលាការសម្រេចដកហូតតំណែងរបស់គាត់ពិតមែន ប្រទេសថៃត្រូវតែបង្កើតសមាសភាពគណៈរដ្ឋមន្ត្រីថ្មី។ បេក្ខជននាយករដ្ឋមន្ត្រីនៅតែស្ថិតនៅក្នុងកូតារបស់គណបក្សភឿថៃដដែលទេ។ គ្រាន់តែផ្លាស់មនុស្ស។ ពេលនោះ ភឿថៃត្រូវបញ្ជូនបេក្ខជនថ្មីម្នាក់ទៀតទៅសភាដើម្បីទទួលការបោះឆ្នោតផ្ដលសេចក្ដីទុកចិត្ត។
គួរកត់សម្គាល់ថាការប្ដឹងដកតំណែងលោកសេដ្ឋាពីតំណែងស្របពេលដែល «គណបក្សឆ្ពោះទៅមុខ» ក៏កំពុងមានបញ្ហាដូចគ្នា។ គណបក្សឆ្ពោះទៅមុខក៏ប្រឈមនឹងការរំលាយចោលផងដែរតបតាមពាក្យបណ្ដឹងរបស់ក្រុមយោធានិយម និងក្រុមរាជានិយម។ សំណុំរឿងប្ដឹងផ្ដល់ទាំង២នេះឆ្លុះបញ្ចាំងឱ្យឃើញពីភាពមិនប្រាកដប្រជាផ្នែកនយោបាយនៅប្រទេសថៃ។ នេះបើយោងក្រុមអ្នកវិភាគ៕
ចែករំលែកព័តមាននេះ