ខេត្តកំពង់ស្ពឺ ៖ មនុស្សចំនួន០៣នាក់ ពាក់ព័ន្ធនឹងលេងល្បែងស៊ីសង ត្រូវបាននគរបាលខេត្តកំពង់ស្ពឺ កសាងសំណុំរឿងបញ្ជូនទៅតំណាងអយ្យការអមសាលាដំបូងខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ។ ការបញ្ជូនខ្លួន ក្រុមជនសង្ស័យពាក់ព័ន្ធរឿងលេងល្បែងស៊ីសង…
ខេត្តកំពង់ស្ពឺ ៖ មនុស្សចំនួន០៣នាក់ ពាក់ព័ន្ធនឹងលេងល្បែងស៊ីសង ត្រូវបាននគរបាលខេត្តកំពង់ស្ពឺ កសាងសំណុំរឿងបញ្ជូនទៅតំណាងអយ្យការអមសាលាដំបូងខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ។
ការបញ្ជូនខ្លួន ក្រុមជនសង្ស័យពាក់ព័ន្ធរឿងលេងល្បែងស៊ីសង (ជល់មាន់អនឡាញ) នេះ ធ្វើឡើងកាលពីថ្ងៃទី៨ ខែកក្កដា ឆ្នាំ២០២៤នេះ ដើម្បីតំណាងអយ្យការ ចាត់ការបន្តតាមនីតិវិធី ។
បើតាមការឱ្យដឹងពីលោក សម សាក់ ស្នងការរង ទទួលផែនព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្តកំពង់ស្ពឺ បានឱ្យដឹងថា មនុស្សទាំង០៣នាក់នោះ រួមមាន ៖
ទី០១. ឈ្មោះ ភុន ណុល ភេទប្រុស អាយុ២៩ឆ្នាំ រស់នៅក្នុងភូមិទួលតាចិន ឃុំខ្វាវ ស្រុកសំរោង ខេត្តតាកែវ (ជាអ្នកកាន់ម៉ាស៊ីន មេស៊ីសង)។
ទី០២. ឈ្មោះ សំ វុន ភេទប្រុស អាយុ៥៧ឆ្នាំ រស់នៅក្នុងភូមិធ្លក ឃុំជង្រុក ស្រុកគងពិសី ខេត្តកំពង់ស្ពឺ (ម្ចាស់ផ្ទះ)។
និងទី០៣. ឈ្មោះ ឆុន សារុន ភេទប្រុស អាយុ៤៣ឆ្នាំ រស់នៅភូមិធ្លក ឃុំជង្រុក ស្រុកគងពិសី ខេត្តកំពង់ស្ពឺ(ជាអ្នកលេង) ។
លោក សម សាក់ បានបញ្ជាក់ប្រាប់ផងដែរថា ពាក់ព័ន្ធនឹងក្រុមមនុស្ស ដែលជាអ្នកញៀនល្បែងទាំងនេះដែរ មុនពេលឃាត់ខ្លួនរូបលោកបានរាយការសុំគោលការណ៍ពីព្រះរាជអាជ្ញារួចហើយ ក៏បើកប្រតិបត្តិការឃាត់ខ្លួនតែម្ដង។ ចំណែកពាក្យចចាមអារាម ថាលោកទារលុយគេ មិនបានហើយបញ្ជូនគេទៅតំណាងអយ្យការ ចាត់ការបន្តនេះ គឺជារឿងមិនពិតនោះឡើយ ។
សូមរំលឹកផងដែរថា កាលពីវេលាម៉ោង១៤និង៣០នាទីថ្ងៃទី០៤ ខែកក្កដា ឆ្នាំ២០២៤ កម្លាំងការិយាល័យនគរបាលព្រហ្មទណ្ឌកំរិតធ្ងន់ ចុះបង្ក្រាបទីតាំងលេងល្បែងស៊ីសងខុសច្បាប់ (មាន់ជល់តាមអនឡាញ) នៅចំណុចភូមិធ្លក ឃុំជង្រុក ស្រុកគងពិសី ដោយបាន ឃាត់ខ្លួនចំនួន០៣នាក់ (ដូចខាងលើ)។ ក្រោយធ្វើការឃាត់ខ្លួនមនុស្សទាំង៣នាក់ កម្លាំងនគរបាលដកហូតវត្ថុតាង រួមមាន ៖
-លុយចំនួន ៣៥១,០០០រៀល
-កុំព្យូទ័រ០១គ្រឿង និងស៊ីភីយូ០១គ្រឿង
-ម៉ូតូ០១គ្រឿងម៉ាកហុងដាសេ125 ពណ៌ខ្មៅ ស៊េរីឆ្នាំ២០២០ ពាក់ស្លាកលេខកំពង់ចាម 1Y -2719 និងទូរសព្ទ០១គ្រឿងម៉ាកអាយហ្វូន Xពណ៌ខ្មៅ។
យោងតាមប្រភពដែលភ្នាក់ងារយើងទទួលបានទីតាំងជល់មាន់អនឡាញមួយនេះ គឺបើកលេងយូរថ្នាំមកហើយ ប៉ុន្តែគេមិនដែលឃើញលោកអនុសេនីយ៍ឯក សម ហេង នាយប៉ុស្តិ៍នគរបាលជង្រុក ស្រុកគងពិសី ធ្វើការបង្ក្រាបម្ដងណាឡើយ។ ភាពអសកម្មរបស់លោក សម ហេង ត្រូវបានគេសង្ស័យថា រូបលោកប្រហែលជាទទួលសំណែនពីមេល្បែងនេះហើយ ទើបមិនបង្ក្រាប រហូតទាល់តែខាងការិយាល័យជំនាញព្រហ្មទណ្ឌចុះបង្ក្រាបផ្ទាល់ ៕
ចែករំលែកព័តមាននេះ