ខេត្តព្រះសីហនុ ៖ បើតាមសេចក្តីរាយការណ៍ចុងក្រោយបានឱ្យដឹង ពាក់ព័ន្ធករណីផ្ទុះការភ្ញាក់
ផ្អើល ដោយសារឃើញស្ត្រីជាជនជាតិឡាវម្នាក់ ព្យាយាមរត់ចេញតាមបង្អួចផ្ទះសំណាក(អូនរីយ៉ា) នៅជាន់ទី៧ ដោយតោងខ្សែពួរយោងទម្លាក់ខ្លួនចុះមកក្រោម នៅវេលាម៉ោងជាង៩ព្រឹក ថ្ងៃទី៨ ខែកក្កដា ឆ្នាំ២០២៤ ស្ថិតនៅចំណុចក្បែររង្វង់មូលត្រីដូហ្វីន ស្ថិតក្នុងភូមិ២ សង្កាត់លេខ៣ ក្រុងព្រះសីហនុ ។
តាមពិតទៅ គឺជា«សណ្ឋាគារធំ»មួយ ប៉ុន្តែគេបែរជាប្រើពាក្យ«ផ្ទះសំណាក់»ទៅវិញ ដែលសង្ស័យ«លួចពន្ធ»សមត្ថកិច្ចជំនាញនៃស្នងការដ្ឋាននគរបាលខេត្តព្រះសីហនុ បានបង្ហើបឲ្យដឹងថា ស្ដ្រីដែលបានប្រើប្រាស់ខ្សែពួរសម្រូតចុះពីលើអគារតាមបង្អួចនៃផ្ទះសំណាក់ខាងលើ ជាជនជាតិឡាវ មានឈ្មោះ PIk DOUANGMALA អាយុ៣៣ឆ្នាំ ស្នាក់នៅផ្ទះសំណាក់(អូនរីយ៉ា) បន្ទប់លេខ៨៧០៣ ។
ប្រភពខាងលើបានបន្តឲ្យដឹងទៀតថា ដោយសារតែខ្សែពួរដែលនារីរងគ្រោះបានប្រើប្រាស់ក្នុងការសម្រូតយោងខ្លួនចុះមកក្រោមខ្លី មកទើត្រឹមដំបូលរោងបាយនៃជាន់ទី១ កម្ពស់ប្រមាណ៧ម៉ែត្រពីដី មិនអាចឲ្យនារីរងគ្រោះចុះមកក្រោមបាន ក៏តោងយោងខ្លួននៅទីនោះ ។
ក្រោយពីទទួលបានព័ត៌មាននេះភ្លាម អាជ្ញាធរ និងសមត្ថកិច្ចនគរបាលនៃស្នងការដ្ឋាននគរបាលខេត្តព្រះសីហនុ បានជួយអន្តរាគមន៍ ដោយប្រើមធ្យោបាយ យករថយន្តដងសន្ចូចដែលមាន
កន្ក្រក ដើម្បីជួយសង្គ្រោះស្ត្រីជនជាតិឡាវខាងលើចុះមកក្រោមវិញដោយសុវត្ថិភាព ។
ជុំវិញមូលហេតុ សមត្ថកិច្ចនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះសីហនុបានបញ្ជាក់ឲ្យដឹងថា មិនមានករណីចាប់បង្ខាំងមនុស្សខុសច្បាប់នោះទេ គឺនារីរងគ្រោះមានសតិមិនល្អ អាចបណ្តាលមកពីការប្រើប្រាស់សារធាតុអ្វីមួយលើសកម្រិត
(បែក) ។
បច្ចុប្បន្ន សមត្ថកិច្ចកំពុងតែសាកសួរបន្ថែម និងធ្វើតេស្តរកសារធាតុញៀន មុននឹងប្រគល់ទៅខាងការិយាលយ័នគរបាលអន្តោប្រវេសន៍ នៃស្នងការដ្ឋាននគរបាលខេត្តព្រះសីហនុ ដើម្បីអនុវត្តតាមនីតិវិធីបន្ត ៕
ចែករំលែកព័តមាននេះ