ទីក្រុងវ៉ាស៊ីនតោន៖ ក្រុមហ៊ុនបូអ៊ីងនៅសុខៗអស់លុយ២៥០០លានដុល្លារដោយសារការធ្លាក់យន្តហោះកាលពីឆ្នាំ២០១៨ និងឆ្នាំ២០១៩នៅអេត្យូពី និងឥណ្ឌូណេស៊ី ស្លាប់មនុស្ស៣៤៦នាក់។ គណៈកម្មការស៊ើបអង្កេតរកឃើញថាគ្រោះថ្នាក់ទាំង២ករណីទៅលើយន្តហោះបូអ៊ីង៧៣៧ម៉ាក (Boeing 737 Max) បណ្ដាលមកពីបញ្ហាបច្ចេកទេសរបស់ក្រុមហ៊ុនផ្ទាល់តែម្ដង។…
ទីក្រុងវ៉ាស៊ីនតោន៖ ក្រុមហ៊ុនបូអ៊ីងនៅសុខៗអស់លុយ២៥០០លានដុល្លារដោយសារការធ្លាក់យន្តហោះកាលពីឆ្នាំ២០១៨ និងឆ្នាំ២០១៩នៅអេត្យូពី និងឥណ្ឌូណេស៊ី ស្លាប់មនុស្ស៣៤៦នាក់។ គណៈកម្មការស៊ើបអង្កេតរកឃើញថាគ្រោះថ្នាក់ទាំង២ករណីទៅលើយន្តហោះបូអ៊ីង៧៣៧ម៉ាក (Boeing 737 Max) បណ្ដាលមកពីបញ្ហាបច្ចេកទេសរបស់ក្រុមហ៊ុនផ្ទាល់តែម្ដង។
យន្តហោះទាំង២គ្រឿងកំពុងហោះហើរកណ្ដាលអាកាសសុខៗស្រាប់តែគាំងម៉ាស៊ីនទាំងស្រុង។ ទោះបីអាកាសយានិកខិតខំកែសម្រួលស្ថានការណ៍យ៉ាងណាក៏ជាការឥតប្រយោជន៍។ ដូច្នេះ បូអ៊ីងសូមទទួលស្គាល់កំហុសគ្រប់យ៉ាង និងយល់ព្រមផ្ដល់ប្រាក់សំណងទៅតាមការទាមទាររបស់រដ្ឋអាជ្ញា។ នេះបើយោងតាមសេចក្ដីប្រកាសរបស់ក្រសួងយុត្តិធម៌អាមេរិក។
មុននឹងឈានដល់កិច្ចព្រមព្រៀងនេះ បូអ៊ីងបានតស៊ូតាមផ្លូវច្បាប់អស់ជាច្រើនខែមកហើយ ហើយព្យាយាមរារាំងមិនឱ្យរដ្ឋអាជ្ញាយករឿងនេះទៅដល់ដៃតុលាការ។ ប៉ុន្តែរដ្ឋអាជ្ញាធរដាក់លក្ខខណ្ឌឱ្យបូអ៊ីងត្រូវតែទទួលស្គាល់ទោសកំហុសរបស់ខ្លួន និងយល់ព្រមផ្ដល់ប្រាក់សំណង។ ពុំដូច្នោះទេ រដ្ឋអាជ្ញានឹងប្ដឹងក្រុមហ៊ុនបូអ៊ីងទៅតុលាការដែលអាចនឹងមានរឿងកាន់តែធំ។
យោងតាមកិច្ចព្រមព្រៀងនេះ បូអ៊ីងយល់ព្រមបង់ប្រាក់ពិន័យ២៤៣លានដុល្លារ, យល់ព្រមបញ្ចេញសាច់ប្រាក់៤៥៥លានដុល្លារដើម្បីពង្រឹងប្រព័ន្ធសុវត្ថិភាពនៅក្នុងយន្តហោះ, យល់ព្រមបញ្ជូនគណៈកម្មការនាយករបស់ក្រុមហ៊ុនដើម្បីជួបក្រុមគ្រួសារជនរងគ្រោះ និងផ្ដល់ប្រាក់សំណង៥០០លានដុល្លារទៅពួកគេ រួមទាំងថ្លៃចំណាយផ្សេងៗសរុប២៥០០លានដុល្លារ។
កាលពីខែឧសភា ឆ្នាំ២០២៤ ក្រសួងយុត្តិធម៌អាមេរិករកឃើញថាក្រុមហ៊ុនបូអ៊ីងបានធ្វើខុសពីកិច្ចព្រមព្រៀងឆ្នាំ២០២១។ ដូច្នេះ រដ្ឋអាជ្ញាធរត្រូវតែចាប់បង្ខំឱ្យបូអ៊ីងទទួលស្គាល់កំហុសរបស់ខ្លួន។ ទោះបីគ្មានការប្ដឹងផ្ដល់ទៅតុលាការ ប៉ុន្តែបូអ៊ីងចាប់ផ្ដើមស្អុយឈ្មោះជាបណ្ដើរៗហើយតាមរយៈការទទួលស្គាល់ទោសកំហុសជាលាយលក្ខណ៍អក្ស។ ដូច្នេះ បូអ៊ីងក្លាយជាពិរុទ្ធជនរួចជាស្រេច។ ទៅថ្ងៃមុខ បូអ៊ីងអាចនឹងមានបញ្ហានៅក្នុងការលក់ចេញផលិតផលរបស់ខ្លួនទៅឱ្យរដ្ឋាភិបាលអាមេរិក។
នៅក្នុងចំណោមទឹកប្រាក់៧៨ពាន់លានដុល្លារបានមកពីការលក់ចេញរបស់បូអ៊ីងកាលពីឆ្នាំមុន, ៣២%បានមកពីការលក់សេវា ឬផលិតផលផ្នែកការពារជាតិ អវកាស និងសន្តិសុខជាតិទៅឱ្យរដ្ឋាភិបាលអាមេរិក។ ដូច្នេះ ទៅថ្ងៃមុខ ទឹកលុយយ៉ាងច្រើនសន្ធឹកសន្ធាប់ដែលបូអ៊ីងអាចនឹងទទួលបានវាបែរជារបូតពីដៃរបស់ពួកគេទៅវិញ។ បូអ៊ីងរ៉ាយរ៉ាប់នៅក្នុងសេចក្ដីថ្លែងការណ៍របស់ខ្លួនថាខ្លួនបានសម្រុះសម្រួលគ្នាជាមួយក្រសួងយុត្តិធម៌ និងឈានដល់កិច្ចព្រមព្រៀងបញ្ចប់បញ្ហាគ្រប់យ៉ាង។
តាមពិត កិច្ចព្រមព្រៀងឆ្នាំ២០២១នោះនៅសល់២ថ្ងៃទៀតត្រូវហួសសុពលភាពបាត់ទៅហើយ។ ប៉ុន្តែចៃដន្យអី យន្តហោះម៉ាក៧៣៧ម៉ាក៩ (737 Max 9) របស់ក្រុមហ៊ុនអាឡាស់ស្កាអ៊ែរឡាញ (Alaska Airlines) ជួបនឹងហេតុការណ៍របើកទ្វារធ្លាក់មកក្រោមនៅពេលកំពុងហោះហើរនៅលើអាកាសកាលពីថ្ងៃទី៥ ខែមករា ឆ្នាំ២០២៤។ ថ្វីដ្បិតគ្មានមនុស្សស្លាប់ ប៉ុន្តែវាជាការបន្ថែមបន្ទុកកាន់តែធ្ងន់ទៅលើបូអ៊ីង។ វាធ្វើឱ្យមតិសាធារណៈដកសេចក្ដីទុកចិត្ត និងព្រួយបារម្ភអំពីបញ្ហាសុវត្ថិភាព។
ទោះបីបូអ៊ីងយល់ព្រមបង់លុយ២៥០០លានដុល្លារក៏ដោយ ក៏បញ្ហាមិនទាន់បញ្ចប់ត្រឹមហ្នឹងទេ។ កិច្ចព្រមព្រៀងនេះត្រូវតែឆ្លងកាត់ការអនុម័តយល់ព្រមពីចៅក្រុមសហព័ន្ធមួយដំណាក់កាលទៀត។ ឥឡូវនេះ លោកប៉ូល ខាស់សែល (Paul Cassell) ជាមេធាវីតំណាងឱ្យជនរងគ្រោះគ្រោងដាក់ពាក្យស្នើសុំឱ្យចៅក្រមបដិសេធកិច្ចព្រមព្រៀងរវាងបូអ៊ីង និងរដ្ឋអាជ្ញា។ មេធាវីចង់ស្នើសុំឱ្យតុលាការយកសំណុំរឿងនេះមកជំនុំជម្រះជាសាធារណៈដើម្បីលាតត្រដាងការពិតឱ្យបានដឹងទាំងអស់គ្នា៕
ចែករំលែកព័តមាននេះ