កម្ពុជា និងជប៉ុន បានព្រមព្រៀងគ្នា ធ្វើការរួមគ្នាបោសសម្អាតគ្រា.ប់មីន នៅកម្ពុជា និងប្រទេសផ្សេងទៀត នៅលើពិភពលោក នេះបើតាមសេចក្តីប្រកាសព័ត៌មាន ដែលបានចេញក្រោយជំនួបរវាងឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា…
កម្ពុជា និងជប៉ុន បានព្រមព្រៀងគ្នា ធ្វើការរួមគ្នាបោសសម្អាតគ្រា.ប់មីន នៅកម្ពុជា និងប្រទេសផ្សេងទៀត នៅលើពិភពលោក នេះបើតាមសេចក្តីប្រកាសព័ត៌មាន ដែលបានចេញក្រោយជំនួបរវាងឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា លោក សុខ ចិន្តាសោភា និងលោកស្រី រដ្ឋមន្ត្រីការបរទេសជប៉ុន ខាមីខាវ៉ា យូកុ កាលពីថ្ងៃសៅរ៍ ។
ប្រភពដដែលបានបញ្ជាក់ថា ចំពោះវិស័យដោះមីន ភាគីជប៉ុន និងកម្ពុជានឹងបន្តកិច្ចសហប្រតិបត្តិការលើវិស័យនេះ ដើម្បីបម្រើដល់បុព្វហេតុមនុស្សធម៌ និងសន្តិភាពក្នុងតំបន់ និងពិភពលោក ។ លោកស្រី រដ្ឋមន្ត្រី ក៏បានបង្ហាញពីការត្រៀមសហការជាមួយកម្ពុជាដែលជាប្រធាន និងម្ចាស់ផ្ទះរៀបចំកិច្ច ប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ាដែលកម្ពុជាបានប្រសិទ្ធនាមថា កិច្ចប្រជុំកំពូលណាចក្រកម្ពុជា សៀមរាប-អង្គរ ស្តីពីពិភពលោក មួយដែលគ្មានមីន» នៅខែវិច្ឆិកាខាងមុខផងដែរ ។
ដោយឡែក លោក ហេង រតនា អគ្គនាយកស៊ីម៉ាក់ បានបង្ហើបថា ក្នុងជំនួបពិភាក្សាការងាកាលពីម្សិលមិញ លោក បានជម្រាបជូនលោកស្រី រដ្ឋមន្ត្រីការបរទេសជប៉ុន ពីប្រវត្តិសង្គ្រាមនៅកម្ពុជា បញ្ហាគ្រាប់មីននិងយុទ្ធភណ្ឌមិនទាន់ផ្ទុះ ដែលជាសំណល់យុទ្ធភណ្ឌសង្គ្រាម ដំណើរការនៃការកសាងសន្តិភាព ការអភិវឌ្ឍប្រទេសឡើងវិញ ក្រោយសង្គ្រាមត្រូវបានបញ្ចប់ និងបានចែករំលែកបទពិសោធន៍ និងកិច្ចខិតខំប្រឹងប្រែងរបស់អង្គភាពស៊ីម៉ាក់លើការងារបោសសម្អាតមីននៅកម្ពុជា។
លោក ហេង រតនា បានបញ្ជាក់ថា ស៊ីម៉ាក់រីករាយក្នុងការចូលរួមចែករំលែកបទពិសោធន៍ជាមួយបណ្ដាប្រទេស ដែលមានបញ្ហាគ្រាប់មីននិងសំណល់យុទ្ធភណ្ឌសង្គ្រាម ស្របតាមគោលនយោបាយរបស់រាជរដ្ឋាភិបាល ។ អង្គភាពស៊ីម៉ាក់ ក៏បានបញ្ជាក់ពីជំហក្នុងការគាំទ្រយ៉ាងពេញទំហឹងលើ «គំនិតផ្តួចផ្តើមនៃសកម្មភាពកម្ចាត់មីនកម្ពុជា-ជប៉ុន» ដែលលោកស្រីបានប្រកាស។
សូមជម្រាបថា ចាប់ពីឆ្នាំ១៩៩៤ ដល់ខែមិថុនា ឆ្នាំ២០២៤នេះ រដ្ឋាភិបាលជប៉ុនបានផ្ដល់ជំនួយលើវិស័យមីនមកកម្ពុជាមានទឹកប្រាក់មានចំនួនប្រមាណជាង២០០លានដុល្លាអាមេរិក ដោយផ្ដល់តាមរូបភាព៣សំខាន់គឺ ការផ្ដល់ជំនួយជាថវិកាដោយផ្ទាល់មកអង្គភាពស៊ីម៉ាក់, ការផ្ដល់តាមរយៈអង្គការក្រៅរដ្ឋាភិបាលជប៉ុនជាដៃគូរបស់អង្គភាពស៊ីម៉ាក់ និង ការផ្ដល់ជាជំនួយសម្ភារបច្ចេកទេស និងទីប្រឹក្សាបច្ចេកទេស ៕
ចែករំលែកព័តមាននេះ