ខេត្តកំពង់ស្ពឺ ៖ ហាមដាច់ខាតមិន អនុញ្ញាតឱ្យមានការលេងល្បែង និងលើកផ្ទាំងប៉ាណូផ្លូវពាណិជ្ជកម្មស្រាបៀរ នេះគឺជាការណែនាំពីសំណាក់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ…
ខេត្តកំពង់ស្ពឺ ៖ ហាមដាច់ខាតមិន អនុញ្ញាតឱ្យមានការលេងល្បែង និងលើកផ្ទាំងប៉ាណូផ្លូវពាណិជ្ជកម្មស្រាបៀរ នេះគឺជាការណែនាំពីសំណាក់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលបានអញ្ជើញប្រកាសចូលកាន់មុខតំណែងអភិបាលខេត្តកំពង់ស្ពឺ ដោយលោក ជាម ច័ន្ទសោភ័ណ ជំនួសលោក វ៉ី សំណាង ត្រូវទៅកាន់មុខតំណែងជាអភិបាលខេត្តតាកែវ នាព្រឹកថ្ងៃទី០៣ ខែកក្កដា ឆ្នាំ២០២៤ ។
ឯឧត្តមអភិសន្តិបណ្ឌិត ស សុខា បានថ្លែងថា ២ចំណុច ដែលចាប់អារម្មណ៍ខ្លាំងបំផុត ក្នុងខេត្តកំពង់ស្ពឺ កន្លងមក គឺហាមដាច់ខាតផ្សព្វផ្សាយលើកប៉ាណូទីសាធារណៈ ចំពោះគ្រឿងស្រវឹង នេះហើយដែលជាគោលបំណងកាត់បន្ថយគ្រោះថ្នាក់ចារចរណ៍ ដែលសម្លាប់ពលរដ្ឋស្លូតត្រង់រាល់ថ្ងៃ និងមួយទៀត គឺការទាក់ទាញអ្នកវិនិយោគរបស់រដ្ឋបាលខេត្តកំពង់ស្ពឺ ដែលមានសក្តានុពលខ្លាំងផ្នែករោងចក្រ ដែលខេត្តកំពង់ស្ពឺមានអ្នកវិនិយោគចាប់ពីចំនួន ៥លានដុល្លារឡើង ជាខេត្តជាប់លេខ១ កក្តានេះជំរុញឲ្យមានកំណើនសេដ្ឋកិច្ចតាមជនបទ ដោយសារតែពលរដ្ឋមានការងារធ្វើ ។
ឯឧត្តមអភិសន្តិបណ្ឌិត បានសង្កត់ធ្ងន់ថា ត្រូវបន្តការងារបង្ក្រាបការជួញដូរមនុស្ស ការជួញដូរគ្រឿងញៀន ការចាប់ជំរិតមនុស្ស ដែលប្រើរូបភាពអាសអាភាស។ល។ ជាងនេះអង្គភាពពាក់ព័ន្ធ ត្រូវត្រួតពិនិត្យ និងឈានទៅបង្ក្រាបឲ្យបានការជួញដូរមនុស្ស និងបទល្មើសផ្សេង ដែលកើតឡើង។ ដូចគ្នាចំពោះពាក់ព័ន្ធការជួញដូរអាវុធជាតិផ្ទុះ គណៈបញ្ជាការឯកភាពខេត្តកំពង់ស្ពឺ សហការដោយយកចិត្តទុកដាក់ចំពោះការកែច្នៃអាវុធចាស់ទៅជាថ្មី ហើយលក់ទៅឲ្យប្រទេសជិតខាងយើង សូមកុំឲ្យកើតមានឡើយ ។
ឯកឧត្តម បានស្នើឲ្យអភិបាលខេត្តកំពង់ស្ពឺថ្មី ត្រូវបន្តការដឹកនាំប្រកបដោយការអភិវឌ្ឍន៍ និងធ្វើយ៉ាងណាឲ្យពលរដ្ឋមានជំនឿចិត្ត កុំធ្វើឲ្យមានការបែកបាក់ផ្ទៃក្នុងរដ្ឋបាលខេត្តទាំងមូល ធ្វើយ៉ាងណា ត្រូវមានការសហការគ្នាឲ្យបានរលូន ។
ជាងនេះទៅទៀត ឯកឧត្តមស្នើឲ្យជំនាញត្រួតពិនិត្យលើបញ្ហាការនាំឱថសក្លែងក្លាយ ឬឱថស ហួសសុពលភាពពីបរទេសមកលក់ និងព្យាបាលឲ្យបងប្អូនប្រជាពលរដ្ឋ ដែលធ្វើឲ្យខូចសុខភាពយ៉ាងធ្ងន់ធ្ងរ ដូច្នេះក្នុងរឿងនេះមន្ត្រី កងកម្លាំងទាំងអស់ ត្រូវពង្រឹងការងារទប់ស្កាត់បញ្ហានេះឲ្យបាន ។
ដោយឡែកបញ្ហាអន្តរជាតិវិញ ឯកឧត្តម ឧបនាយករដ្ឋមន្ត្រី បានបន្ថែមថា បញ្ហាសង្គ្រាម វាជារឿងមួយ ដែលធ្វើឲ្យយើងជួបវិបត្តិសេដ្ឋកិច្ច តែមួយទៀតបញ្ហាព័ត៌មានវិទ្យា រួមផ្សំទាំងព័ត៌មានក្លែងក្លាយបំពុលសង្គម បានវិវត្តខ្លួនធ្វើឲ្យពលរដ្ឋ បានបាត់បង់លុយកាក់ តាមរយៈការឆបោក តាមគ្រប់រូបភាព នៃប្រព័ន្ធឡនឡាញ ដែលទាមទាឲ្យកងកម្លាំងសន្តិសុខទូទៅ ត្រូវគ្រប់គ្រងឲ្យបាន ដែលត្រូវមានបទពិសោធច្បាស់លាស់បំផុត ។
ដោយឡែកខេត្តកំពង់ស្ពឺ ចំពោះបញ្ហាភូមិ-ឃុំមានសុវត្តិភាពនោះ គឺការប្រយុទ្ធប្រឆាំងគ្រឿងញៀន បង្ការទប់ស្កាត់ អនុវត្ត ៣ចំណុច ហើយត្រូវយកចិត្តទុកដាក់ខ្ពស់បន្ថែមទៀត ក្រុមក្មេងទំនើង អនុវត្តច្បាប់ឲ្យតឹងរឹង សំដៅឲ្យពួកគេគោរពច្បាប់ ខ្លាចច្បាប់ បង្ក្រាបក្រុមល្បែងស៊ីសង គឺមិនអនុញ្ញាតឲ្យពង្រីកទីតាំងបន្ថែមទៀតបានឡើយ។ ក្នុងនោះហាមដាច់ខាតការស្នើសុំលើកប៉ាណូផ្សព្វផ្សាយពាណិជ្ជកម្ម ដែលនាំឲ្យពលរដ្ឋបង្កើត អាខោនលេងល្បែងតាមឡនឡាញ ។ល។ ទោះបីជ្រកក្រោមល្បែងស្របច្បាប់ក៏ដោយ ៕
ចែករំលែកព័តមាននេះ