រាជធានីភ្នំពេញ ៖ ក្រុមហ៊ុនបរទេសកំពុងតែតែប្រណាំងប្រជែងគ្នាក្នុងទីផ្សារដំឡើងរថយន្តនៅកម្ពុជា ពិសេស គឺរថយន្តចិន ជប៉ុន អាមេរិក និងកូរ៉េ ដោយធ្វើឱ្យកម្ពុជាស្ថិតនៅលើផ្លូវឆ្ពោះទៅកាន់ឧស្សាហកម្មធុនធ្ងន់ ។…
រាជធានីភ្នំពេញ ៖ ក្រុមហ៊ុនបរទេសកំពុងតែតែប្រណាំងប្រជែងគ្នាក្នុងទីផ្សារដំឡើងរថយន្តនៅកម្ពុជា ពិសេស គឺរថយន្តចិន ជប៉ុន អាមេរិក និងកូរ៉េ ដោយធ្វើឱ្យកម្ពុជាស្ថិតនៅលើផ្លូវឆ្ពោះទៅកាន់ឧស្សាហកម្មធុនធ្ងន់ ។
អ្នកជំនាញសេដ្ឋកម្ពុជានិយាយថា កម្ពុជាបានកំពុងតែស្ថិតនៅលើវិថីបោះជំហានទៅរកឧស្សាហកម្មធន់ធ្ងន់ ស្របពេលដែលឧស្សាហកម្មដំឡើងរថយន្តនៅកម្ពុជាបានហក់ចូលមកក្នុងប្រទេសបណ្តើរៗ ។ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា បានឱ្យដឹងថា ការវិនិយោគរបស់ក្រុមហ៊ុនដំឡើងរថយន្តជាបន្តបន្ទាប់នៅកម្ពុជា ជាការវិនិយោគឧស្សាហកម្មធន់ធ្ងន់នៅក្នុងប្រទេស ហើយប្រសិនបើឈានដល់ការផលិតគ្រឿងបន្លាស់ និងដំឡើងទាំងស្រុងនៅកម្ពុជានោះនឹងរឹតតែប្រសើរ ។
លោកបណ្ឌិត ហុង វណ្ណៈ បានឱ្យកម្មវិធីលុយ នៃសារព័ត៌មានកោះសន្តិភាព ដឹងថា «កន្លងទៅក្រុមហ៊ុន ៦ (ក្រុមហ៊ុនដំឡើងរថយន្តទាំងអស់) ដែលបានដំណើរការនៅកម្ពុជាភាគច្រើនមានតែក្រុមហ៊ុន ដំឡើងរថយន្តទេ នាំស្ពែផាត (គ្រឿងបន្លាស់) ទាំងអស់ គឺផលិតពីក្រៅប្រទេសមកដំឡើងនៅក្នុងប្រទេសកម្ពុជា ដូច្នេះយើងបានតែកម្លាំងពលកម្មនៅកម្ពុជាយើងទេ ចំណែកថ្លៃរថយន្តជាដើមនៅមិនទាន់មានការថមថយឡើយ ។ ហើយមួយទៀតរដ្ឋយើងទទួលបានចំណូលពីការបង់ពន្ធលើប៉ាតង់ប្រចាំឆ្នាំរបស់ក្រុមហ៊ុននេះជាដើម» ។
រូបតំណាង
លោកបណ្ឌិត ហុង វណ្ណៈ បន្ថែមថា ប្រសិនបើក្រុមហ៊ុនចិនមានចំណាប់អារម្មណ៍ ក្នុងការបណ្តាក់ទុននៅកម្ពុជានោះជាការប្រសើរ ហើយក៏ជាការឆ្លុះបញ្ចាំងអំពីលក្ខខណ្ឌវិនិយោគល្អនៅកម្ពុជា និងទីផ្សារនៅកម្ពុជា ។ លោកបណ្ឌិត បន្តថា «បច្ចុប្បន្នរថយន្តចិនជាច្រើនត្រូវបានធ្វើចរាចរណ៍នៅលើទីផ្សារកម្ពុជា ហើយក៏មានការចាប់អារម្មណ៍ពីបងប្អូនប្រជាពលរដ្ឋកម្ពុជាយើងកាន់តែច្រើនទៅ ។ បើយើងពិនិត្យមើលលើចរន្តនៃការចរាចរណ៍រថយន្តចិននៅទីផ្សារពិភពលោកក៏យើងឃើញថា មានការចាប់អារម្មណ៍ពីទីផ្សារទាំងអស់នោះដែរ ទាំងនៅអាស៊ី ទាំងនៅអឺរ៉ុប មានចរាចរណ៍ទីផ្សាររថយន្តចិន» ។
លោកបណ្ឌិត ហុង វណ្ណៈ បន្ថែមថា បច្ចុប្បន្ននេះរថយន្តចិនអាចប្រកួតប្រជែងជាមួយរថយន្តដែលផលិតនៅប្រទេសជប៉ុន អឺរ៉ុប និងប្រទេសដទៃជាច្រើន ។ ហើយគុណភាពរថយន្តចិននេះក៏អាចទទួលយកបានដែរ ។ សម្រាប់ប្រទេសកម្ពុជាវិញមានចរាចរណ៍រថយន្តចិន ហើយរថយន្តចិនជាច្រើនក៏បានយកមកលក់នៅលើទីផ្សារកម្ពុជាជាច្រើនផងដែរ ។ លោកបណ្ឌិត បន្ថែមថា «បើសិនណាជាម៉ាករថយន្តដែលមាននៅកម្ពុជា ដែលចរាចរណ៍នៅកម្ពុជាបច្ចុប្បន្ន បង្កើតរោងចក្រទៅទៀតនោះ អាណឹងកម្ពុជា ប្រជាជនកម្ពុជាមានភាពងាយស្រួលក្នុងការសម្រេចចិត្តប្រើប្រាស់រថយន្តចិនណឹងមួយកម្រិតទៀតផងដែរ» ។
បច្ចុប្បន្ននេះ ប្រទេសកម្ពុជាមានរោងចក្រដំឡើងរថយន្តចំនួន ៦ រួចមកហើយ ដែល រួមមាន ក្រុមហ៊ុនដេហាន់ ដំឡើងរថយន្តសាន់យុង (Ssangyong), ក្រុមហ៊ុនហ៊ីយ៉ានដាយ (Hyundai), ក្រុមហ៊ុន គៀ (HGB Motors Assembly manufacturing Kia), ក្រុមហ៊ុន RMA Automotive ដំឡើងរថយន្ត Ford, ក្រុមហ៊ុន GTV Motor ផលិតរថយន្តម៉ាកក្នុងស្រុក GTV និង Toyota Tsusho Manufacturing (Cambodia) ដំឡើង Fortuner និង Hilux ។ ហើយក្រៅពីនោះក៏នៅមានរោងចក្រដំឡើងរថយន្តមួយចំនួនដែលកំពុងតែប្រតិបត្តិការ ដែលរួមមានដូចជា ក្រុមហ៊ុន K Cambodia (Isuzu), ក្រុមហ៊ុន China Matrix Technology Group-Horche និង ក្រុមហ៊ុន EM Automotive ជាដើម ។ ដោយឡែកក្រុមហ៊ុន BVD ដែលជាក្រុមហ៊ុនផលិតរថយន្តអគ្គីសនីដ៏ល្បីល្បាញរបស់ចិន ក៏មានគម្រោងដំឡើងនៅកម្ពុជាផងដែរ ៕
ចែករំលែកព័តមាននេះ