ខេត្តបន្ទាយមានជ័យ ៖ សូមឱ្យចូលរួមគោរពច្បាប់ចរាចរណ៍ និងមិនឱ្យកែច្នៃម៉ូតូ ឬយានផ្សេងៗទៀត ដែលខុសលក្ខណៈបច្ចេកទេសឡើយ ។ លោកឧត្តមសេនីយ៍ត្រី ង៉ាន់…
ខេត្តបន្ទាយមានជ័យ ៖ សូមឱ្យចូលរួមគោរពច្បាប់ចរាចរណ៍ និងមិនឱ្យកែច្នៃម៉ូតូ ឬយានផ្សេងៗទៀត ដែលខុសលក្ខណៈបច្ចេកទេសឡើយ ។
លោកឧត្តមសេនីយ៍ត្រី ង៉ាន់ ចិន្តា ស្នងការរងផែនការងារ នគរបាលសណ្តាប់ធ្នាប់បានថ្លែងបែបនេះ ខណៈពេលលោកជួបជាមួយអាណាព្យាបាល និងជាម្ចាស់ម៉ូតូកែច្នៃខុសទ្រង់ទ្រាយដើម ចំនួន ០៧ គ្រឿងបានទទួលយកម៉ូតូទាំងនោះ នៅព្រឹកថ្ងៃទី ០១ ខែ កក្តដា ឆ្នាំ ២០២៤ នៅស្នងការដ្ឋាននគរបាលខេត្តបន្ទាយមានជ័យ ។
លោកឧត្តមសេនីយ៍ត្រី ស្នងការរងបានឱ្យដឹងថា ដោយអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធ ឡោះ ស្នងការនគរបាលខេត្តបន្ទាយមានជ័យ បានឱ្យកម្លាំងនគរបាលចរាចរណ៍ខេត្ត ក៏ដូចជាតាមបណ្តាអធិការដ្ឋាននគរបាលស្រុក ក្រុងទាំង៩ ចុះទប់ស្កាត់ និងបង្ក្រាបម៉ូតូកែច្នៃខុសបច្ចេកទេសបំពង់ស៊ីម៉ាំងលឺខ្លាំង (ប្រែន) និងការកែច្នៃបំពង់ស៊ីម៉ាំងខុសបទដ្ឋានបច្ចេកទេសនិងការកែច្នៃលេងភ្លើងឡាស៊ែខុសបច្ចេកទេសជាដើមនោះ លោកក៏បាន ជម្រុញឱ្យកងកម្លាំងនគរបាលជំនាញត្រូវបន្តចុះទប់ស្កាត់នូវការប្រើប្រាស់យានជំនិះគ្រប់ប្រភេទដែលកែច្នៃខុសបច្ចេកទេសបង្កផលប៉ះពាល់សណ្តាប់ធ្នាប់សាធារណៈ។
លោកបន្តថា ការប្រើប្រាស់ម៉ូតូកែច្នៃបំពង់ស៊ីម៉ាំងលឺខ្លាំង(ប្រែន)និងការប្រើប្រាស់រថយន្តបំពង់ស៊ីម៉ាំងលឺខ្លាំង(ប្រែន)នៅលើថ្នល់សាធារណៈប្រជាពលរដ្ឋបានធ្លាប់ប្តឹងរាយការណ៍មកលោកផ្ទាល់ពីការរំខាននៃការរស់នៅរបស់ពួកគាត់និងសំណូមពរឱ្យមានការទប់ស្កាត់និងចាត់វិធានការ។
ជាមួយគ្នានោះដែរ លោកឧត្តមសេនីយ៍ត្រី ង៉ាន់ ចិន្តា ស្នងការរងផែនការងារ នគរបាលសណ្តាប់ធ្នាប់ បានអំពាវនាវសុំឱ្យអាណាព្យាបាលគ្រប់រូប ត្រូវខិតខំអប់រំប្រដៅឲ្យកូនចៅប្រព្រឹត្តអំពើល្អ មិនត្រូវបង្កភ័យខ្លាចដល់អ្នកដទៃ ជាពិសេសរំខានដល់ការរស់នៅរបស់អ្នកដទៃ ខណៈពេលធ្វើដំណើររួមគ្នា លើផ្លូវសាធារណៈ ។ ដោយម្ចាស់ម៉ូតូ មិនត្រូវកែច្នៃដាក់ស៊ីម៉ាំងឮខ្លាំងខុសពីទ្រង់ទ្រាយដើម ជាហេតុធ្វើឲ្យរំខានដល់ដំណេកអ្នករស់នៅក្បែរផ្លូវជាតិ បង្កចលាចលសង្គម ខូចសណ្ដាប់ធ្នាប់សាធារណៈ ។ល។
ក្នុងនោះដែរ លោកក៏បានសង្កត់ធ្ងន់ថា៖ គ្រប់ម៉ូតូ ត្រូវមានកញ្ចក់ ស្លាកលេខ ហើយរាល់ពេលបើកបរម៉ូតូ ត្រូវពាក់មួកសុវត្ថិភាពជាប្រចាំ មិនត្រូវបើកបរក្នុងស្ថានភាពស្រវឹង ត្រូវវ៉ាជែងក្នុងស្ថានភាពគ្រោះថ្នាក់ ឬប្រណាំងគ្នាលេងតាមផ្លូវសាធារណៈ ដែលនាំឲ្យបុកឬប៉ះទង្គិចជាមួយអ្នកធ្វើដំណើរលើផ្លូវសារធារណៈបង្កឲ្យគ្រោះថ្នាក់ដល់អ្នកដទៃផងដែរ ។
ក្រោយពីអប់រំនិងធ្វើកិច្ចសន្យាបញ្ឈប់មិនឲ្យប្រព្រឹត្តជាលើកទី២នោះឡើយ ។ បន្ទាប់មក ម្ចាស់ម៉ូតូទាំងត្រូវដោះដូរបំពង់ស៊ីម៉ាំងប្រែនចេញ ទើបប្រគល់ជូនទៅប្រើប្រប្រាស់វិញ ។
ចែករំលែកព័តមាននេះ