លូទឹកស្អុ.យចំហជិត១០ឆ្នាំហើយ ទុកឱ្យហិតក្លិនបន្ត
- ស្វាយរៀង
ខេត្តស្វាយរៀង ៖ ប្រជាពលរដ្ឋនៅផ្សារកំពង់រោទ៍ ស្រុកកំពង់រោទ៍ ខេត្តស្វាយរៀង បានកើតចម្ងល់
ខេត្តស្វាយរៀង ៖ ប្រជាពលរដ្ឋនៅផ្សារកំពង់រោទ៍ ស្រុកកំពង់រោទ៍ ខេត្តស្វាយរៀង បានកើតចម្ងល់គ្រប់គ្នា ករណីលូនៅតាមដងផ្លូវជាច្រើន ដែលត្រូវបានធ្វើជាយូរឆ្នាំមកហើយនោះ អាជ្ញាធរមិនព្រមដាក់គម្របបិទនោះទេ ដែលបង្កឲ្យធុំក្លិនស្អុយយ៉ាងអសោចិ៍ ប៉ះពាល់ដល់ប្រជាពលរដ្ឋដែលរស់នៅជិតមាត់លូ គឺទុកឱ្យហិតក្លិនរាប់ឆ្នាំអត់ខ្វល់ ។
មហាជនបានលើកឡើងថា ការដែលអាជ្ញាធរមិនព្រមបិទគម្របលូបែបនេះ នាំឲ្យមានក្លិនស្អុយជះចេញមកក្រៅ បង្កឲ្យប៉ះពាល់ដល់ប្រជាពលរដ្ឋដែលរស់នៅជិតមាត់លូ និងអាចបង្កឲ្យមានគ្រោះថ្នាក់ដល់អ្នកធ្វើដំណើរ ជាពិសេសកុមារ ។ មិនតែប៉ុណ្ណោះ នៅពេលដែលប្រជាពលរដ្ឋស្ម័គ្រចិត្តធ្វើគម្របលូដោយខ្លួនឯងយកមកបិទបណ្ដោះអាសន្ននោះ លោកអភិបាលស្រុកកំពុងរោទ៍មិនអនុញ្ញាតឲ្យបិទមាត់លូនោះជាដាច់ខាត ។ ប្រជាពលរដ្ឋលើកឡើងបែបនេះ នៅព្រឹកថ្ងៃទី៣០ មិថុនា ២០២៤ នៅផ្សារកំពង់រោទ៍ ស្ថិតនៅភូមិស្វាយអាណាត ឃុំញរ ស្រុកកំពងរោទ៍ ។
ប្រជាពលរដ្ឋលើកឡើងថា បើដាក់លូហើយទុកមាត់លូចំហបែបនេះ មានរយៈពេល៧ទៅ៨ឆ្នាំហើយ លោកអភិបាលស្រុកបែរជាអត់ខ្វល់ ។ គម្របលូនៅចំហបែបនេះ ជះក្លិនស្អុយទៅតាមដូងផ្លូវនោះ គឺស្ថិតនៅលើផ្លូវកៅស៊ូលេខ៣១៤D ស្ថិតនៅក្នុងភូមិស្វាយអាណាត ឃុំញរ ស្រុកកំពង់រោទ៍ ខេត្តស្វាយរៀង ដែលមានចរាចរណ៍មមាញឹក និងដ៏សំខាន់ នៅទីរួមស្រុកកំពង់រោទ៍ ។
អាចនិយាយបានថា ជាផ្លូវដ៏សំខាន់នៅក្នុងមូលដ្ឋានស្រុកកំពង់រោទ៍ សម្រាប់ប្រជាពលរដ្ឋធ្វើដំណើរទៅមក មានទាំងភ្ញៀវបរទេសធ្វើដំណើរតាមផ្លូវនេះ មិនគួរទុកឱ្យមានក្លិនស្អុយបង្អួតមហាជនបែបនេះសោះ ។ ប៉ុន្តែអ្វីដែលធ្វើឲ្យប្រជាពលរដ្ឋក្នុងមូលដ្ឋាននេះមានចម្ងល់នោះថា តើហេតុអ្វីបានជាផ្លូវធ្វើរួចរាល់យូរឆ្នាំហើយ ប៉ុន្តែមិនព្រមដាក់គម្របលូយ៉ាងដូច្នេះ ? ជាងនេះទៅទៀត នៅពេលប្រជាពលរដ្ឋស្នើសុំធ្វើគម្របលូ យកទៅបិទបាំងជាបណ្ដោះអាសន្ន លោកអភិបាលស្រុកកំពង់រោទ៍មិនអនុញ្ញាតទាល់តែសោះ ។
នេះគឺជាចម្ងល់របស់ប្រជាពលរដ្ឋ ដែលឆ្ងល់ជាយូរឆ្នាំមកហើយ ក្នុងហេតុផលអ្វីដែលពួកគាត់មិនយល់ ចំពោះគំនិតរបស់លោកអភិបាលស្រុកកំពង់រោទ៍ ដែលមិនអនុញ្ញាតឲ្យប្រជាពលរដ្ឋធ្វើគម្របលូយកទៅបិទបាំងជាបណ្ដោះអាសន្នសោះ តើរង់ចាំស្ថាប័នជំនាញខាងណាយកលូទៅគ្របនោះ ។
តើខាងក្រុមហ៊ុនធ្វើផ្លូវជាអ្នកធ្វើគម្របលូយកមកគ្រប ឬមន្ទីរសាធារណការ និងដឹកជញ្ជូនខេត្តស្វាយរៀងជាអ្នកធ្វើ ? តើស្ថាប័នខាងណាឲ្យពិតប្រាកដ ជាអ្នកដែលត្រូវធ្វើគម្របលូនៅលើផ្លូវលេខ៣១៤D ? អ្វីដែលជាចម្ងល់របស់ប្រជាពលរដ្ឋក្នុងមូលដ្ឋានខាងលើថា តើហេតុអ្វីបានជាលោកអភិបាលស្រុកមិនឲ្យប្រជាពលរដ្ឋធ្វើគម្របលូដោយស្ម័គ្រចិត្តយកទៅគ្របមាត់លូជាបណ្ដោះអាសន្ន ? ទុកឱ្យក្មេងៗដើរធ្លាក់ ឬទុកឱ្យហិតក្លិនបន្តទៀត ?
ចំពោះករណីខាងលើនេះ ប្រជាពលរដ្ឋទទូចទៅខាងមន្ទីរសាធារណការ និងដឹកជញ្ជូនខេត្តស្វាយរៀង ក៏ដូចជាលោកអភិបាលខេត្ត មេត្តាពិនិត្យ និងអន្តរាគមន៍ឲ្យលោកអភិបាលស្រុកកំពុងរោទ៍ដាក់គម្របលូផង ហើយបើរដ្ឋបាលស្រុកគ្មានលទ្ធភាពទេ គួរតែឲ្យប្រជាពលរដ្ឋធ្វើគម្រលូកគ្របបិទបាំងបណ្ដោះអាសន្នសិនទៅ ។ ការដែលទុកចំហមាត់លូយ៉ាងដូច្នេះមានហានិភ័យច្រើនណាស់ ទាំងបញ្ហាបរិស្ថាន ទាំងបញ្ហាគ្រោះថ្នាក់ ដែលអាចនឹងកើតជាយថាហេតុ ។
ទាក់ទិនករណីនេះដែរ លោក សុច ពិសី អភិបាលស្រុកកំពុងរោទ៍ បានចេញលិខិតបំភ្លឺមួយចុះថ្ងៃទី២៨ ខែមិថុនា ឆ្នាំ២០២៤ ដោយមានខ្លឹមសារជារួមថា សុំផ្អាកការធ្វើសំណង់នានានៅក្នុងមូលដ្ឋានខាងលើ ។ រីឯគម្របលូនោះ ដោយសារតែមានទំនាស់បញ្ហាផ្លូវទឹកនៅខាងក្រោយ ទើបបណ្ដាលឲ្យខកខាន ឬអូសបន្លាយដល់ការចាក់បិទគម្របលូនៅតាមផ្លូវជាតិ។ ទោះបីជាបែបណា ទំនាស់អស់រយៈពេល៧ទៅ៨ឆ្នាំហើយ ល្មមធ្វើការដោះស្រាយហើយ។ ឱ!លោកអភិបាលស្រុកដ៏មហិមាអើយ…ហេ! ហេ! ៕
ចែករំលែកព័តមាននេះ