ទីក្រុងរ៉ង់ហ្គូន៖ ធនាគារជាតិភូមាបានចេញសេចក្ដីប្រកាសមួយច្រានចោលរបាយការណ៍របស់អង្គការសហប្រជាជាតិដែលនិយាយថារបបយោធាភូមានៅតែអាចទិញកាំភ្លើងយកទៅបង្ក្រាបក្រុមប្រឆាំង។ ធនាគារជាតិភូមាបញ្ជាក់ថាគ្រឹះស្ថានហិរញ្ញវត្ថុនៅភូមាដែលស្ថិតក្រោមការគ្រប់គ្រងរបស់ធនាគារជាតិត្រូវតែអនុវត្តតាមនីតិវិធីដែលធនាគារបានដាក់ឱ្យប្រតិបត្តិតាម។ ធនាគារជាតិភូមាសូមបដិសេធអ្វីដែលអ្នករាយការណ៍ពិសេសរបស់អង្គការសហប្រជាជាតិសរសេរនៅក្នុងរបាយការណ៍។ ធនាគារយល់ថារបាយការណ៍នេះប៉ះពាល់ផលប្រយោជន៍របស់ប្រជាជនភូមា និងទំនាក់ទំនងរវាងភូមា និងប្រទេសដទៃ។
![](https://kohsantepheapdaily.com.kh/wp-content/uploads/2024/07/fd5740f28449b80f731a25de62476f8b.jpg)
អ្នករាយការណ៍របស់អង្គការសហប្រជាជាតិ លោកថំ អេនឌ្រូ (Tom Andrews) ចេញរបាយការណ៍កាលពីថ្ងៃពុធថាទោះបីសហគមន៍អន្តរជាតិខិតខំទប់ស្កាត់មិនឱ្យរបបសឹកទទួលបានលុយទិញអាវុធយ៉ាងណាក្ដី ប៉ុន្តែរបបនេះនៅតែអាចនាំចូលទំនិញ២៥៣លានដុល្លារមានដូចជាបច្ចេកវិទ្យាដែលអាចប្រើប្រាស់នៅក្នុងវិស័យយោធា និងស៊ីវិល, គ្រឿងបរិក្ខារសម្រាប់ឧស្សាហកម្ម និងសម្ភារៈដទៃទៀត។ នេះជាតម្លៃនាំចូលរយៈពេល១២ខែគិតចាប់ពីខែមីនា ឆ្នាំ២០២៤រាប់ថយក្រោយវិញ។
![](https://kohsantepheapdaily.com.kh/wp-content/uploads/2024/07/9f090eba032ef481337b840731e250b0.jpg)
របាយការណ៍នេះសរសេររៀបរាប់ថារបបយោធាមានជំនួយពីធនាគារនៅក្រៅប្រទេស។ ក្នុងនោះក៏មានធនាគារខ្លះ (សំដៅលើធនាគារឯកជន) នៅប្រទេសថៃផងដែរដើម្បីជួយសម្រួលការនាំចូលទំនិញទាំងនោះ។ សព្វថ្ងៃនេះ សង្គ្រាមស៊ីវិលនៅតែបន្តឆាបឆេះនៅលើទីតាំងជាច្រើនកន្លែងនៃប្រទេសភូមា។ ដូច្នេះ ស្ថានភាពសេដ្ឋកិច្ចជាតិធ្លាក់ចុះខ្លាំងមែនទែន។ ចំណែកបញ្ហានយោបាយក៏ប្រហែលជាមិនងាយនឹងដោះស្រាយចេញទេ ព្រោះការចរចាគ្នាមិនសូវរីកចម្រើនទៅមុខប៉ុន្មានឡើយ។
![](https://kohsantepheapdaily.com.kh/wp-content/uploads/2024/07/dd8407b08aecc29b9d32bb11dd69bdce.jpg)
ក្រុមប្រទេសលោកខាងលិចនៅតែបន្តដាក់ទណ្ឌកម្មសេដ្ឋកិច្ចទៅលើរបបសឹកភូមា។ ដូច្នេះ ការចរាចរណ៍សាច់ប្រាក់ចេញចូលធនាគារ ឬគ្រឹះស្ថានហិរញ្ញវត្ថុ និងអាជីវកម្មដែលអាចនឹងជាប់ពាក់ព័ន្ធដទៃទៀតត្រូវហាមឃាត់ជាដាច់ខាត។ នរណាហ៊ានបំពានបម្រាមនេះអាចនឹងទទួលរងទណ្ឌកម្មខ្លួនឯងថែមទៀត។ ធនាគារជាតិភូមាថ្លែងថាធនាគារក្នុងស្រុក និងធនាគារនៅប្រទេសដទៃដែលធ្វើប្រតិបត្តិការសាច់ប្រាក់ចេញចូលប្រទេសភូមាសុទ្ធតែបានអនុវត្តយ៉ាងត្រឹមត្រូវទៅតាមនីតិវិធី។
![](https://kohsantepheapdaily.com.kh/wp-content/uploads/2024/07/51772d0793a01363d098d0cbb063bbbb.jpg)
ធនាគារនេះសូមបញ្ជាក់ថារាល់ការធ្វើប្រតិបត្តិការសាច់ប្រាក់ផ្ទេរចេញ-ផ្ទេរចូលគឺដើម្បីតែអនុញ្ញាតឱ្យនាំចូលទំនិញសំខាន់ៗសម្រាប់បម្រើឱ្យសេចក្ដីត្រូវការប្រចាំថ្ងៃរបស់ជនស៊ីវិលភូមាតែប៉ុណ្ណោះ។ ឧទាហរណ៍ ថ្នាំពេទ្យ និងគ្រឿងបរិក្ខារពេទ្យ, ទំនិញសម្រាប់ទ្រទ្រង់វិស័យកសិកម្ម និងសត្វពាហនៈ, ជីកសិកម្ម, ប្រេងឆា និងប្រេងឥន្ធនៈ។ល។ យោងតាមរបាយការណ៍របស់អង្គការសហប្រជាជាតិ, ទំនិញដែលភូមានាំចូលពីសិង្ហបុរីធ្លាក់ចុះមកនៅត្រឹមតែជាងដប់លានដុល្លារតែប៉ុណ្ណោះ។
![](https://kohsantepheapdaily.com.kh/wp-content/uploads/2024/07/dc17a82d628050157280580017a793ad.jpg)
មានន័យថាថយចុះខ្លាំងណាស់បើប្រៀបធៀបជាមួយឆ្នាំ២០២២ដែលមានរហូតដល់ជាង១១០លានដុល្លារ។ មែនទែនទៅ, ទំហំនាំចូលវានៅតែដដែលទេ។ គ្រាន់តែភូមាបង្វែរពីការនាំចូលពីសិង្ហបុរីទៅនាំចូលពីប្រទេសថៃវិញម្ដង។ ជាក់ស្ដែង គេស្រាវជ្រាវឃើញថាភូមានាំអាវុធ និងទំនិញផ្សេងទៀតពីប្រទេសថៃ១២០លានដុល្លារកាលពីឆ្នាំ២០២៣។ ពោលគឺអត្រានាំចេញពីថៃទៅភូមានៅឆ្នាំ២០២៣នោះច្រើនជាងឆ្នាំ២០២២រហូតដល់ទៅ២ដង។ ក្រោយពេលអង្គការសហប្រជាជាតិចេញរបាយការណ៍នេះ ប្រទេសថៃចង់ភ័យខ្លួនដែរព្រោះបើហ៊ានស៊ីសស៊ូសគ្នាជាមួយរបបសឹក ថៃក៏អាចមានបញ្ហាផងដែរ។
![](https://kohsantepheapdaily.com.kh/wp-content/uploads/2024/07/3931d068b5faaaa08ebe8e1ac566b18b.jpg)
ដូច្នេះ កាលពីថ្ងៃព្រហស្បតិ៍សប្ដាហ៍មុន, ក្រសួងការបរទេសថៃក៏ចេញសេចក្ដីថ្លែងការណ៍មួយរបស់ខ្លួនដើម្បីបញ្ជាក់ថាគ្រប់ប្រព័ន្ធធនាគារ និងគ្រឹះស្ថានហិរញ្ញវត្ថុនៅទូទាំងប្រទេសថៃបន្តអនុវត្តបានល្អណាស់ទៅតាមនីតិវិធីផ្សេងៗ។ ពោលគឺមិនខុសពីគ្រឹះស្ថានហិរញ្ញវត្ថុធំៗនោះទេ។ ក្រសួងបន្ថែមទៀតថារាជរដ្ឋាភិបាលថៃក៏មិនព្រងើយកន្តើយចំពោះការចេញរបាយការណ៍របស់អ្នករាយការណ៍ពិសេសនោះឡើយ។ ថៃនឹងយករបាយការណ៍នោះមកពិនិត្យមើល និងវាយតម្លៃឡើងវិញ៕
ចែករំលែកព័តមាននេះ