មកគយគន់សម្រស់កោះហាន ខេត្តស្ទឹងត្រែង តើមានអ្វីពិសេស?
- ស្ទឹងត្រែង
ខេត្តស្ទឹងត្រែង ៖ កោះហាន គឺជាឈ្មោះកោះមួយលាតសន្ធឹងពីព្រំប្រទល់ប្រទេសឡាវ មកកាន់ទីរួម
0:00
0:00
ខេត្តស្ទឹងត្រែង ៖ កោះហាន គឺជាឈ្មោះកោះមួយលាតសន្ធឹងពីព្រំប្រទល់ប្រទេសឡាវ មកកាន់ទីរួមខេត្តស្ទឹងត្រែង ប្រមាណជា២៤គីឡូម៉ែត្រ និងមានទំហំប្រមាណជា១២០០០ហិតា ស្ថិតនៅក្នុងតំបន់ទន្លេមេគង្គ រ៉ាមសារនៃខេត្តស្ទឹងត្រែង ក្រាលដោយខ្សាច់ពណ៌មាស ដែលមានសក្តានុពលផ្នែកទេសចរណ៍ដ៍សំបូរបែបរួមមាន ទឹកទន្លេមេគង្គនារដូវប្រាំងត្រជាក់និងថ្លាដូចកញ្ចក់ ព្រៃលិចទឹក ជីវចម្រុះក្នុងទឹក សត្វស្លាប កោះខ្សាច់ ថ្មប៉ប្រាស់ទឹកហូរ ព្រៃភ្នំ និងសត្វស្លាបជាច្រើនប្រភេទផងដែរ។
កោះហាន ត្រូវបានបង្កើតឡើងពីសហគមន៍អេកូទេសចរណ៍ដោយមានឈ្មោះថា(សម្រស់កោះហាន )។
កោះនេះ ស្ថិតក្នុងឃុំកោះស្នែង ស្រុកបុរីអូរស្វាយសែនជ័យ ចម្ងាយពីទីរួមខេត្ត២៤គីឡូគីឡូម៉ែត្រប៉ុណ្ណោះ។
ដើម្បីអាចទៅដល់តំបន់អេកូទេសចរណ៍មួយនេះ យើងត្រូវធ្វើដំណើរឆ្លងតាមស្ពានសេកុង ផ្លូវជាតិលេខ៧ និងទៅដល់កំពង់ដរចម្លងសហគមន៍ដដែលមានអ្នករង់ចាំទទួលនិងនាំផ្លូវទៅដល់ទីកន្លែងកំសាន្តនោះតែម្តង។
ខណៈដែលយើងទៅដល់កំពង់ចម្លងពេលនោះ ក៏ត្រូវជិះទូកឆ្លងកាត់ទន្លេដើម្បីបានទៅដល់ដីកោះ ដែលមានខ្សាច់ពណ៌មាស ដើមឈើប៉ប្រះទឹក ទឹកទន្លេថ្លាដូចកញ្ចក់យ៉ាងត្រជាក់ផងដែរ ។ ភ្ញៀវទេសចរដែលមានបំណងចង់ទៅកំសាន្តជាលក្ខណៈគ្រួសារ ជាក្រុម អាចទាក់ទងរកសេវាបម្រើគ្រប់តម្រូវការជាកញ្ចប់ងាយស្រួលបំផុត ។
ទាក់ទិនការចាប់អារម្មណ៍របស់ភ្ញៀវដែលតែងទៅលេងកំសាន្តនៅតំបន់នោះហើយលាន់មាត់ថា ជាឋានសួគ៌ធម្មជាតិក្រោមមេឃធ្វើអារម្មណ៍ស្រស់ស្រាយពេញមួយគ្រាធំ ខណៈបានទៅលេងនៅទីនោះ ។
តំបន់អេកូទេសចរណ៍សម្រសស់កោះហាននោះ អ្នកទស្សនាអាចលេងកំសាន្តដូចជា ជិះទូកមើលព្រៃលិចទឹក សត្វស្លាបទឹកទន្លេមេគង្គ និងឡើងភ្នំ ទស្សនារូបសំណាក់ថ្មពាក់ព័ន្ធរឿងព្រេង (ថ្មកំបោរ) បោះតង់ មើលថ្ងៃលិច ដុតត្រីដោតចង្កាក់ស្តាប់ភ្លេងនាពេលរាត្រី ស្ទូចត្រី បង្ហោះគូម ជិះទូកកៃយ៉ាក់តាមព្រៃលិចទឹក ពិសារ អាហារប្រចាំតំបន់ ដែលរៀបចំដោយសហគមន៍ផ្ទាល់ស្នាក់នៅផ្ទះស្នាក់សហគមន៍ និងរៀនសូត្រពីជីវភាពរស់ នៅអ្នកលើកោះ។
ប្រសិនបើយើងមិនបានត្រៀមអាហារបម្រុងដែលនាំអោយលំបាកក្នុងការដឹកជញ្ជូនលីសែងក្រៅពៅសម្ភារប្រើប្រាស់ផ្ទាល់ខ្លួន សហគមន៍ក៏មានបម្រើសេវាម្ហូបអាហារ ចំណែកមិនចង់បោះតង់លើវាលខ្សាច់ សហគមន៍ក៏មានសេវាផ្ទះស្នាក់សហគមន៍ព្រមទាំងសេវាផ្សេងៗជាច្រើនទៀតដោយមិនអោយយើងមានការព្រួយបារម្ភឡើយ។
ជាធម្មតា ភាគច្រើនភ្ញៀវដែលមានគោលបំណងទៅលេងកំសាន្តលើដីកោះនោះភាគច្រើនគេនិយមរួមគ្នាបោះតង់លើកោះជួបជុំគ្នាបង្កើនបរិយាកាសអនុស្សាវរីយ៍រួមគ្នា ហើយអ្វីដែលការជក់ចិត្តគឺក្រោយរៀបចំបោះតង់រួចរាល់ហើយនោះ ចូលចូលដល់ពេលរាត្រី យើងអាចបង្កើតកម្មវិធីបង្កាត់ភ្នក់ភ្លើង ដុតត្រីដោតចង្កាក់ ស្តាប់សម្លេងសត្វស្លាប សម្លេងទឹកហូរ និងភ្លេងតន្ត្រីរឹមៗកាន់តែមានភាពរីករាយថែមទៀត៕
ចែករំលែកព័តមាននេះ