ទីក្រុងវ៉ាស៊ីនតោន៖ លោកបៃដិនមិនដឹងយ៉ាងម៉េចយ៉ាងម៉ាទេនៅក្នុងការបោះឆ្នោតលើកនេះ។ មិនដឹងថាលោកអាចស៊ូរួចឬអត់ជាមួយលោកត្រាំ? ប៉ុន្តែលោកបានប្ដេជ្ញារួចហើយថាត្រូវតែខំប្រឹងដណ្ដើមជ័យជម្នះឱ្យបាននៅក្នុងការបោះឆ្នោតនាថ្ងៃទី៥ ខែវិច្ឆិកាខាងមុខនេះ។ នៅក្នុងការថ្លែងសុន្ទរកថាទៅកាន់អ្នកគាំទ្រនៅរដ្ឋខារ៉ូឡាយណាខាងជើង(North Carolina) កាលពីយប់ថ្ងៃសុក្រ លោកបៃដិននៅតែអះអាងថាលោកមានលក្ខណៈសម្បត្តិគ្រប់គ្រាន់ដើម្បីប្រកួតប្រជែងនៅក្នុងការបោះឆ្នោត។
ទោះជាយ៉ាងណាក្ដី លោកទទួលស្គាល់ថាកម្លាំងកំហែង និងសតិបញ្ញាស្មារតីអាចនឹងថមថយចុះបន្តិចហើយព្រោះវ័យកាន់តែចាស់ជរា។ លោកទទួលស្គាល់ថាលោកមិនអាចនិយាយស្ដី, ដើរ ឬជជែកដេញដោលគ្នាលះៗដូចកាលពីមុនទេ។ នៅទីបញ្ចប់នៃការសំណេះសំណាលនោះ លោកបានបន្សល់ទុកបណ្ដាំចុងក្រោយថា «លោកមិនដកខ្លួនថយពីការបោះឆ្នោតលើកនេះទេ»។
តាំងពីមុនបើកវេទិកាជជែកដេញដោលគ្នារវាងលោកត្រាំ និងលោកបៃដិនកាលពីយប់ថ្ងៃព្រហស្បតិ៍នៅទីក្រុងអាត្លង់តានោះ អ្នករស់នៅរដ្ឋខារ៉ូឡាយណាខាងជើងត្រៀមបោះឆ្នោតឱ្យលោកត្រាំភាគច្រើន។ នេះបើតាមការស្ទង់មតិ។ ការថ្លែងរបស់លោកបៃដិនធ្វើឡើងបន្ទាប់ពីក្រុមអ្នកសរសេរវិចារណកថារបស់កាសែតញូយ៉កថាមស៍ (New York Times) ជំរុញឱ្យលោកដកខ្លួនចេញពីការបោះឆ្នោតនេះទៅល្អជាង។ ពួកគេយល់ថាលោកបៃដិនធ្វើមិនបានល្អទាល់តែសោះនៅក្នុងវេទិកាតទល់មតិគ្នាជាមួយលោកត្រាំ។
វិចារណកថារបស់កាសែតញូយ៉កថាមស៍ មែនទែនទៅ, ញូយ៉កថាមស៍ជាកាសែតគាំទ្រគណបក្សប្រជាធិបតេយ្យជាប្រពៃណីតាំងពីដើមរៀងមក។ បើកាសែតនេះហ៊ាននិយាយប៉ុណ្ណេះហើយ មន្ត្រីធំៗរបស់គណបក្សក៏គិតមិនខុសគ្នាប៉ុន្មានដែរ។ ជាក់ស្ដែងមន្ត្រីគណបក្សប្រជាធិបតេយ្យ និងក្រុមអ្នកប្រមូលថវិកាសម្រាប់ការឃោសនាបោះឆ្នោតក៏ស្នើសុំឱ្យលោកបៃដិនដកខ្លួនថយជាបណ្ដើរៗហើយចាប់ពីពេលនេះទៅដើម្បីងាយស្រួលគេរកអ្នកថ្មីមកជំនួសនៅពេលដែលមិនទាន់ហួសពេល។
ញូយ៉កថាមស៍សរសេរថាលោកបៃដិនបង្ហាញខ្លួនកាលពីយប់ថ្ងៃព្រហស្បតិ៍នោះហាក់ដូចជាស្រមោលខ្លួនឯងទៅវិញទេ។ កាលនោះ លោកបៃដិននិយាយទាំងត្រដាបត្រដួសតបទៅលោកត្រាំដែលនិយាយវាយប្រហារលោកបៃដិនយ៉ាងចាស់ដៃ។ ញូយ៉កថាមស៍យល់ថាពាក្យពេចន៍ដែលលោកបៃដិនត្រូវនិយាយវាយប្រហារលោកត្រាំពាក់ព័ន្ធនឹងការនិយាយកុហក ការដឹកនាំបរាជ័យ និងផែនការទុច្ចរិតរបស់គាត់គួរណាស់លោកបៃដិននិយាយឱ្យបានល្អ។
ប៉ុន្តែជាក់ស្ដែង លោកនិយាយទាំងតតាក់តតុបតាំងពីដើមរហូតដល់ចប់។ វិចារណកថារបស់ញូយ៉កថាមស៍សរសេរបន្តទៀតថា «លោកបៃដិនចាត់ទុកខ្លួនលោកជាជម្រើសល្អបំផុតដើម្បីតទល់ និងយកឈ្នះលើលទ្ធិផ្ដាច់ការ។ ភាគច្រើនគាត់សម្អាងទៅលើករណីដែលគាត់ឈ្នះលោកត្រាំកាលពីឆ្នាំ២០២០។ ហេតុផលប៉ុណ្ណឹងមិនគ្រប់គ្រាន់សម្រាប់លោកឈរឈ្មោះជាបេក្ខជនប្រធានាធិបតីនៅឆ្នាំនេះទេ»។
គេគិតថាឈានដល់ដំណាក់កាលនេះហើយចង់ជ្រុលក្បាលក្រពើបន្តិចទៅហើយ។ ឧបមាថាគណបក្សប្រជាធិបតេយ្យចង់រកបេក្ខជនដទៃមកជំនួសលោកបៃដិន គណបក្សនេះក៏ជួបនឹងបញ្ហាដ៏ពិបាកជាទីបំផុត។ នេះមិនទាន់គិតទៅដល់ថាតើលោកបៃដិនសុខចិត្តដកខ្លួនថយឬអត់ផង។ ដើម្បីកុំឱ្យមានភាពសាំញ៉ាំ និងរសេមរសាមច្រើន សំខាន់ត្រូវរង់ចាំឱ្យលោកបៃដិនដកខ្លួនថយដោយខ្លួនឯងជាមុនសិន។ ប៉ុន្តែបើលោកបៃដិនដឹងថាខ្លួនទៅមិនរួចទេ ហើយសុខចិត្តក្រាញរហូតដល់ចាញ់ឆ្នោតក៏ជាការធ្វើឱ្យគណបក្សរបស់គាត់ខាតបង់ផលប្រយោជន៍ទៅវិញទេ៕
ចែករំលែកព័តមាននេះ