ទីក្រុងហាណូយ៖ ពិតជាមានសន្ដានចិត្តល្អកម្ររកបានមែន នារីម្នាក់រើសបានលុយជាង៥ម៉ឺនដុល្លារអាមេរិកនៅវៀតណាមសុខចិត្តប្រគល់ឱ្យម្ចាស់គេគ្រប់ចំនួន។ ថ្មីៗនេះមានរឿងភ្ញាក់ផ្អើល និងក៏ជារឿងគួរឱ្យស្ងើចសរសើរផងដែរដែលនារីម្នាក់ជាបុគ្គលិកផ្នែកអនាម័យនៅអាកាសយានដ្ឋានទីក្រុងដាណាង (Da Nang) ប្រទេសវៀតណាម សម្រេចចិត្តមិនប៉ះពាល់លុយនៅក្នុងកាបូបដែលមានចំនួនជិត៥៤០០០ដុល្លារ ហើយសុខចិត្តប្រគល់ទៅឱ្យម្ចាស់ដែលជាអ្នកទេសចរជនជាតិជប៉ុន។
ម្ចាស់លុយរូបនេះបានទុកកាបូបលុយចោល ហើយវង្វេងបាត់អស់ជាច្រើនថ្ងៃមកហើយចាប់តាំងពីដើមសប្ដាហ៍នេះ។ នៅម៉ោងប្រហែល៦ព្រឹកថ្ងៃពុធ អ្នកស្រីហឿង (Huong) វ័យ៥៧ឆ្នាំកំពុងបោសសម្អាតទីធ្លានៅកន្លែងអ្នកដំណើររង់ចាំនៃអាកាសយានដ្ឋានអន្តរជាតិទីក្រុងដាណាងសុខៗស្រាប់តែក្រឡេកភ្នែកទៅឃើញកាបូបខ្មៅ១ត្រូវម្ចាស់ភ្លេចនៅលើកៅអីអង្គុយ។
រូបតំណាងនៅពេលនោះ បន្ទប់រង់ចាំគ្មានជើងហោះចេញ ឬហោះចូលទេ។ អ្នកស្រីហឿងគិតថាប្រហែលជាម្ចាស់កាបូបនេះភ្លេចហើយមើលទៅ។ ហេតុនេះ អ្នកស្រីក៏យករឿងនេះប្រាប់ទៅផ្នែកត្រួតពិនិត្យនៃក្រុមហ៊ុនដែលអ្នកស្រីធ្វើការ។ បន្ទាប់មក អាជ្ញាធរនៅព្រលានយន្តហោះក៏ពិនិត្យមើលនៅក្នុងកាបូបឃើញលុយដុល្លារ និងលុយយ៉េនរបស់ជប៉ុនសរុប៥៣៧៨០ដុល្លារ។
រូបតំណាងក្រោយមក គេក៏បិតតែមជិតពីលើកាបូបនោះដើម្បីមិនឱ្យអ្នកដទៃប៉ះពាល់ ឬឆែកមើលតទៅទៀត។ គេក៏យកកាបូបទៅប្រគល់ឱ្យខាងព្រលានយន្តហោះដើម្បីថែរក្សាទុករង់ចាំម្ចាស់គេត្រឡប់មកយកវិញ។ នៅម៉ោងប្រហែល៩យប់ថ្ងៃព្រហស្បតិ៍ អ្នកទេសចរជនជាតិជប៉ុនម្នាក់ក៏វិលត្រឡប់មកវិញដូចការគិតរបស់អាជ្ញាធរមែន។ គាត់សួររកកាបូបរបស់គាត់ដែលបាត់។
អ្នកទេសចររូបនេះប្រាប់ថាគាត់ធ្វើដំណើរពីជប៉ុនទៅដាណាងតាំងពីពីរបីថ្ងៃមុនហេតុការណ៍ភ្លេចកាបូបនោះកើតឡើងទៅទៀត។ ក្រោយមក គាត់ក៏បង្ហួសដំណើរទៅកូរ៉េខាងត្បូងកាលពីព្រឹកថ្ងៃពុធ ហើយក៏ភ្លេចយកកាបូបលុយនោះទៅជាមួយ។ អ្នកស្រីហឿងដែលរើសបានកាបូបនោះប្រាប់ថាគាត់ជាមនុស្សទៀងត្រង់ណាស់។ រយៈពេលជាង៦ឆ្នាំដែលអ្នកស្រីធ្វើការនៅក្នុងក្រុមហ៊ុននេះ អ្នកស្រីធ្លាប់រើសបានរបស់របរច្រើនណាស់ដូចជាទូស័ព្ទដៃ កុំព្យូទ័រយួរដៃ និងកាបូបលុយជាដើម។
ប៉ុន្តែអ្នកស្រីមិនដែលយករបស់ទាំងនោះធ្វើជាកម្មសិទ្ធិផ្ទាល់ខ្លួនទេ សុខចិត្តប្រគល់ទៅឱ្យម្ចាស់ដើមរបស់គេវិញ។ ប៉ុន្តែអ្នកស្រីប្រាប់ថានេះជាលើកនេះទី១ហើយដែលអ្នកស្រីរើសបានកាបូបមានលុយច្រើនដល់រាប់ម៉ឺនដុល្លារបែបនេះ។ ទង្វើល្អរបស់អ្នកស្រីពិតជាមិនឥតប្រយោជន៍ទេ។ ក្រុមហ៊ុនដែលអ្នកស្រីកំពុងធ្វើការនោះបានផ្ដល់ប្រាក់១លានដុង ឬស្មើនឹង៣៩ដុល្លារដើម្បីជាការលើកទឹកចិត្ត និងជាការកោតសរសើរចំពោះទឹកចិត្តស្មោះសរបស់អ្នកស្រី។
ស្ត្រីឈ្មោះហឿងដែលរើសបានកាបូបមានលុយជាង៥ម៉ឺនដុល្លារតាមពិត បញ្ហានេះសំខាន់ណាស់ពាក់ព័ន្ធនឹងមុខមាត់របស់ប្រទេសជាតិ។ សម្រាប់អ្នកទេសចរបរទេស ការមានដៃមានជើងលួច ឬយករបស់ដែលភ្លេចអាចនឹងក្លាយជាគំរូមិនល្អ។ ពួកគេអាចនឹងយករឿងនេះទៅផ្សព្វផ្សាយពីមាត់មួយទៅមាត់មួយប្រាប់ជនជាតិរបស់គេ ហើយអាចនឹងប៉ះពាល់មុខមាត់ប្រទេសជាតិ។ ទឹកលុយជាង៥ម៉ឺនដុល្លារវាពិតជាចំនួនច្រើនសម្រាប់ក្របខណ្ឌបុគ្គលយកទៅធ្វើមានធ្វើបានម្នាក់ឯង។ ប៉ុន្តែសម្រាប់មុខមាត់ជាតិតើខាតប៉ុណ្ណា?
បន្ទប់គ្រប់គ្រងកាមេរ៉ាសុវត្ថិភាពនៅព្រលានយន្តហោះវៀតណាម
ចែករំលែកព័តមាននេះ